រាជធានីភ្នំពេញ ៖ តាមរយៈស្ថានទូតសហរដ្ឋអាមេរិកប្រចាំកម្ពុជា អាមេរិកបានផ្ដល់ថវិកាចំនួន១៧,១លានដុល្លារអាមេរិក ក្នុងគម្រោង អភិវឌ្ឍន៍វិស័យវារីវប្បកម្មកម្ពុជា សម្រាប់និរន្តរភាពពាណិជ្ជកម្មកម្ពុជា និងជាការជួយដល់សហគមន៍កសិករ ដែលនៅតំបន់អភិវឌ្ឍន៍វិស័យមួយនេះ ។
នៅក្នុងពិធីប្រកាសបើកអនុវត្តន៍គម្រោងដែលផ្ដល់ដោយសហរដ្ឋអាមេរិក កាលពីរសៀលថ្ងៃទី ៣១ មករា ២០១៩ នៅសណ្ឋាគារកាំបូឌីយ៉ាណា លោក Michael A. Newbill ភារធារីស្ថានទូតអាមេរិក បានមានប្រសាសន៍ថា សហរដ្ឋអាមេរិកគាំទ្រឧស្សាហកម្មកសិកម្ម របស់ប្រទេសកម្ពុជា នៅក្នុងផ្នែកជាច្រើន ជាក់ស្ដែងទីភ្នាក់ងារសហរដ្ឋអាមេរិក សម្រាប់ការអភិវឌ្ឍន៍អន្តរជាតិរបស់អាមេរិក កំពុងតែជួយកម្ពុជា ដើម្បីកែលំអផលិតផលស្វាយចន្ទី និងស្វាយ ហើយកំពុងផ្ដល់ជំនួយបច្ចេកទេស លើការធ្វើផែនការជាយុទ្ធសាស្ត្រ និងច្បាប់ស្ដីពីកុងត្រា ទាក់ទងនឹងការធ្វើកសិកម្ម ក្នុងចំណោមគម្រោងកសិកម្ម និងស្បៀងអាហារដទៃជាច្រើនទៀត ។
លោកបន្តថា គម្រោងអភិវឌ្ឍន៍វារីវប្បកម្ម សម្រាប់និរន្តរភាពពាណិជ្ជកម្ម នៅប្រទេសកម្ពុជា ហៅកាត់ថា CAST បានទទួលការឧបត្តម្ភថវិកាពីកម្មវិធីអាហារសម្រាប់ភាពជឿលឿន របស់ក្រសួងកសិកម្មសហរដ្ឋអាមេរិក ។
កម្មវិធីមួយនេះ បានជួយប្រទេសនានាដូចជាប្រទេសកម្ពុជា ក្នុងការធ្វើទំនើបកម្មនិងពង្រឹងវិស័យកសិកម្មរបស់គេ ដោយលើកកម្ពស់ផលិតភាពកសិកម្ម ហើយពង្រីកពាណិជ្ជកម្មនៃផលិតផលកសិកម្ម ។
លោកថា «គម្រោងCAST បង្កើតឡើងក្នុងគោលបំណង បង្កើតផលិតកម្មវារីវប្បកម្ម ស្របតាមគោលនយោបាយរបស់ក្រសួងកសិកម្មកម្ពុជា ហើយនឹងជួយកែលម្អជីវភាពរស់នៅរបស់ប្រជាជនកម្ពុជា ។ មួយវិញទៀតនោះ វានឹងកាត់បន្ថយផងដែរ នូវសម្ពាធទៅលើការចាប់ត្រីធម្មជាតិ ដែលនៅពេលបច្ចុប្បន្ននេះ ត្រូវ៧៦ភាគរយនៃផលិតកម្មត្រីសរុប» ។
លោកវេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ បានមានប្រសាសន៍ផងដែរថា ថវិកាជាង១៧លានដុល្លារអាមេរិកនេះ នឹងត្រូវអនុវត្តន៍នៅតាមខេត្តចំនួន៥នៅក្នុងប្រទេសកម្ពុជា ក្នុងរយៈពេល៥ឆ្នាំ ចាប់ពីឆ្នាំ ២០១៩ ដល់ឆ្នាំ ២០២៤ ដោយបែងចែកទៅតាមសហគមន៍នីមួយៗ ដែលមានអាទិភាព ក្នុងការអភិវឌ្ឍន៍វារីវប្បកម្ម ។
លោកថា « តាមរយៈគម្រោងនេះ នឹងធ្វើអោយប្រឡើងនូវជីវភាពពលរដ្ឋ ក្នុងសហគមន៍ និងអាចផ្គត់ផ្គង់ផលិតកម្មត្រីនៅលើទីផ្សារប្រទេសកម្ពុជា និងឈានទៅរកការនាំចេញ ទៅកាន់ទីផ្សារអន្តរជាតិផងដែរ » ។
លោកបន្តថា ការចិញ្ចឹមត្រីពិតជាមានសារៈសំខាន់ណាស់ និងជាការចូលរួមចំណែកដ៏សំខាន់ក្នុងវិស័យសេដ្ឋកិច្ច ពីព្រោះនៅបណ្ដាប្រទេសជិតខាងនេះបានយកការចិញ្ចឹមត្រីនេះ ជាលក្ខណៈគ្រួសារ និងពាណិជ្ជកម្ម ។
លោកថា «ការចិញ្ចឹមត្រី នឹងបង្កើនចំណូលច្រើនជាងការធ្វើស្រែ ជាក់ស្ដែង បើសិនជាមានដី១ហិចតាដូចគ្នា ការចិញ្ចឹមត្រី អាចរកចំណូលបានជាង១ម៉ឺនដុល្លារ ខណៈការធ្វើស្រែ បានចំនូលមិនដល់១ពាន់ដុល្លារអាមេរិកនោះទេ ដូច្នេះ វាមានភាពខុសគ្នាច្រើន » ។
លោកបន្តទៀតថា នៅក្នុងវិស័យវារីវប្បកម្មនេះ មានដៃគូរកម្ពុជា ជាច្រើនបានជួយអភិវឌ្ឍន៍ទាំងបច្ចេកទេស និងធនធានជាក់ស្ដែងសហភាពអឺរ៉ុបក៏បានជួយកម្ពុជា មួយចំនួនផងដែរ សម្រាប់អភិវឌ្ឍន៍វារីវប្បកម្ម ដែលធ្វើអោយនាំចូលផលិតផលវារីវប្បកម្មពីបរទេសបានកាត់បន្ថយបន្តិចម្ដងៗ ។ ក្នុងរយៈប្រមាណ៥ឆ្នាំមុនកម្ពុជា នាំចូលដល់ជាង៦ម៉ឺនតោន ហើយបានធ្លាក់មកនៅត្រឹម៤ម៉ឺនតោន និងបន្តធ្លាក់មកនៅត្រឹមជាង២ម៉ឺន៤តោនតោន ក្នុងឆ្នាំ ២០១៨កន្លងទៅនេះ ។
ម្យ៉ាងទៀត ផលិតផលវារីវប្បកម្មដែលបាននាំចូលនៅឆ្នាំ ២០១៨កន្លងទៅនេះ ភាគច្រើនវាជា ប្រភេទក្ដាម បង្កង បង្គារ និងត្រីសាលម៉ុនជាដើម ចំណែកត្រីប្រភេទទឹកសាប បានធ្លាក់ចុះខ្លាំង ដោយសារតែកំណើននៃការផ្គត់ផ្គង់ក្នុងស្រុកបានកើនឡើងខ្ពស់ ។
គួរបញ្ជាក់ថា បើយោងទៅតាមស្ថានទូតសហរដ្ឋអាមេរិក ដែលម្ចាស់ជំនួយក្នុងគម្រោង CAST បានអោយដឹងខេត្តចំនួន៥នឹងទទួលបានថវិកាសម្រាប់អភិវឌ្ឍន៍វារីវប្បកម្ម ក្នុងនោះរួមមាន ខេត្តកណ្ដាល ខេត្តកំពង់ចាម ខេត្តកំពង់ធំ ខេត្តសៀមរាប ខេត្តបាត់ដំបង និងខេត្តពោធិ៍សាត់ ហើយចំណែកភ្នំពេញនិងខេត្តសៀមរាប កំពុងស្ថិតនៅក្នុងការពិចារណា អនុវត្តន៍គម្រោងមួយនេះដែរ ៕
ចែករំលែកព័តមាននេះ