ខេត្តកំពត ៖ តាមសេចក្តីរាយការណ៍ព័ត៌បឋមបានឱ្យដឹងថា មានករណីឃាតកម្មសម្លាប់បុរសម្នាក់ដោយជនមិនស្គាល់មុខ កាលពីវេលាម៉ោង៨និង៣០នាទីយប់ថ្ងៃទី៣១ ខែមករា ឆ្នាំ ២០១៩ នៅភូមិព្រៃពាយ
ឃុំត្រពាំងភ្លាំង ស្រុកឈូក ខេត្តកំពត ត្រង់ចំណុចស្រែព្រៃ ។
ក្រោយពីបានទទួលព័ត៌មានខាងលើ លោកឧត្តមសេនីយទោ ម៉ៅ ចន្ទ័មធុរិទ្ឋ ស្នងការខេត្តបានបញ្ជា
កលាំងនគរបាលព្រហ្មទណ្ឌកំរិតធ្ងន់ បច្ចេកទេសនិងកំលាំងអធិការដ្ឋាននគរបាលស្រុកឈូក បានចុះដល់កន្លែងកើតហេតុនៅវេលាម៉ោង១០និង៣០នាទីយប់ថ្ងៃដដែល ហើយបានធ្វើការស្រាវនិងពិនិត្យរកឃើញថា ករណីឃាតកម្មលើជនរងគ្រោះឈ្មោះ អ៊ួន វណ្ណា ភេទប្រុស អាយុ៤៨ ឆ្នាំ នៅចំណុចកើតហេតុខាងលើ ដោយសមត្ថកិច្ចពុំបានបញ្ជាក់ពីទីលំនៅពិតប្រាកដរបស់ជនរងគ្រោះថារស់នៅភូមិ ឃុំ ឬស្រុកណានោះទេ គ្រាន់តែបញ្ជាក់ថាជនរងគ្រោះស្នាក់នៅកន្លែងកើតហេតុតែប៉ុណ្ណោះ។
សមត្ថកិច្ចជំនាញបច្ចេកទេសឲ្យដឹងទៀតថា នៅលើកសពជនរងគ្រោះមានស្នាមរបួសបែកក្បាលពីក្រោយជាច្រើនកន្លែង និងរហែកមាត់ខាងឆ្វេង សមត្ថកិច្ចសន្និដ្ឋានថា ជនរងគ្រោះអាចស្លាប់មុនសមត្ថកិច្ចចុះមកពិនិត្យប្រមាណជាង១០ម៉ោងមុន គឺជនរងគ្រោះអាចស្លាប់នៅព្រឹកថ្ងៃទី៣១ មករា ២០១៩ មកម្ល៉េះ។
សមត្ថកិច្ចបានបញ្ជាក់ថា ជនរងគ្រោះបានទៅធ្វើចំការនៅដីខាងលើ (ជាកន្លែងកើតហេតុ) គឺក្នុងព្រៃជ្រៅ ហើយតំបន់នោះក៏ធ្លាប់មានទំនាស់រឿងដីធ្លីជាយូរមកហើយផងដែរ ដែលកន្លងមកពុំទាន់មានដំណោះស្រាយបានចប់សព្វគ្រប់នៅឡើយទេ។ ជុំវិញករណីឃាតកម្មខាងលើ សមត្ថកិច្ចជំនាញកំពុងធ្វើការស្រាវជ្រាវដើម្បីវែកមុខរកឃាតករ ដើម្បីចាប់យកមកផ្តន្ទាទោសតាមច្បាប់ ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ