រាជធានីភ្នំពេញ ៖ រថយន្តឈ្នួល១គ្រឿងបានឈប់ចាប់ម៉ូយនៅលើដងផ្លូវ ហើយអ្នកបើកបរបើកទ្វារចុះអត់មើលក្រោយ ស្របពេលនោះមានយុវជនម្នាក់ជិះម៉ូតូទៅដល់ បណ្ដាលឲ្យប៉ះដួលធ្វើឲ្យរងរបួសធ្ងន់បាក់ដៃម្ខាង បន្ទាប់មកត្រូវបានរថយន្តក្រុមសង្គ្រោះអង្គភាព៧១១ ដឹកយកទៅសង្គ្រោះបន្ទាន់ភ្លាមៗដែរ ។
ឧប្បត្តិហេតុគ្រោះថ្នាក់ចរាចរណ៍ខាងលើនោះបានកើតឡើងកាលពីវេលាម៉ោង១១និង២០នាទីព្រឹកថ្ងៃទី០១ ខែកុម្ភៈ ឆ្នាំ២០១៩ នៅលើកំណាត់ផ្លូវជាតិលេខ៤ ត្រង់ចំណុចមុខហាងនំបុ័ងភ្នំពេញ ស្ថិតនៅក្នុងភូមិព្រៃព្រីងខាងជើង សង្កាត់ចោមចៅ៣ ខណ្ឌពោធិសែនជ័យ រាជធានីភ្នំពេញ ។
យុវជនរងគ្រោះឈ្មោះ ឃុត សំនីន អាយុ២២ឆ្នាំ មុខរបរចុងភៅ មានទីលំនៅភូមិស្វាយអន្ទរ ឃុំពពឹស ស្រុកស្វាយអន្ទរ ខេត្តព្រៃវែង រងរបួសបាក់ដៃស្តាំ ។ ជនរងគ្រោះរូបនេះជិះម៉ូតូ១គ្រឿងម៉ាកហុងដា ZOOMER -X ពណ៌ស ពាក់ស្លាកលេខ ភ្នំពេញ 1DG-9277 ។ ចំណែករថយន្តបង្កម៉ាកសាំយ៉ុង ពណ៌ខៀវ ពាក់ស្លាកលេខកំពុងស្ពឺ 2A – 2795 ជារថយន្តឈ្មួលបើកបរដោយបុរសមិនស្គាល់ឈ្មោះម្នាក់ ។
ចំណែកអ្នកឃើញហេតុការណ៍បានឲ្យដឹងថា នៅមុនពេលកើតហេតុរថយន្តបង្កបានបើកទៅឈប់ចាប់ម៉ូតូនៅមុខហាងលក់នំបុ័ងភ្នំពេញ បន្ទាប់មកអ្នកបើកបរបានបើកទ្វារចុះ ហើយមិនបានមើលក្រោយនោះទេ ។ ស្របពេលនោះជនរងគ្រោះបានជិះម៉ូតូក្នុងទិសដៅពីកើតទៅលិចបានទៅដល់ល្មម ហើយបានវាសគេចមិនទាន់ ក៏ប៉ះដៃចង្កូតបណ្ដាលឲ្យដួលរងរបួសបាក់ដៃម្ខាងតែម្ដង ។
ក្រោយពេលកើតហេតុរថយន្តក្រុមសង្គ្រោះរបស់អង្គភាព៧១១ បានដឹកយកជនរងគ្រោះទៅកាន់មន្ទីរពេទ្យព្រះកុសុមៈ ដើម្បីសង្គ្រោះបន្ទាន់ភ្លាមៗ ។ បន្ទាប់មកនគរបាលចរាចរណ៍ខណ្ឌពោធិ៍សែនជ័យ បានចុះធ្វើការវាស់វែង និងនាំយករថយន្តបង្ក និងម៉ូតូរងគ្រោះទៅរក្សាទុករង់ចាំការដោះស្រាយគ្នានៅពេលក្រោយ ៕
ចែករំលែកព័តមាននេះ