រាជធានីភ្នំពេញ ៖ អាជ្ញាធរខណ្ឌដង្កោបានចាត់វិធានការក្ដៅមួយក្នុងការរៀបចំសណ្ដាប់ធ្នាប់នៅក្នុងមូលដ្ឋានរបស់ខ្លួនដោយថ្ងៃទី២៩ ខែមករា ឆ្នាំ២០១៩ អាជ្ញាធរបានចេញសេចក្ដីជូនដំណឹងជាផ្លូវការមួយស្ដីពី «ការចុះអនុវត្តវិធានការរដ្ឋបាលរុះរើផ្ទាំងផ្សព្វផ្សាយពាណិជ្ជកម្ម ស្លាកយីហោ សំយ៉ាបយ៉ាក និងសម្ភារដែលដាក់តាំងអាណាធិបតេយ្យ និងរំលោភលើផ្លូវសាធារណក្នុងមូលដ្ឋានខណ្ឌដង្កោ» ។
ដោយឡែកនៅវេលាព្រឹកថ្ងៃទី៣០ ខែមករា ឆ្នាំ២០១៩ អាជ្ញាធរខាងលើបានចាត់កម្លាំងមន្ត្រីសាលាខណ្ឌដង្កោឲ្យនាំយកសេចក្ដីជូនដំណឹងនោះទៅចែកជូនប្រជាពលរដ្ឋ ម្ចាស់អាជីវកម្ម សេវាកម្ម អាជីវករ នៅតាមផ្លូវលេខ២១៧ ហៅផ្លូវចំការដូង ក្នុងភូមិសាស្ត្រសង្កាត់ដង្កោ ខណ្ឌដង្កោ ព្រមទាំងធ្វើការផ្សព្វផ្សាយជូនដល់ពួកគាត់ឲ្យបានដឹង ដើម្បីអនុវត្តន៍តាមវិធានការនេះឲ្យខានតែបានផងដែរ ។
មន្ត្រីសាលាខណ្ឌដង្កោមួយរូបបាននិយាយថា ដើម្បីសណ្ដាប់ធ្នាប់សោភ័ណភាព ជាពិសេសបំផុតការកកស្ទះចរាចរណ៍ និងកាត់បន្ថយនូវឧប្បត្តិហេតុគ្រោះថ្នាក់ចរាចរតាមដងផ្លូវនានានៅក្នុងមូលដ្ឋាននោះ ខណ្ឌដង្កោទាំងមូលនោះ ។ សាលាខណ្ឌដង្កោបានចាត់វិធានការតឹងរ៉ឹងក្នុងការរៀបចំសណ្ដាប់ធ្នាប់តាមដងផ្លូវទាំង ជាពិសេសផ្លូវធំៗចំនួន៣ខ្សែ ដែលមានចរាចរណ៍មមារញឹកនោះ រួមមានផ្លូវលេខ២១៧ ហៅផ្លូវចំការដូង ផ្លូវព្រៃស និងផ្លូវលេខ៣៧១ ហើយជាចម្បងផ្លូវទាំង៣ខ្សែនេះ និងត្រូវរៀបចំមុនគេ និងបន្ទាប់ពីរៀបរយហើយ ទើបឈានបន្តទៅធ្វើតាមផ្លូវតូចៗជាច្រើនទៀត ។
ប្រភពដដែលបានបន្តទៀតថា ដើម្បីអនុវត្តន៍នូវវិធានការនោះឲ្យស្របទៅតាមគោលការណ៍ច្បាប់ និងភាពសុខដុមរមនាចៀសវាងការខូចខាតដល់ទ្រព្យសម្បត្តិប្រជាពលរដ្ឋ និងបណ្ដាក្រុមហ៊ុន អាជីវកម្ម សេវាកម្មនានា ។ ទើបរដ្ឋបាលសាលាខណ្ឌដង្កោបានចេញនូវសេចក្ដីជូនដំណឹង ដើម្បីឲ្យបងប្អូនប្រជាពលរដ្ឋ និងបណ្ដាម្ចាស់ក្រុមហ៊ុនទាំងនោះធ្វើការរុះរើដោយខ្លួនឯង នូវអ្វីដែលសង់ប៉ះពាល់ដល់ដងផ្លូវសាធារណ ។
ម្យ៉ាងទៀតតាមខ្លឹមសារក៏បានបញ្ជាក់ពីឱសានវាទដែលត្រូវអនុវត្តន៍ផងដែរ គឺមានរយៈពេល១៤ថ្ងៃ ដោយកំណត់ត្រឹមថ្ងៃទី១១ ខែកុម្ភៈ ឆ្នាំ២០១៩តទៅ ។ បើនៅតែមិនព្រមអនុវត្តន៍តាមការជូនដំណឹងនេះទេអាជ្ញាធរចាត់វិធានការរុះរើ និងមិនទទួលខុសត្រូវលើការខូចខាត ឬបាត់បង់សម្ភារៈអ្វីឡើយ ។ មិនតែប៉ុណ្ណោះនៅក្នុងករណីរឹងរូសរដ្ឋបាលខណ្ឌដង្កោ និងដាក់ពាក្យបណ្ដឹងទៅតុលាការតាមនីតិវិធីច្បាប់ ៕
ចែករំលែកព័តមាននេះ