រាជធានីភ្នំពេញ៖ បាត់មុខពីកញ្ចក់ទូរទស្សន៍យូរមកហើយ រហូតមកដល់ឆ្នាំថ្មីនេះលោកដួង សុខគា នៅតែមិនទាន់បានបង្ហាញខ្លួនក្នុងកម្មវិធីណាមួយរបស់ស្ថានីយទូរទស្សន៍CTN នៅឡើយទេ ក្នុងពេលដែលកម្មវិធីមួយចំនួនដែលលោកធ្លាប់កាន់បានបង្កើតឡើងវិញ ។
កន្លងមកបុរសពហុជំនាញសិល្បៈដួង សុខគា បានកាន់កម្មវិធីមួយចំនួនរបស់ស្ថានីយទូរទស្សន៍CTN មានកម្មវិធី«សំណើចតាមភូមិ» «ផ្ទះលោកតា» «សុខគា លក្ខិណា ប៊ីអាយជី» និងកម្មវិធីមួយចំនួនទៀត សុទ្ធតែទទួលបានការគាំទ្រពីទស្សនិកជន ។ យ៉ាងណាក៏ដោយបន្ទាប់ពីកម្មវិធីដែលលោកកាន់បិទបញ្ចប់មកនោះ លោកដួង សុខគា បានបាត់មុខឈឹងពីស្ថានីយទូរទស្សន៍ ខណៈពេលដែលកម្មវិធីសំណើចតាមភូមិដែលលោកធ្លាប់កាន់នោះក៏បានដំណើរការឡើងវិញ តែគ្មានវត្តមានរបស់លោកទេ ។
ទស្សនិកជនដែលនិយមគាំទ្រលោកដួង សុខគា បានសន្និដ្ឋានថា ពិធីកររូបនេះទំនងជាបញ្ចប់អាជីពរបស់ខ្លួននៅស្ថានីយទូរទស្សន៍CTN ហើយ ព្រោះបច្ចុប្បន្នលោកក៏មានការមមាញឹកខ្លាំងក្នុងអាជីពកាត់សក់នៅក្នុងពិធីមង្គលការ ។ ឆ្លើយតបទៅនឹងបញ្ហានេះលោក ដួង សុខគា បានអះអាងកាលពីពេល ថ្មីៗកន្លងមកថា «បើទោះបីជាមិនបានបង្ហាញវត្តមាននៅCTN ក៏ពិតមែន ប៉ុន្តែខ្ញុំមិនបានទៅណាឆ្ងាយពីស្ថានីយទូរទស្សន៍មួយនេះទេ ។
ខ្ញុំនៅតែជាបុគ្គលិករបស់CTN ហើយការបាត់មុខរបស់ខ្ញុំមួយរយៈពេលនេះ គឺដោយសារតែមមាញឹកការងារច្រើននៅខាងក្រៅ ។ រហូតមកដល់ពេលនេះខ្ញុំចាំមើលតែមានកម្មវិធីណាដែលសក្តិសមសម្រាប់ខ្ញុំដែលរៀបចំដោយCTN នោះខ្ញុំនឹងចូលរួមបន្តទៀត »។
លោកដួង សុខគា បានថ្លែងអំណរគុណដល់ទស្សនិកជនទាំងឡាយដែលនៅតែគាំទ្ររូបលោក និងចង់ដឹងពីអនាគតវត្តមានរបស់លោកនៅCTN ។ ពាក់ព័ន្ធបញ្ហានេះកោះសន្តិភាពមិនអាចស្វែងរកការបញ្ជាក់ណាមួយពីលោក សុវណ្ណ រិទ្ធី ហៅតាវិចទ័រ ដែលជាអ្នករៀបចំកម្មវិធីកម្សាន្តរបស់ស្ថានីយទូរទស្សន៍CTN ទេ ។
កន្លងមកលោកដួង សុខគា ធ្លាប់ត្រូវគេសង្ស័យថាកើតមានទំនាស់ជាមួយក្រុមការងារ ឬអាចជាមួយអ្នករៀបចំកម្មវិធីគឺលោកវិចទ័រ ដោយលោកថែមទាំងបានប្រកាសជាសាធារណៈនឹងដើរចេញពីកម្មវិធី«ផ្ទះលោកតា» និង«សំណើចតាមភូមិ»ដោយមិនត្រឡប់ក្រោយ។ លោកសុខគា បានលើកហេតុផលថា លោកលែងមានតម្លៃនិងអស់សមត្ថភាពសម្រាប់កម្មវិធីទាំង២ ដោយលោកសុខចិត្តបោះបង់ការងារក្នុងកម្មវិធីទាំងពីរ ដើម្បីទុកឲ្យផលិតករ គឺលោកតាវិចទ័រ ជ្រើសយកអ្នកល្អឲ្យកាន់កម្មវិធីជំនួសខ្លួន ។
ចំណែកលោក សុវណ្ណ រិទ្ធី ហៅលោកតាវិចទ័រ វិញធ្លាប់បានបកស្រាយថា លោកមិនបានដឹងលោកដួង សុខគា ឆេះដុំនឹងបុគ្គលណាមួយក្នុងចំណោមកូនចៅរបស់លោកដែលបានធ្វើកម្មវិធី «ផ្ទះលោកតា» និងកម្មវិធី «សំណើចតាមភូមិ»នោះទេ ។ លោកថានាយពែកមី នាយក្រូច និងនាយគ្រឿន សុទ្ធតែក្មេងល្អ ដោយលោកមិនដឹងថាតើលោកដួង សុខគា អន់ចិត្តរឿងអ្វី ។
លោកថាហេតុផលនៃបញ្ហា គឺទំនងមកពីលោកដួង សុខគា បានឮពាក្យនាំសាររបស់បុគ្គលណាម្នាក់ថាកូនចៅរបស់លោកនិយាយមិនល្អពីខ្លួន ទើបបណ្ដាលឲ្យមានការយល់ច្រឡំ ហើយឈានដល់ច្រឡោតខឹង ហើយបង្ហោះសារនៅលើហ្វេសប៊ុក។ លោកថាការប្រកាសសុំឈប់ មុនៗរបស់លោកសុខគា ដោយចង់ត្រឡប់មកវិញ ឬមិនចង់ គឺស្រេចតែលោកសុខគា ខ្លួនឯង ។
ទស្សនិកជនជាច្រើននិយាយថាជាធម្មតារឿងទើសទាស់ចិត្ត ឬប៉ះទង្គិចគ្នារវាងក្រុមការងារតែងតែកើតមាននៅកន្លែងការងារ ។ ការសម្របសម្រួលគ្នាជារឿងល្អ ហើយគេប្រាថ្នាចង់ឃើញលោកដួង សុខគា ចូលរួមក្នុងកម្មវិធីកម្សាន្តទូរទស្សន៍ដែលជាចំណីអារម្មណ៍ទស្សនិកជនដូចមុន ៕
ចែករំលែកព័តមាននេះ