ខេត្តមណ្ឌលគិរី ៖ តំណាងរដ្ឋមន្ត្រីក្រសួងបរិស្ថាន កាលពីថ្ងៃទី៣០ ខែមករា ឆ្នាំ២០១៩ បានដឹកនាំ កិច្ចប្រជុំអំពីវឌ្ឍនភាព និងពិនិត្យស្ថានភាពនៃការផ្ទុះអាវុធដោយខ្មាញ់កាំភ្លើង ក្នុងករណីបង្ក្រាបបទល្មើសសត្វព្រៃ…
ខេត្តមណ្ឌលគិរី ៖ តំណាងរដ្ឋមន្ត្រីក្រសួងបរិស្ថាន កាលពីថ្ងៃទី៣០ ខែមករា ឆ្នាំ២០១៩ បានដឹកនាំ កិច្ចប្រជុំអំពីវឌ្ឍនភាព និងពិនិត្យស្ថានភាពនៃការផ្ទុះអាវុធដោយខ្មាញ់កាំភ្លើង ក្នុងករណីបង្ក្រាបបទល្មើសសត្វព្រៃ ដែលបានបណ្ដាលឲ្យមន្ត្រីឧទ្យានុរក្សដែនជម្រកសត្វព្រៃស្រែពកចំនួន០១រូប រងរបួសធ្ងន់ត្រូវបានបញ្ជូនទៅសម្រាកព្យាបាលរបួសភ្លាមៗនៅមន្ទីរពេទ្យក្នុងរាជធានីភ្នំពេញ ។
លោក រ័ត្ន វិរៈ អនុរដ្ឋលេខាធិការក្រសួងបរិស្ថានបានមានប្រសាសន៍ថា ក្នុងនាមក្រសួងបរិស្ថាន ដែលមាន ឯកឧត្ដម សាយ សំអាល់ ជារដ្ឋមន្ត្រី បានចាត់តាំងគណៈប្រតិភូរបស់ក្រសួងបរិស្ថាន ដើម្បីជួយរៀបចំ និងរង់ចាំទទួលជនរងគ្រោះឲ្យមកសម្រាកព្យាបាលរបួស នៅមន្ទីរពេទ្យក្នុងរាជធានីភ្នំពេញ បន្ទាប់ពីមានហេតុការណ៍ចុះបង្ក្រាបបទល្មើសសត្វព្រៃ ដោយក្រុមការងារអនុវត្តច្បាប់របស់ដែនជម្រកសត្វព្រៃស្រែពក នៃមន្ទីរបរិស្ថានខេត្តមណ្ឌលគិរីត្រូវបានក្រុមខ្មាញ់កាំភ្លើង ដែលមានគ្នាប្រមាណជា៦នាក់ បំពាក់ដោយអាវុធអាកាបានបាញ់រះមកលើក្រុមអនុវត្តច្បាប់ ហើយបានបណ្ដាលឲ្យមន្ត្រីឧទ្យានុរក្ស ចំនួន០១រូបរងរបួសធ្ងន់ ។
លោក រ័ត្ន វិរៈ បានមានប្រសាសន៍សង្កត់ធ្ងន់ថា ការលះបង់របស់បងប្អូនដែលជាអ្នកអភិរក្សក្នុងនោះរួមមាន មន្ត្រីនគរបាលយោធាសត្តរក្ស និងមន្ត្រីឧទ្យានុរក្សដែលឋិតនៅក្រោមដំបូលតែមួយ គឺគ្រួសារតែមួយ នៃប្រជាជាតិខ្មែរដោយបានលះបង់នូវការជួបជុំគ្រួសារផ្ទាល់ខ្លួន ដើម្បីមកចូលរួមចំណែកអនុវត្តច្បាប់ក្នុងបុព្វហេតុការពារ និងអភិរក្សធនធានធម្មជាតិ ។
អនុរដ្ឋលេខាធិការក៏បានកោតសរសើរនូវវីរភាពរបស់បងប្អូនឧទ្យានុរក្ស និងមន្ត្រីរួមសហការទាំងអស់ដែលបានខិតខំប្រឹងប្រែងបំពេញការងារការពារ និងអភិរក្សធនធានធម្មជាតិ និងសត្វព្រៃ ដើម្បីទុកបន្តឲ្យកូនចៅជំនាន់ក្រោយ បានឃើញ និងបានស្គាល់ ។ ឯកឧត្ដមបន្តថា ចំពោះជនប្រព្រឹត្ត និងបក្សពួកកម្លាំងជំនាញព្រហ្មទណ្ឌនឹងធ្វើការតាមកំណត់មុខសញ្ញា ដើម្បីយកមក ផ្តន្ទាទោសទៅតាមផ្លូវច្បាប់ឲ្យខាងតែបាន ៕
ចែករំលែកព័តមាននេះ