បន្ទាយមានជ័យ ៖ រណ្តៅដីធំៗដែលប្រភេទរណ្តៅយក្សជិត១០កន្លែងអនាគតក្លាយជាទន្លេបឹង ជាទន្លេ ដែលប្រជាពលរដ្ឋកំពុងមានការព្រួយបារម្ភគ្រោះថ្នាក់កើតឡើង ដែលស្ថិតភូមិកងវ៉ា សង្កាត់កំពុងស្វាយ ក្រុងសិរីសោភ័ណ ។
ជាក់ស្តែងនៅល្ងាចថ្ងៃទី៣១ ខែមករា ឆ្នាំ២០១៩ នៅចំណុចខាងជើងភ្នំកងវ៉ា ប្រមាណជាង៥០០ម៉ែត្រ ឃើញមានរណ្តៅដីមួយកន្លែងកំពុងធ្វើសកម្មភាពជីកដែលមានទំហំជិត៥០០ម៉ែត្របួនជ្រុង ហើយជម្រៅជិត៣០ម៉ែត្រ ដែលមានគ្រឿងចក្រអ៊ែស្កា២ទៅ៣គ្រឿង កំពុងធ្វើសកម្មភាពកាយ និងរថយន្តចូលដឹកដីយ៉ាងគគ្រឹកគគ្រេង ។ ហើយនៅចំណុចភូមិកងវ៉ាគេឃើញមានរណ្តៅដែលឈ្មួញធ្វើសកម្មភាពជីកដីលក់មានប្រមាណជិត១០រណ្តៅជាប់គ្នាដែលសកម្មភាពជីកទាំងថ្មី និងចាស់ ។
ប្រជាពលរដ្ឋភូមិកងវ៉ាបានប្រាប់ថា សកម្មភាពឈ្មួញជីកដីក្នុងភូមិកងវ៉ា សង្កាត់កំពង់ស្វាយក្រុងសិរីសោភ័ណនេះ គឺធ្វើសកម្មភាពជីកជាយូរមកហើយ រហូតទល់ពេលនេះដែលមានរណ្តៅដីដែលជីកចាស់ និងថ្មីជិត១០រណ្តៅ ជាប្រភេទរណ្តៅធំ និងជម្រៅជ្រៅអាចថា នៅពេលអនាគតក្រសួងជំនាញ និងខេត្ត-ក្រុងគ្មានវិធានការទេ អាចថា ក្លាយជាទន្លេជាបឹងយក្សមិនខានឡើយ ឬជាបឹងមរណៈ ។
ប្រជាពលរដ្ឋបានបញ្ជាក់ថា កាលពីមុនឃើញសកម្មភាពជីកដីនៅក្បែររណ្តៅចាក់សំរាម ដែលធ្វើសកម្មភាពជីកជុំវិញកន្លែងចាក់សំរាមប្រមាណជាង៤ទៅ៥រណ្តៅ ដែលមានទំហំប្រមាណជា២០០ ទៅ៣០០ម៉ែត្រ ហើយជម្រៅជិត៣០ម៉ែត្រ ។ ក្រោយពេលសកម្មភាពជីករណ្តៅក្បែរចាក់សំរាមជីរណ្តៅអស់កន្លែងជីកឃើញសកម្មភាពជីកបន្តនៅខាងជើងភ្នំកងវ៉ា ទំហំប្រមាណជិត៥០០ម៉ែត្របួនជ្រុង និងជម្រៅប្រមាណជិត៣០ម៉ែត្រ ហើយប្រជាពលរដ្ឋនៅភូមិកងវ៉ាកំពុងមានការព្រួយបារម្ភកូនចៅ ឬសត្វពាហណ និងហានីភ័យកើតឡើង នៅពេលណាមួយព្រោះសកម្មភាពជីករណ្តៅជិត១០កន្លែងធំៗហើយជម្រៅជ្រៅ ។
លោក នាង ហាវ អភិបាលរងក្រុងសិរីសោភ័ណបានប្រាប់នៅល្ងាចថ្ងៃទី៣១ ខែមករា ឆ្នាំ២០១៩នេះថា សកម្មភាពជីករណ្តៅដីនៅចំណុចភូមិកងវ៉ានោះ លោកដូចជា មិនបានដឹងព័ត៌មាននៅឡើយ ក្រោយពេលទទួលព័ត៌មានហើយលោកដឹកនាំមន្ត្រីជំនាញ និងអាជ្ញាធរចុះទៅពិនិត្យមើលអោយបានដឹងច្បាស់ ។
លោក ស៊ុត វឌ្ឍនា ប្រធានមន្ទីររ៉ែ និងថាមពលខេត្តបន្ទាយមានជ័យបានបញ្ជាក់ប្រាប់ថា នៅខេត្តបន្ទាយមានជ័យ គឺមានច្បាប់អនុញ្ញាតិអោយក្រុមហ៊ុន ឬម្ចាស់ធ្វើអាជីកម្មជីករណ្តៅដីលក់ដោយបានធ្វើច្បាប់តាមរយៈច្រកចេញចូលតែមួយ ទាំងច្បាប់កាយរណ្តៅធំ និងតូចដែលមានក្រុមហ៊ុនឡាចហ៊ុក កំពុងធ្វើសកម្មភាពកាយនៅចំណុចភូមិកងវ៉ា សង្កាត់កំពង់ស្វាយ ក្រុងសិរីសោភ័ណ ។
លោក អ៊ុ រាត្រី អភិបាលរងខេត្តបន្ទាយមានជ័យបានបញ្ជាក់ថា បញ្ហាជីករណ្តៅដីនេះមិនភារកិច្ចលោកឡើយ គឺមានអភិបាលរងខេត្តម្នាក់ទទួលការងារហើយ ការជីករណ្តៅដីនោះលោកអត់បានដឹងឡើយព្រោះមិនមែនភារកិច្ចលោក ៕
ចែករំលែកព័តមាននេះ