វិនិយោគិនហុងកុងគ្រវីក្បាលដូចគោស្រាំងទិចពីអចលនទ្រព្យជប៉ុន
យោងតាមភ្នាក់ងារសារព័ត៌មាន South China Morning Post ដែលបានចេញផ្សាយកាលពីថ្ងៃទី ២៧ ខែមករា ឆ្នាំ២០១៩ កន្លងមកបានឲ្យដឹងថា…
យោងតាមភ្នាក់ងារសារព័ត៌មាន South China Morning Post ដែលបានចេញផ្សាយកាលពីថ្ងៃទី ២៧ ខែមករា ឆ្នាំ២០១៩ កន្លងមកបានឲ្យដឹងថា ការរឹតបន្តឹងក្នុងវិស័យផ្តល់សេវាចែករំលែកកន្លែងស្នាក់នៅបានប៉ះពាល់ដល់ការលក់ផ្ទះក្នុងប្រទេសជប៉ុន ។
លោក Michael Cheung ដែលជាអ្នកគ្រប់គ្រងសាខាមួយប្រចាំ Trusty Japan Realty បាននិយាយថា «ឥលូវពួកយើងប្រាប់ដល់អតិថិជនមិនឲ្យគិតគូពីការទិញផ្ទះដើម្បីផ្តល់សេវាចែករំលែកកន្លែងស្នាក់នៅក្នុងប្រទេសជប៉ុន ។ ការជួលរយៈពេលយូរជាជម្រើសល្អជាងគេវិញ» ។
ច្បាប់ថ្មីបានបង្ខំឲ្យកម្មវិធីចែករំលែកកន្លែងស្នាក់នៅប្រចាំប្រទេស Airbnb ឲ្យលុបការលក់រាប់ពាន់ក្នុងប្រទេស ។ ច្បាប់ថ្មីនេះមានគោលដៅគ្រប់គ្រង និងរក្សាគុណភាពសេវាកម្មផ្តល់កន្លែងស្នាក់នៅព្រោះតែចំនួនភ្ញៀវទេសចរដែលទៅកាន់ប្រទេសជប៉ុនកើនឡើងពី ១៩% មកស្មើ ២៨.៧លាននាក់កាលពីឆ្នាំ ២០១៧ ។
អ្នកដែលផ្តល់សេវាកម្មចែករំលែកកន្លែងស្នាក់នៅត្រូវទទួលបានការអនុញ្ញាតពីរដ្ឋាភិបាលក្នុងតំបន់ ហើយពួកគេអាចចែករំលែកកន្លែងស្នាក់នៅរបស់ពួកគេបានតែ១៨០ថ្ងៃប៉ុណ្ណោះក្នុងមួយឆ្នាំ ។ ជាមួយគ្នានេះផងដែរ ពួកគេជួបនឹងឧបសគ្គដទៃទៀតដូចជាផ្ទះនៅ Kyoto អាចផ្តល់សេវាកម្មនេះក្នុងកំឡុងតែពាក់កណ្តាលខែមករាដល់ពាក់កណ្តាលខែមិនាប៉ុណ្ណោះ ។
យោងទៅតាមភ្នាក់ងារវិស័យទេសចរណ៍ជប៉ុនបានឲ្យដឹងថា កន្លងមកនេះមានអ្នកដាក់ពាក្យសុំការអនុញ្ញាតផ្តល់សេវាកម្មចែករំលែកន្លែងស្នាក់នៅប្រមាណ ២,៧០៧ ក្រោមច្បាប់ថ្មី និងក្នុងនោះមាន ១,១៣៤ ដែលទទួលបានការអនុញ្ញាត ។
គួរបញ្ជាក់ដែរថា ការទិញផ្ទះ និងជួលចេញជាការចែករំលែកកន្លែងស្នាក់នៅរយៈពេលខ្លីក្នុងប្រទេសជប៉ុនអាចរកប្រាក់ចំណេញប្រមាណដល់ទៅ ១០%ឯណោះ ដែលធ្វើឲ្យទាក់ទាញវិនិយោគិនហុងកុងជាច្រើន ។
ប៉ុន្តែភ្នាក់ងារ TY-Property របស់ហុងកុងបាននិយាយថា ចំណាប់អារម្មណ៍រយៈពេលវែងរបស់វិនិយោគិនហុងកុងលើអចលនទ្រព្យជប៉ុនមិនទទួលរងការប៉ះពាល់ទេ ព្រោះពួកគេនៅតែអាចរកប្រាក់ចំណេញបានខ្ពស់ជាងក្នុងទីក្រុងខ្លួន ៕
ចែករំលែកព័តមាននេះ