រាជធានីភ្នំពេញ ៖ បុរសម្នាក់ស្រវឹងជោកបានបើកបររថយន្តមួយគ្រឿងក្នុងល្បឿនយ៉ាងលឿនហើយរេចង្កូតបុកខឿនរង្វង់មូល បណ្តាលអោយហោះផ្លោះរងការខូចខាតយ៉ាងដំណំ ហេតុការណ៍នេះបានកើតឡើងកាលពីវេលាម៉ោង១០និង៥០នាទីយប់ថ្ងៃទី៣១ ខែកុម្ភៈ ឆ្នាំ២០១៩ តាមបណ្តោយផ្លូវបេតុងនៅចំណុចរង្វង់មូល ស្ថិតក្នុងសង្កាត់ជ្រោយចង្វារ ខណ្ឌជ្រោយចង្វារ ។
សាក្សីដែលឃើញហេតុការណ៍បានអោយដឹងថា មុនពេលកើតហេតុ គេបានឃើញបុរសម្នាក់បើកបររថយន្តមួយគ្រឿងម៉ាកកូរ៉ូឡា ពណ៌ខៀវចាស់ ពាក់ស្លាកលេខ ភ្នំពេញ ២D-២២០៩ ធ្វើដំណើរតាមបណ្តោយផ្លូវបេតុង ក្នុងទិសដៅពីជើងទៅត្បូង លុះមកដល់ចំណុចកើតហេតុខាងលើនេះ ដោយសារតែអ្នកបើកបររថយន្តស្រវឹងជោក បើកបរក្នុងល្បឿនយ៉ាងលឿនមិនបានប្រយ័ត្ន ងោកមួយភាំងក៏រេចង្កូតទៅបុកខឿនរង្វង់មូលពេញទំហឹងបណ្តាលអោយរថយន្តហោះរំលងទៅផ្លូវម្ខាងទៀតរងការខូចខាតបែកកង់ខាងមុខផ្នែកខាងឆ្វេងផ្ទុះពោងទាំងសងខាង រួមថែមទាំងបែកកញ្ចក់ខាងមុខ ភ្លាមៗនោះដែលអ្នកបើកបររថយន្តបានទុករថយន្តចោល ហើយរត់គេចខ្លួនបាត់ស្រមោល ។
ក្រោយពេលកើតហេតុ រថយន្តបង្កខាងលើត្រូវបានសមត្ថកិច្ចធ្វើការវាស់វែងស្ទូចយកទៅរក្សាទុកនៅការិយាល័យចរាចរណ៍ផ្លូវគោករងចាំដោះស្រាយគ្នានៅពេលក្រោយទៀត៕
ចែករំលែកព័តមាននេះ