គោលការណ៍នៃការធ្វើជំនួញរបស់លោក Warren Buffett ត្រូវបានគេទទួលស្គាល់យ៉ាងទូលំទូលាយរាប់សិបឆ្នាំមកហើយ តើទស្សនៈរបស់លោកមានអ្វីខ្លះ យើងមកអានចំណុចដូចខាងក្រោមទាំងអស់គ្នា ៖
១-ផ្តល់តម្លៃដល់កេរ្តិ៍ឈ្មោះ និងកិត្តិយសរបស់អ្នក ៖ « យើងប្រើពេលវេលា២០ឆ្នាំក្នុងការបង្កើតកេរ្តិ៍ឈ្មោះបោះសំឡេង ប៉ុន្តែយើងអាចបំផ្លាញវាទាំងអស់ត្រឹមតែ៥នាទី ។ ប្រសិនបើអ្នករំលឹកដល់វា អ្នកនឹងធ្វើរឿងខុសគ្នា » វាជារឿងពិតក្នុងសង្គម ព្រោះលោក Warren Buffett ណែនាំជានិច្ចថា យើងគួរបង្កើតគុណតម្លៃដល់ខ្លួនឯង និងក្រុមហ៊ុនរបស់យើងឱ្យបានច្រើនបំផុត ព្រមទាំងបង្កើតកេរ្តិ៍ឈ្មោះ និងកិត្តិយសសម្រាប់អ្វីដែលយើងមាន ។
វាអាស្រ័យលើពេលវេលាយូរ ដូច្នេះ មុននឹងធ្វើអ្វី គួរគិតឱ្យបានល្អជាមុនសិន ប្រសិនបើយើងមានស្មារតីសញ្ជឹងគិតលើរឿងនេះដោយប្រុងប្រយ័ត្ន យើងនឹងធ្វើរឿងដែលខុសប្លែកគ្នា ហើយអាចនឹងមិនធ្វើរឿងគ្រាន់តែជាអារម្មណ៍មិនល្អរយៈពេលខ្លី តែវាអាចបំផ្លាញគ្រប់យ៉ាងដែលអ្នកមានតែក្នុងមួយប៉ប្រិចភ្នែក ។
២-ធ្វើការដើម្បីអនាគតល្អ ៖ « មនុស្សមួយចំនួនបានអង្គុយនៅក្រោមម្លប់ក្នុងថ្ងៃនេះ ក៏ព្រោះតែធ្លាប់មានអ្នកដាំដើមឈើនេះជាយូរមកហើយ » ប្រសិនបើយើងចង់មានអនាគតល្អ ហេតុនេះគួរតែចាប់ផ្តើមបណ្តុះគ្រាប់ពូជចាប់ពីថ្ងៃនេះទៅ ព្រោះអ្វីដែលធ្វើឱ្យយើងមានក្តីសុខក្នុងថ្ងៃនេះ គឺជាផលនៃគ្រាប់ពូជដែលធ្លាប់បានបណ្តុះកាលពីពេលមុន មិនថាជារឿងល្អ ឬមិនល្អ ។ រឿងដែលបានធ្វើពីអតីតកាល គឺជាផលនៃបច្ចុប្បន្ន ដូច្នេះប្រសិនបើពេលនេះ យើងព្រមធ្វើអ្វីមួយដែលអាចនឹងនឿយហត់បន្តិចដើម្បីអនាគត វាគង់តែល្អជាងមិនធ្វើអ្វីសោះ ។
៣-បំពេញគុណតម្លៃ ៖ « រឿងដែលចំណាយទៅគឺតម្លៃ តែអ្វីដែលបានមកវិញ គឺគុណតម្លៃរបស់វា » នៅពេលយើងទិញអ្វីមួយ ព្រោះតែយើងពេញចិត្តនូវគុណតម្លៃរបស់វាមែនទេ ? មិនថាជាសម្ភារឬសេវាក្តី ។ នេះជាគំនិតដែលយកមកប្រើជាមួយទំនិញ ឬសេវារបស់យើងបានដូចគ្នា ព្រោះអ្នកដទៃនឹងមើលឃើញគុណតម្លៃរបស់ទំនិញ និងសេវាកម្មនោះច្រើនប៉ុនណា វាអាស្រ័យលើយើងផ្តល់គុណតម្លៃនៃទំនិញ និងសេវាកម្មបានគ្រប់គ្រាន់ឬនៅ ។
៤-ជ្រើសរើសសេពគប់មិត្តភក្តិល្អ ៖ « វាជាការប្រសើរ បើអាចសេពគប់ស្និទ្ធស្នាលជាមួយមនុស្សដែលល្អជាងយើង ។ ចូរជ្រើសរើសសេពគប់ក្រុមមិត្តភក្តិដែលមានទម្លាប់ល្អ ហើយយើងនឹងត្រូវនាំទៅរកផ្លូវតែមួយ » ប្រសិនបើយើងចង់ទទួលបានជោគជ័យ គឺគួរតែសេពគប់ជាមួយបុគ្គលជោគជ័យ ព្រោះមនុស្សយើងមាននិន្នាការទៅរកទម្លាប់ ដូចអ្នកដែលយើងប្រើពេលវេលានៅជាមួយច្រើនបំផុត ដូចជាពាក្យថា « យើងរមែងតែមានតម្លៃស្មើជាមួយមនុស្សដែលជិតស្និទ្ធបំផុត៥នាក់ » ។
អាចសាកល្បងពិចារណា ព្រោះនេះជាការពិតរបស់មនុស្ស ដូច្នេះ Warren Buffett បានណែនាំឱ្យយើងជ្រើសរើសសេពគប់មនុស្សដែលយើងចង់ក្លាយជា ដូចជាបុគ្គលជោគជ័យ និងមានទម្លាប់ល្អជាងយើង ។ល។ ហើយមនុស្សទាំងនេះនឹងមាននិន្នាការអភិវឌ្ឍន៍ខ្លួនយើងផងដែរ ។
៥-សេចក្តីអំណត់ គឺជាកូនសោសំខាន់ ៖ « មិនថាយើងនឹងឆ្លាត ឬព្យាយាមកម្រិតណា រឿងខ្លះក៏ត្រូវប្រើពេលវេលាផងដែរ » ក្រៅពីសមត្ថភាពឬការខិតខំ និងសេចក្តីព្យាយាម ការធ្វើអ្វីមួយចំនួនវាអាស្រ័យលើពេលវេលាសមស្របផងដែរ ។ ដូច្នេះ ក្រៅពីការព្យាយាម និងសមត្ថភាពរបស់យើង រឿងមួយទៀតដែលត្រូវមាន គឺសេចក្តីអំណត់ និងការរង់ចាំ ។
៦-ហ៊ានប្រថុយ (បន្ទាប់ពីវិភាគបានល្អហើយ) ៖ « ការប្រថុយមកពីយើងមិនដឹងថាកំពុងតែធ្វើអ្វី » ជាការពិត មុខជំនួញមានភាពប្រថុយប្រថាន តែ Warren Buffett ជឿថា នឹងប្រថុយច្រើន ឬតិច វាអាស្រ័យតើយើងបានគណនា វិភាគបានល្អគ្រប់គ្រាន់ហើយឬនៅចំពោះរឿងដែលនឹងធ្វើនោះ ។ ដូច្នេះ វាល្អជាងដែលយើងនឹងគិតពិចារណា វិភាគយ៉ាងហ្មត់ចត់មុននឹងសម្រេចចិត្តប្រឈមនឹងការប្រថុយ ជាជាងការភ័យខ្លាចហើយមិនហ៊ានប្រថុយធ្វើអ្វី ឬក៏ធ្វើទៅដោយមិនបានគិតទុកជាមុន ។
៧-ធ្វើអ្វីដែលស្រឡាញ់ ៖ « វានឹងមានពេលវេលាដែលយើងគួរធ្វើរឿងដែលខ្លួនត្រូវការ និងធ្វើការដែលខ្លួនស្រឡាញ់។ យើងប្រញាប់ងើបពីគ្រែនៅពេលព្រឹក ខ្ញុំគិតថា អ្នកពិតជាឆ្កួត បើសិនជាអ្នកត្រូវអត់ធន់នឹងការងារដែលមិនចូលចិត្ត ដើម្បីគ្រាន់តែធ្វើឱ្យមើលទៅល្អនៅក្នុងប្រវត្តិរូប » សរុបងាយៗ គឺធ្វើរឿងដែលអ្នកស្រឡាញ់ ព្រោះមនុស្សភាគច្រើនកំពុងបំផ្លាញជីវិតខ្លួនឯង ដោយការជ្រើសរើសធ្វើតាមអ្វីដែលអ្នកដទៃត្រូវការ ។
យើងគួរធ្វើតាមអ្វីដែលខ្លួនត្រូវការប្រសើរជាង ។ មនុស្សគ្រប់រូបមានភាពស្ទាត់ជំនាញរៀងៗខ្លួន គឺរឿងនោះហើយដែលយើងគ្រប់គ្នាគួរធ្វើ ព្រោះបើសិនជាយើងផ្លាស់ប្តូរការងារតាមចំណង់ចំណូលចិត្តខ្លួនឯង វានឹងគ្មានថ្ងៃដែលយើងនឹងមានអារម្មណ៍ស្អប់ ឬធុញទ្រាន់ជិនណាយនឹងការងារនោះឡើយ ហើយវាជាទ្វារដំបូងនៃពាក្យថា «ជោគជ័យ» ។
៨-ស្គាល់ពីគូប្រកួតប្រជែង ៖ « ក្នុងពិភពជំនួញ កញ្ចក់មើលក្រោយនៃរថយន្ត ច្បាស់ជាងកញ្ចក់មុខជានិច្ច » ក្នុងគំនិតរបស់ Warren Buffett ចង់ឱ្យយើងស្គាល់ពីគូប្រជែងរបស់ខ្លួន ល្អជាងស្គាល់ពីខ្លួនឯង ព្រោះយើងចាំបាច់ត្រូវតាមដានគូប្រជែងជានិច្ចថា គេនឹងទៅផ្លូវណា ហើយធ្វើអ្វី។
អ្នកជំនួញជោគជ័យតែងដឹងថា គូប្រជែងធ្វើបានល្អកម្រិតណាក្នុងអតីតកាល និងអាចស្រមៃថា ពួកគេនឹងដើរទៅផ្លូវណា ហើយនឹងធ្វើបានល្អកម្រិតណានាពេលអនាគត ។ សរុបមក ត្រូវស្គាល់ពួកគេ ស្គាល់ខ្លួនឯង ដោយប្រយុទ្ធ១០០ដង ឈ្នះទាំង១០០ដង ។
៩-ដើរមួយជំហានៗ ៖ « ខ្ញុំមិនបានរកមើលថា នឹងលោតទៅខាងមុខ៧ជំហានដូចម្តេចនោះទេ តែខ្ញុំមើលទៅជុំវិញថា តើខ្ញុំអាចឆ្លងទៅបានឬអត់ » Warren Buffett មិនជឿលើភាពជោគជ័យគ្រាន់តែរយៈពេលមួយនោះទេ តែគាត់ជឿថា យើងគួរដើរមួយជំហានៗ បើទោះបីជាជំហានខ្លីៗក៏ដោយ ដើម្បីចូលជិតភាពជោគជ័យជាបណ្តើរៗ ព្រោះជំហានខ្លីៗនេះហើយ ទោះជាវាខ្លីមែន តែក៏យូរយាជាងការដែលយើងលោតឆ្ងាយ ហើយបើសិនជាភ្លាត់ស្នៀត នឹងមិនអាចទៅមុខទៀតបានឡើយ ។ Warren Buffett ណែនាំថា យើងគួរធ្វើអ្វីម្យ៉ាង ឬមួយជំហានៗ តែជាជំហានដែលគង់វង្ស ។
១០-រៀនបដិសេធ ៖ « ភាពខុសគ្នារវាងបុគ្គលជោគជ័យ និងអ្នកដែលទទួលបានភាពជោគជ័យពិតប្រាកដ គឺអ្នកទទួលជោគជ័យពិតប្រាកដស្គាល់នូវការបដិសេធ » យើងគួរជ្រើសរើសការបណ្តាក់ទុននីមួយៗដោយប្រុងប្រយ័ត្ន និងស្គាល់នូវការនិយាយបដិសេធពីសំឡេងជុំវិញ ឬពាក្យណែនាំផ្សេងៗក្បែរខ្លួនយើង ព្រោះចុងបញ្ចប់ ការសម្រេចចិត្តគ្រប់យ៉ាង គឺនៅលើយើងតែម្នាក់ ។ ការស្តាប់អ្នកដទៃច្រើនពេក នឹងធ្វើឱ្យយើងស្ទាក់ស្ទើរ ហើយសម្រេចចិត្តខុសបាន ។ ចូររៀនបដិសេធយ៉ាងដាច់ខាតពីសំឡេងទាំងនោះ ។
១១-ភាពស្មោះត្រង់រកបានដោយលំបាក ៖ « ភាពស្មោះត្រង់ជាអំណោយដ៏មានតម្លៃថ្លៃ កុំរំពឹងថា នឹងបានវាពីមនុស្សមានតម្លៃថោក » មនុស្សមានតម្លៃថោក មិនមែនសំដៅលើមនុស្សក្រីក្រឡើយ តែនៅទីនេះសំដៅលើអ្នកដែលមិនស្មោះត្រង់ ហើយតែងជួបជាទូទៅក្នុងសង្គម ជាពិសេសក្នុងពិភពអាជីវកម្ម ។ ដូច្នេះ កុំសង្ឃឹមថា មនុស្សគ្រប់រូបនឹងស្មោះត្រង់ជាមួយអ្នក ។
អ្នកអាចជ្រើសរើសសេពគប់មនុស្សស្មោះត្រង់ និងនិយាយការពិតជាមួយអ្នកល្អជាង ព្រោះភាពស្មោះត្រង់រកបានដោយលំបាក បើសិនជាអ្នកជួបហើយ ក៏កុំធ្វើឱ្យខ្លួនឯងបាត់បង់ពួកគេទៅ ។
១២-រៀនគ្រប់គ្រង ៖ « យើងត្រូវគ្រប់គ្រងពេលវេលា និងអ្វីដែលខ្លួនមាន និងមិនអាចឱ្យអ្នកដទៃមកកំណត់ជីវិតរបស់យើងឡើយ » កុំភ្លេចថា ជីវិតជារបស់យើង ហើយយើងជាសសរបង្គោលនៃជីវិតខ្លួនឯង ដូច្នេះ មិនគួរឱ្យអ្នកដទៃមកគ្រប់គ្រងជីវិតយើងទេ ។ រឿងសំខាន់បំផុត គឺការមានអំណាចគ្រប់គ្រងគ្រប់យ៉ាងលើខ្លួនឯង ។ ចូរកុំបណ្តោយឱ្យខ្លួនឯងអណ្តែតត្រសែតតាមខ្សែទឹក ជាពិសេស «ពេលវេលា» ព្រោះអ្វីដែលគ្រប់គ្នាមានស្មើៗគ្នាគឺ «ពេលវេលា» ។ វាជាទ្រព្យសម្បត្តិមានតម្លៃបំផុត ដែលយើងគួរប្រើយ៉ាងឆ្លាតវៃផងដែរ ។
ការបំផុសគំនិតខាងលើនេះ នឹងធ្វើឱ្យអ្នកមានកម្លាំងចិត្ត មានពន្លឺនឹងប្រកបមុខជំនួញឱ្យទទួលបានជោគជ័យ ។ មហាសេដ្ឋីជាច្រើនរូបបានអភិវឌ្ឍន៍ខ្លួនពីចំណុចសូន្យ ។ ផ្លូវដើរនេះនៅឆ្ងាយតទៅមុខទៀត ដួលហើយក្រោកវិញ រួចដើរបន្តទៀត និងប្រាប់ខ្លួនឯងជារៀងរាល់ថ្ងៃថា ប្រសិនបើនៅមានដង្ហើម ត្រូវតែទទួលបានជោគជ័យយ៉ាងពិតប្រាកដ ។ អត្ថបទនេះ នឹងជាកម្លាំងចិត្តឱ្យអ្នកទទួលបានភាពជោគជ័យក្នុងជីវិត តួនាទីការងារ និងមុខជំនួញផងដែរ ៕
ចែករំលែកព័តមាននេះ