ខេត្តបាត់ដំបង ៖ សមត្ថកិច្ចបានចាប់ខ្លួនបុរសម្នាក់កាលពីរសៀលថ្ងៃទី១ មីនា ក្រោយពីចេញពីមន្ទីរពេទ្យ ខណៈគូបដិបក្សរបស់គេកំពុងស្ថិតក្នុងមន្ទីរពេទ្យនៅឡើយ។ ជននេះត្រូវបានចាប់ខ្លួនពីបទប្រើដាវកាប់ចាក់គ្នាជាមួយសត្រូវរបស់ខ្លួនបណ្តាលឱ្យរបួសដេកដួលរៀងៗខ្លួននៅក្នុងភូមិបាសែត ឃុំតាប៉ុន ស្រុកសង្កែ កាលពីរសៀលថ្ងៃទី២២ កុម្ភៈ ។
ជនដែលសមត្ថកិច្ចចាប់ខ្លួនមុនគូប្រយុទ្ធរបស់ខ្លួននេះឈ្មោះយ៉េប អះម៉ាត់ហៀត ហៅម៉ាប់ ឬម៉ាត់ អាយុ២៧ឆ្នាំ ជាជនជាតិខ្មែរអ៊ិស្លាម រស់នៅភូមិបាសែត ឃុំតាប៉ុន ស្រុកសង្កែរីឯគូបក្ខដិបក្ខដែលរបួសធ្ងន់កំពុងព្យាបាលនៅមន្ទីរពេទ្យនៅឡើយឈ្មោះទុំ លៀង អាយុ២៣ឆ្នាំ រស់នៅភូមិឈុងត្រដក់ ឃុំរកា ស្រុកសង្កែ។ សមត្ថកិច្ចស្រុកសង្កែបាននិយាយថា ជន២នាក់នេះបានប្រើដាវកាប់ចាក់បង្ហូរឈាមគ្នាដើម្បីសងសឹកគំនុំចាស់។ ពួកគេច្បាំងគ្នារហូតរបួសឈាមដាបដេកដួលរៀងខ្លួននៅកន្លែងកើតហេតុ ហើយត្រូវគេជួយបញ្ជូនទៅកាន់មន្ទីរពេទ្យទាំងអស់គ្នា ។
ឈ្មោះយ៉េប អះម៉ាត់ហៀត របួសដៃទាំង២ រីឯឈ្មោះទុំ លៀង របួសក្បាល ដៃ និងពោះធ្ងន់ធ្ងរ។ តាមចំលើយរបស់ឈ្មោះយ៉េប អះម៉ាត់ហៀត ថា គេគ្មានគំនុំជាមួយឈ្មោះទុំ លៀង ទេ ប៉ុន្តែមានគំនុំជាមួយបក្សពួករបស់ជននោះ។ ឈ្មោះទុំ លៀង តែងណាត់កាប់ចាក់គ្នាជាមួយរូបគេមិនឈប់ លុះនៅរសៀលថ្ងៃទី២២ កុម្ភៈ ក៏ប៉ះទង្គិចគ្នាតែម្តង ដោយគេប្រើកាំបិត រីឯឈ្មោះទុំ លៀង ប្រើដាវសាមូរ៉ៃ។
លោកជេត វណ្ណនី ស្នងការរង និងជាប្រធានការិយាល័យកណ្តាលយុត្តិធម៌មានប្រសាសន៍ថា សំណុំរឿងនេះគ្មានដើមបណ្តឹងទេ។ ពួកគេជាជនល្មើសផងជាជនរងគ្រោះផង ព្រោះក្រោយពេលច្បាំងគ្នាពួកគេរបួសទាំង២នាក់ដេកដួលក្នុងថ្លុកឈាមរៀងៗខ្លួន។ លោកបញ្ជាក់ថា សមត្ថកិច្ចរបស់លោក ត្រៀមឃាត់ខ្លួនពួកគេទាំង២នាក់បញ្ជូនទៅតុលាការ ។ ឈ្មោះអះម៉ាត់ហៀត ធូរស្រាលចេញពីមន្ទីរពេទ្យមុនទើបចាត់ការមុន រីឯឈ្មោះលៀង ត្រៀមចាប់បញ្ជូនទៅតុលាការតាមក្រោយ បន្ទាប់ពីគេចេញពីមន្ទីរពេទ្យ ៕
ចែករំលែកព័តមាននេះ