រាជធានីភ្នំពេញ ៖ អាជ្ញាធរភ្នំពេញបានអះអាងថា ក្រុមការងារជំនាញពាក់ពន្ធ័បាននឹងកំពុងសម្រុកកាត់ទម្លាក់ប្រពន្ធ័ខ្សែភ្លើង និងខ្សែកាបនានា ដែលចងខាងលើ រួចបង្កប់ក្នុងដីនៅតាមផ្លូវចំនួន៥ខ្សែឲ្យរួចរាល់នៅមុនបុណ្យចូលឆ្នាំខ្មែរឆាប់ៗនេះ ។ លោក ម៉េត…
រាជធានីភ្នំពេញ ៖ អាជ្ញាធរភ្នំពេញបានអះអាងថា ក្រុមការងារជំនាញពាក់ពន្ធ័បាននឹងកំពុងសម្រុកកាត់ទម្លាក់ប្រពន្ធ័ខ្សែភ្លើង និងខ្សែកាបនានា ដែលចងខាងលើ រួចបង្កប់ក្នុងដីនៅតាមផ្លូវចំនួន៥ខ្សែឲ្យរួចរាល់នៅមុនបុណ្យចូលឆ្នាំខ្មែរឆាប់ៗនេះ ។
លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញ បានអះអាងថា បន្ទាប់ពីបានការអនុញ្ញាតពីរាជរដ្ឋាភិបាល អាជ្ញាធររាជធានីភ្នំពេញ ក្រោមកិច្ចសហប្រតិបត្តិការពីជំនាញពាក់ពន្ធ័បាននិងកំពុងដំណើរការកាត់ទម្លាក់ខ្សែភ្លើង និងប្រពន្ធ័ខ្សែកាបនានាដែលចងភ្ជាប់នៅផ្នែកខាងលើតាមបណ្តោយផ្លូវសំខាន់ៗក្នុងរាជធានីភ្នំពេញ នឹងត្រូវដាក់ក្នុងបំពង់បង្កប់ក្នុងដីមានចំនួន៥ខ្សែនោះ ។
ពេលនេះក្រុមការងារបានអនុវត្តរួចរាល់ចំនួន៤ខ្សែ ហើយថ្មីៗនេះ ក្រុមការងារបានបន្តអនុវត្តន៏នៅតាម មហាវិថីកម្ពុជាក្រោមមួយខ្សែទៀត ដោយគ្រោងបញ្ចប់នៅមុនបុណ្យចូលឆ្នាំខ្មែរឆាប់ៗនេះ ។ លោកបន្តថា នៅពេលក្រុមការងារកាត់ទម្លាក់ខ្សែភ្លើង និងប្រពន្ធ័ខ្សែកាបតាមផ្លូវចំនួន៥ខ្សែដែលជាកញ្ចប់ទីមួយនេះរួច រដ្ឋបាលរាជធានីភ្នំពេញ នឹងស្នើសុំការអនុញ្ញាតកាត់ទម្លាក់ខ្សែភ្លើង និងប្រពន្ធ័ខ្សែកាបនៅតាមផ្លូវប្រមាណជាង១០ខ្សែទៀត ។
លោកម៉េត មាសភក្តី បានបញ្ជាក់ថា ក្នុងពេលអនុវត្តការងារកាត់ទម្លាក់ខ្សែភ្លើង និងប្រពន្ធ័ខ្សែកាបកន្លងមកនេះ ក្រុមការងារពិតជាមានការលំបាក ជាពិសេសបញ្ហាសណ្តាប់ធ្នាប់នៅតាមដងផ្លូវ និងចិញ្ចើមផ្លូវ មានការចតយានយន្ត និងតាំងលក់ផ្សេងៗ ធ្វើឲ្យក្រុមការងារពិបាកចូលរថយន្តកន្ត្រកដើម្បីកាត់ខ្សែភ្លើង ។
អ្នកនាំពាក្យរដ្ឋបាលរាជធានីភ្នំពេញ បានសំណូមពរឲ្យប្រជាពលរដ្ឋមានការចូលរួម ជាពិសេសជួយសម្រួលដល់ក្រុមការងារដែលបានចុះទៅអនុវត្ត និងសូមការអធ្យាស្រ័យឬយោគយល់ចំពោះការរំខាន ដូចជាការកាត់ប្រពន្ធ័ខ្សែភ្លើង ឬខ្សែកាបធ្វើឲ្យដាច់នៅតាមផ្ទះរបស់បងប្អូន ប៉ុន្តែទោះជាយ៉ាងណាក្រុមការងារនឹងខិតខំតភ្ជាប់បម្រើជូនបងប្អូនឲ្យបានឆាប់បំផុត ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ