ប្រទេសមីយ៉ាន់ម៉ា ៖ ការសន្យាដ៏យូរលង់មួយអំពីការកែប្រែរដ្ឋធម្មនុញ្ញមីយ៉ាន់ម៉ា ឥឡូវលេចចេញហើយ។ បណ្ដាសមាជិកសភាមីយ៉ាន់ម៉ានៃគណបក្សសម្ព័ន្ធភាពជាតិដើម្បីលទ្ធិប្រជាធិបតេយ្យ របស់លោកស្រីអ៊ួងសាន់ស៊ូជីកាលពីថ្ងៃទី២៩មករា បានបោះឆ្នោតលើញត្តិមួយដើម្បីបង្កើតគណៈកម្មាធិការមួយ សម្រាប់កែប្រែរដ្ឋធម្មនុញ្ញ សំដៅការបោះឆ្នោតទូទៅនាឆ្នាំ២០២០។
ការបោះឆ្នោតលើញត្តិនោះនាំឲ្យពួកយោធា ដែលចាប់តាំងពីរដ្ឋប្រហារឆ្នាំ១៩៦២មក ចាត់ទុកជាអ្នកធានាតែមួយគត់ ដល់ឯកភាពជាតិមានកំហឹង។ ពួកយោធានៅតែចង់ឲ្យគោរពមឺុងម៉ាត់រដ្ឋធម្មនុញ្ញ ដែលពួកគេរៀបរៀងហើយដាក់ឲ្យអនុវត្ត។
៣ឆ្នាំក្រោយការឡើងកាន់អំណាចរបស់គណបក្ស សម្ព័ន្ធភាពជាតិដើម្បីលទ្ធិប្រជាធិបតេយ្យLND គណបក្សនោះប៉ុនប៉ងធ្វើវិសោធនកម្មរដ្ឋធម្មនុញ្ញ ដែលរបបយោធាបានប្រកាន់យក ក្រោយដាក់ឲ្យបោះប្រជាមតិកាលពីឆ្នាំ២០០៨។ ក្នុងឆ្នាំ២០១៥លោកស្រីអ៊ួងសាន់ស៊ូជីធ្លាប់បានឃោសនា ពីការកែប្រែរដ្ឋធម្មនុញ្ញ។
រដ្ឋធម្មនុញ្ញឆ្នាំ២០០៨ធានាទុកកៅអីក្នុងសភា ២៥%ដល់ពួកយោធា ដែលម្យ៉ាងទៀតត្រួតត្រាក្រសួងគន្លឹះនានា ដូចជាក្រសួងការពារជាតិ ការពារព្រំដែននិងមហាផ្ទៃ។ ក្នុងមាត្រាទី៤៣៦ចែងថារាល់ការកែប្រែរដ្ឋធម្មនុញ្ញទាល់តែមានការអនុម័តដោយសំឡេងជាង៧៥%ក្នុងសភា។ ម្យ៉ាងទៀតកងទ័ពមានសិទ្ធិវេតូ។ ក្នុងរដ្ឋធម្មនុញ្ញនោះមានមាត្រាមួយទៀតចែងថា រាល់អ្នកដែលមានប្ដីឬប្រពន្ធឬក៏កូនជាជនបរទេស ពុំអាចឡើងកាន់តំណែង ប្រធានាធិបតីឬអនុប្រធានាធិបតីបានឡើយ។ រួចករណីនោះបានចងជើងលោកស្រីស៊ូជី មិនអាចឡើងកាន់តំណែងប្រធានាធិបតី៕
ចែករំលែកព័តមាននេះ