ខេត្តស្វាយរៀង ៖ គិតមកដល់ថ្ងៃទី៣១ មករា ឆ្នាំ២០១៩ ប្រជាពលរដ្ឋដែលមានជាប់សែស្រឡាយកាត់ចិននាំគ្នាមកទិញគ្រឿងសែននិងម្ហូបសម្រាប់សែនដកជើងធូប ដើម្បីត្រៀមក្នុងឱកាសចូលឆ្នាំប្រពៃណីចិន-វៀតណាមខាងមុខនេះឃើញថា ច្រើនជាងឆ្នាំកន្លងទៅ ទាំងការដាក់លក់ទំនិញ និងផ្កាភ្ញីជាដើម ។
មិនដល់មួយសប្តាហ៍ទៀតទេ ថ្ងៃបុណ្យចូលឆ្នាំថ្មីប្រពៃណីជាតិចិន-វៀតណាមនឹងចូលមកដល់ហើយ បើយើងសង្កេតមើលតាមបណ្តាផ្សារទីប្រជុំជនក្រុង-ស្រុកនានានៃខេត្តស្វាយរៀងមានការដាក់តាំងលក់គោម ក្រដាសសែន និងបណ្តាពាក្យស្លោកដែលយកបិទតាំងលម្អរតាមគេហដ្ឋាន និងគ្រឿងឧបភោគបរិភោគចម្រុះជាច្រើនមុខទៀតដាក់លក់ក្នុងឱកាសបុណ្យចូលឆ្នាំថ្មីប្រពៃណីចិន-វៀតណាម។
លោកម៉ែន វិបុល អភិបាលខេត្តស្វាយរៀង បានអំពាវនាវដល់បងប្អូនប្រជាពលរដ្ឋទាំងអស់ដែលជាប់សែស្រឡាយចិន-វៀតណាមបង្កើនការប្រុងប្រយ័ត្នខ្ពស់ចំពោះគ្រោះអគ្គីភ័យនាឱកាសសែនព្រេនថ្ងៃចូលឆ្នាំថ្មីប្រពៃណីចិន-វៀតណាមដែលមានរយៈពេល៤ថ្ងៃ ចាប់ពីថ្ងៃទី៤-៥-៦-៧ ខែកុម្ភៈ ឆ្នាំ២០១៩ខាងមុខនេះ។
ក្នុងនាមប្រធានគណៈបញ្ជាការឯកភាពខេត្ត លោក ម៉ែន វិបុល អភិបាលខេត្តស្វាយរៀងបានធ្វើការអំពាវនាវដល់បងប្អូនប្រជាពលរដ្ឋទាំងអស់ត្រូវមានការប្រុងប្រយ័ត្នខ្ពស់ចំពោះគ្រោះអគ្គីភ័យដែលអាចកើតមានឡើងជាយថាហេតុ ជាពិសេសភ្លើងធូប ភ្លើងទៀន ភ្លើងចង្ក្រាន ភ្លើងអគ្គីសនី និងការដុតក្រដាសសែនព្រេនជាដើម និងត្រូវចូលរួមគោរពច្បាប់ចរាចរណ៍ផ្លូវគោក រាល់ពេលធ្វើដំណើរត្រូវពាក់មួកសុវត្ថិភាព បើកបររថយន្តត្រូវដាក់ខ្សែក្រវាត់ និងរាល់ពេលបើកបរកុំពិសារគ្រឿងស្រវឹង នឹងត្រូវចៀសវាងអោយឆ្ងាយពីគ្រឿងញៀន៕
ចែករំលែកព័តមាននេះ