មេឃុំព្រៃស្វាយ…ជួបគ្រោះថ្នាក់រហូតបាត់បង់ជីវិត
- បាត់ដំបង
ខេត្តបាត់ដំបង ៖ លោកនូវ វ៉ិត ដែលគេស្គាល់ថា ជាមេឃុំព្រៃស្វាយ ស្រុកមោងប្ញស្សី ត្រូវរថយន្តបុកស្លាប់ កាលពីវេលាម៉ោង០៦ និង១៥នាទីព្រលប់ថ្ងៃទី៣១…
ខេត្តបាត់ដំបង ៖ លោកនូវ វ៉ិត ដែលគេស្គាល់ថា ជាមេឃុំព្រៃស្វាយ ស្រុកមោងប្ញស្សី ត្រូវរថយន្តបុកស្លាប់ កាលពីវេលាម៉ោង០៦ និង១៥នាទីព្រលប់ថ្ងៃទី៣១ មករា ស្ថិតនៅលើផ្លូវជាតិលេខ៥ ត្រង់ចំណុចភូមិព្រៃស្វាយ ឃុំព្រៃស្វាយ ស្រុកមោងឫស្សី ។ នេះបើតាមសេចក្ដីរាយការណ៍ពីសមត្ថកិច្ចមូលដ្ឋាន ។
សមត្ថកិច្ចបានឱ្យដឹងថា លោកនូវ វ៉ិត អាយុ៦៤ឆ្នាំ មានតួនាទីជាមេឃុំព្រៃស្វាយ ស្រុកមោងប្ញស្សី។ គាត់បានជិះម៉ូតូមកពីចំការតាមផ្លូវលំមួយ លុះមកដល់ចំណុចខាងលើ ក៏បានឡើងលើផ្លូវជាតិលេខ៥ រួចបត់ស្ដាំឆ្ពោះទៅផ្ទះគាត់ ក៏ត្រូវរថយន្តមកពីក្រោយក្នុងទិសដៅស្របគ្នាបុកពេញទំហឹងតែម្ដង។ រថយន្តនោះ ម៉ាកតូយូតា សីុណា ពណ៌.សពាក់ផ្លាកលេខ ភ្នំពេញ 2AE.6411 អ្នកបេីកបរបានរត់គេចខ្លួនក្រោយពេលជួបគ្រោះថ្នាក់ ។
បើតាមការពិនិត្យកន្លែងកើតហេតុ និងយោងតាមការបំភ្លឺនានាពីសាក្សីផងបានឲ្យដឹងថា លោកនូវ វ៉ិត ពេលព្យាយាមជិះឡើងលើផ្លូវជាតិ ទំនងមិនបានពិនិត្យមើលឆ្វេងស្ដាំឲ្យបានច្បាស់លាស់ជាមុនទេទើបពេលជិះឡើងលើផ្លូវហើយបត់ស្ដាំបានបន្តិច ក៏ត្រូវរថយន្តមកពីក្រោយបុកតែម្ដង ។ សមត្ថកិច្ចបានប្រាប់ថា ពេលត្រូវរថយន្តបុកភ្លាម ជនរងគ្រោះបានរងរបួសយ៉ាងធ្ងន់ តែគាត់បានស្លាប់ពេលបញ្ជួនដល់មន្ទីរពេទ្យបង្អែកស្រុកមោងប្ញស្សី។
សមត្ថកិច្ចបានបញ្ជាក់ដែរថា នេះជាការធ្វេសប្រហែស ដែលជនរងគ្រោះជិះម៉ូតូឡើងលើផ្លូវជាតិខ្វះការប្រុងប្រយ័ត្ន មិនមើលឆ្វេងស្ដាំឲ្យបានច្បាស់លាស់ជាមុន ទើបបណ្ដាលឲ្យជួបគ្រោះថ្នាក់ធ្ងន់ធ្ងរដល់ជីវិតបែបនេះ ។
ចែករំលែកព័តមាននេះ