ខេត្តកំពង់ឆ្នាំង ៖ ដីស្រែប្រាំងប្រជាពលរដ្ឋជាង២០ហិកតាក្នុងចំណោមជាង១០០ហិកតាស្ថិតក្នុងភូមិទួលរកាឃុំមេលុំ ស្រុកបរិបូណ៌ កំពុងជួបគ្រោះរាំងស្ងួតត្រូវការទឹកសង្គ្រោះបន្ទាន់ ។ ដោយហេតុនេះហើយទើបប្រជាពលរដ្ឋស្នើសុំស្ថាប័នពាក់ព័ន្ធសូមមេត្តាជួយអន្តរាគមន៍ផង ។
ប្រជាពលរដ្ឋរស់នៅក្នុងភូមិទួលរកា និងភូមិទួលធ្លក ឃុំមេលំ ស្រុកបរិបូណ៌ ខេត្តកំពង់ឆ្នាំង នៅព្រឹកថ្ងៃទី៣០ ខែមករា ឆ្នាំ២០១៩ បានរាយការណ៍ឲ្យដឹងថា ដីស្រែរបស់ពួកគាត់ជាង១០០ហិកតា ស្ថិតនៅក្នុងភូមិទួលរកា និងទួលធ្លក ឃុំមេលំ បានកំពុងខ្វះខាតទឹកជាបន្ទាន់ចំនួនជាង២០ហិកតា ក្នុងនោះមាន២ហិកតាបានស្វិតងាប់ដើមទៅហើយ ។
ប្រភពដដែលបានបន្តថា ពេលនេះពួកគាត់កំពុងប្រើគោយន្ដ២គ្រឿងបូមទឹកដាក់ចូលប្រឡាយនៅចំណុចស្ទឹងក្រានដែក ក្នុងភូមិទួលរកា ហើយកិច្ចការងារនេះគឺពួកគាត់បានរ៉ៃលុយគ្នាទិញប្រេងដើម្បីចាក់គោយន្តបូមទឹកទៅសង្គ្រោះដីស្រែដែលកំពុងក្រៀមស្វិតជាបណ្តើរៗ នៅចំណុចខាងកើតភូមិទួលធ្លក ។
ពួកគាត់បានបញ្ជាក់ថា កន្លងមកមន្ទីរធនធានទឹកខេត្តធ្លាប់បានជួយម៉ាស៊ីន១គ្រឿង និងប្រេងចំនួន២០០លីត្រដែរដើម្បីចាក់ម៉ាស៊ីនបូមទឹក ក៏ប៉ុន្តែម៉ាស៊ីនរបស់ធនធានទឹកដែលផ្ដល់មកនោះចេះតែខូច រហូត ហើយខាងមន្ទីរក៏យកទៅវិញ ។ ដូច្នេះពួកគាត់ត្រូវការទឹកសម្រាប់ដាក់ស្រូវទើបរ៉ៃលុយគ្នាទិញប្រេងចាក់ម៉ាស៊ីនគោយន្តបូមទឹកដាក់ប្រឡាយដោយខ្លួនឯង ដើម្បីយកទៅសង្គ្រោះស្រូវរបស់ពួកគាត់ ។
ប្រភពដដែលបានបន្តថា កន្លងមកមន្ទីរធនធានទឹកក៏ធ្លាប់បានសន្យាថា នឹងធ្វើទំនប់ទប់ទឹកនៅចំណុចខាងលើនេះដើម្បីទប់ទឹកសម្រាប់បូមយកទៅស្រោចស្រពស្រែ តែមកដល់ទីនេះពុំទាន់ឃើញតាមការសន្យារបស់មន្ទីរធនធានទឹកនៅឡើយទេ ។ ហេតុនេះពួកគាត់ស្នើសុំអាជ្ញាធរស្រុកខេត្តមេត្តាជួយអន្តរាគមន៍ធ្វើទំនប់ទឹក និងជួយផ្តល់ប្រេងដើម្បីឲ្យពួកគាត់បានប្រើប្រាស់បូមទឹកស្រោចស្រពស្រែដោយអនុគ្រោះផងចុះលើ ។
ជុំវិញបញ្ហានេះលោក ដោក ប៊ុនថុន ប្រធានមន្ទីរធនធានទឹក និងឧតុនិយមខេត្តកំពង់ឆ្នាំងបានអោយដឹងថា ដីស្រែរបស់ប្រជាពលរដ្ឋខាងលើគឺជាដីកាប់រានថ្មី ហើយគ្មានប្រភពទឹកច្បាស់លាស់ ។ កន្លងមកអាជ្ញាធរស្រុកខេត្តក៏បានសំណូមពរកុំឲ្យពួកគាត់ កុំអោយធ្វើស្រែដែរ តែពួកគាត់មិនស្តាប់ ។
ហេតុនេះហើយទើបជួបបញ្ហាប្រឈមខ្វះខាតទឹកបែបនេះ ម្យ៉ាងទៀតពេលខ្វះខាតម៉េចមិនរាយការណ៍ ទៅមេភូមិ មេឃុំ ដើម្បីទំនាក់ទំនងមកមន្ទីររបស់លោក? តែយ៉ាងនេះក្តីលោកសន្យានឹងបញ្ជូនប្រេងចំនួន១០០លីត្រ ទៅឧបត្ថមគោយន្តដែលកំពុងបូមទឹកទាំងពីរគ្រឿងនៅព្រឹកថ្ងៃទី៣១ ខែមករា ឆ្នាំ២០១៩ នេះជាពុំខាន ៕
ចែករំលែកព័តមាននេះ