ខេត្តក្រចេះ ៖ សេចក្តីរាយការណ៍បានឱ្យដឹងថា ករណីផ្ទុះអាវុធមួយយ៉ាងញាក់សាច់ក្នុងវង់ផឹកស៊ីមួយ ដែលជនដៃដល់ គឺជាមន្ត្រីយោធាម្នាក់ ដោយមានចេតនាបាញ់សម្លាប់ទៅលើមន្ត្រីយោធាដូចគ្នាម្នាក់ ក្រោយកើតមានទំនាស់ត្រឹមពាក្យសម្តីគ្នាតិចតួច ។ ក្រោយបង្កហេតុ ជនដៃដល់ក៏បានគេចខ្លួនបាត់ស្រមោល កើតឡើងកាលពីល្ងាចថ្ងៃទី៣១ មករា ស្ថិតក្នុងរោងចម្ការមួយកន្លែង ភូមិអូរគគី ឃុំអូរគ្រៀង ស្រុកសំបូរ ។
សេចក្តីរាយការណ៍បន្តថា ជនសង្ស័យខាងលើត្រូវគេស្គាល់ ឈ្មោះ សៀង សុណាត ជាមន្ត្រីយោធាស្រុកសំបូរ ។ រីឯជនរងគ្រោះ ឈ្មោះសាន សាមាន ជាមន្ត្រីយោធាខេត្តក្រចេះ ហើយទំនាស់ពាក្យសម្តីរវាងពួកគេគឺជារឿងដែលមិននឹកស្មានដល់ ។
បើតាមលោកអធិការនគរបាលស្រុកសំបូរ លោកវរសេនីយ៍ឯក ប៊ុន ឈឿន បានប្រាប់កោះសន្តិភាពថា ជនបង្កពេលនេះបានគេចខ្លួនបាត់ ជាមួយកាំភ្លើងអាកា១ដើម ។ បើតាមការពិនិត្យនៅកន្លែងកើតហេតុ ដឹងពីមូលហេតុបឋម ដែលឈានឱ្យមានការបាញ់ប្រហារនេះ គឺមិនមានអ្វីជាដុំកំភួននោះទេ គឺផ្តើមដោយសារទំនាស់ពាក្យសម្តីផឹកស៊ីតិចតួចប៉ុណ្ណោះ ។
លោកបន្តថា ក្នុងដែលស្រវឹងស្រាខ្លាំងក៏កើតជាទំនាស់មួយ ហើយជនដៃដល់បានយកកាំភ្លើងអាកាមកបាញ់ជនរងគ្រោះមួយគ្រាប់ដួលផ្កាប់មុខនៅលើតុ ។ បើមើលលើខ្លួនជនរងគ្រោះ ឃើញគ្រាប់កាំភ្លើងបាញ់ធ្លុះចេញមកក្រៅ ។ ពេលភ្លាមៗ ជនរងគ្រោះស្ថិតក្នុងអាការៈរងរបួសធ្ងន់ ហើយបានបញ្ជូនទៅសង្គ្រោះនៅប្រទេសវៀតណាមហើយ ។
ចែករំលែកព័តមាននេះ