ខេត្តមណ្ឌលគិរី ៖ លោក ស្វាយ សំអ៊ាង បានសម្ដែងនូវការសោកស្ដាយចំពោះព្រឹត្តិការណ៍ដែលបានកើត ឡើងកាលពីថ្ងៃទី៣១ ខែមករា ឆ្នាំ២០១៩ លោកអភិបាលខេត្តមណ្ឌលគិរី…
ខេត្តមណ្ឌលគិរី ៖ លោក ស្វាយ សំអ៊ាង បានសម្ដែងនូវការសោកស្ដាយចំពោះព្រឹត្តិការណ៍ដែលបានកើត ឡើងកាលពីថ្ងៃទី៣១ ខែមករា ឆ្នាំ២០១៩ លោកអភិបាលខេត្តមណ្ឌលគិរី បានដឹកនាំគណៈបញ្ជាការឯកភាពខេត្តចុះទៅពិនិត្យទីតាំងកើតហេតុដោយផ្ទាល់ ករណីខ្មាន់កាំភ្លើងប្រដាប់ដោយអាវុធអាកា បាញ់រះមកលើក្រុមអនុវត្តច្បាប់នៃដែនជម្រកសត្វព្រៃស្រែពក ហើយបានបណ្ដាលឲ្យមន្ត្រីឧទ្យានុរក្ស ចំនួន០១រូបរងរបួស ត្រូវបានដឹកយកទៅសង្គ្រោះភ្លាមៗ នៅមន្ទីរពេទ្យកាល់ម៉ែតក្នុងរាជធានីភ្នំពេញ ។
លោកស្វាយ សំអ៊ាង ក៏ឆ្លៀតយកឱកាសនេះជួបសំណេះសំណាលជាមួយមន្ត្រីឧទ្យានុរក្សដែន ជម្រកសត្វព្រៃស្រែពក និងកម្លាំងនគរបាលរបស់ស្នងការដ្ឋាននគរបាលខេត្តកម្លាំងប្រតិបត្តិការសឹករងខេត្ត ភ្នាក់ងារល្បាតសហគមន៍ និងក្រុមការងាររបស់អង្គការ WWF ដែលធ្វើកិច្ចការ និងគាំទ្រទៅលើផ្នែកបច្ចេកទេស នៅក្នុងដែនជម្រកសត្វព្រៃស្រែពកនេះផងដែរ ។
លោកអភិបាលខេត្តបានមានប្រសាសន៍សង្កត់ធ្ងន់ថា ក្នុងនាមគណៈបញ្ជាការឯកភាពខេត្ត គឺឯកឧត្ដមមិនគាំទ្រជាដាច់ខាតនូវក្រុមអនាធិបតេយ្យ ដែលបង្កជាបញ្ហា និងមានចរិតលក្ខណៈ កាចសាហាវដែលបានបាញ់រះមកលើសមត្ថកិច្ច ជាពិសេសមន្ត្រីឧទ្យានុរក្ស និងមន្ត្រីរួមសហការ ដែលកំពុងដើរល្បាត ។ ជាវិធានការ គឺគណៈបញ្ជាការឯកភាពខេត្តបានបង្កើតគណៈកម្មការ ដើម្បីស្រាវជ្រាវរកជនប្រព្រឹត្ត និងអ្នកពាក់ព័ន្ធនឹងសកម្មភាពផ្ទុះអាវុធនេះ ដើម្បីកសាងសំណុំរឿងបញ្ជូនទៅតុលាការផ្តន្ទាទោសតាមច្បាប់ឲ្យខាងតែបាន ។
អភិបាលខេត្ត ក៏បានបង្ហាញអំពីទស្សនៈ និងសុទ្ធិដ្ឋិនិយម រួមទាំងកិច្ចគាំទ្រចំពោះសក្ដានុ ពលធនធានធម្មជាតិ ដើម្បីទាក់ទាញភ្ញៀវទេសចរ ជាពិសេស គឺកត្តាអំណោយផលទៅ លើអាកាសធាតុនៅក្នុងខេត្តមណ្ឌលគិរីនេះ ។ លោកបានឆ្លៀតយកឱកាសនេះ ជំរុញ និងលើកទឹកចិត្តដល់មន្ត្រីឧទ្យានុរក្សរបស់មន្ទីរបរិស្ថាន និងកម្លាំងសហការទាំងអស់ត្រូវមានសាមគ្គីភាពគ្នា និងបន្តកិច្ចខិតខំប្រឹងប្រែង ដើម្បីការពារ និងអភិរក្សធនធានធម្មជាតិ និងសត្វព្រៃ ៕
ចែករំលែកព័តមាននេះ