រាជធានីភ្នំពេញ ៖ តាមរយៈស្ថានទូតប្រចាំនៅក្នុងប្រទេសកម្ពុជាសហរដ្ឋអាមេរិកបានអំពាវនាវស្នើដល់ប្រទេសកម្ពុជាប្រកាន់ និងគោរពនយោបាយការបរទេសឯករាជ្យអធិបតេយ្យភាព និងប្រកបដោយតុល្យភាព ។
ការចេញថ្លែងការណ៍នេះស្របពេលដែលកម្ពុជាកំពុងស្និទ្ធជាមួយមហាអំណាចចិន ។ យោងតាមសេចក្តីថ្លែងការណ៍របស់ស្ថានទូតអាមេរិកចេញផ្សាយ កាលពីថ្ងៃទី៣០មករា ដែលមាចំណងជើងថា អបអរសាទចំពោះទិវាជ័យជម្នះលើរបបប្រល័យពូជសាសន៍៧មករា ។ ថ្លៃងការណ៍បានលើកឡើងថា នៅថ្ងៃទី៧ ខែមករា ឆ្នាំ១៩៧៩ ទីក្រុងភ្នំពេញត្រូវបានរំដោះចេញពីរបបប្រល័យពូជសាសន៍ខ្មែរក្រហម ហើយប្រទេសកម្ពុជាបានចាប់ផ្តើមដំណើរទៅរកអនាគតមួយដែលភ្លឺស្វាង និងប្រកបដោយក្តីសង្ឃឹម ។ នៅខួបលើកទី៤០ នៃខែមករា ជាប្រវត្តិសាស្ត្រនេះស្ថានទូតអាមេរិក សូមឧទ្ទិសដល់ជីវិតប្រជាជនកម្ពុជាជាង២លាននាក់ដែលបានស្លាប់បាត់បង់ជីវិតនៅក្នុងរបបខ្មែរក្រហម និងប្រជាជនដែលរស់រានមានជីវិតពីរបបនេះប្រមាណ៥លាននាក់ដែលទទួលរងការឈឺចាប់ទាំងផ្លូវកាយ និងផ្លូវចិត្ត ។
ប្រភពបន្តថា នៅថ្ងៃទី១៦ ខែវិច្ឆិកា ឆ្នាំ២០១៨ អង្គជំនុំជម្រះវិសាមញ្ញក្នុងតុលាការកម្ពុជាបានដាក់ទោសលើអតីតមេដឹកនាំជាន់ខ្ពស់ខ្មែរក្រហមចំនួនពីរូប គឺ នួន ជា និងខៀវ សំផន ពីបទប្រល័យពូជសាសន៍ឧក្រិដ្ឋកម្មប្រឆាំងមនុស្សជាតិ និងការរំលោភយ៉ាងធ្ងន់ធ្ងរទៅលើអនុសញ្ញាទីក្រុងហ្សឺណែវ ឆ្នាំ១៩៤៩ ។ សាលក្រមដាក់ទោសរបស់តុលាការនេះមានការទទួលស្គាល់ជាលើកដំបូងថា ឧក្រិដ្ឋកម្មនៃរបបខ្មែរក្រហម គឺជាអំពើប្រល័យពូជសាសន៍ដូចដែលបានកំណត់និយមន័យនៅក្រោមច្បាប់អន្តរជាតិ ។
សាលក្រមនេះគួរតែនាំមកនូវក្តីសង្ឃឹមដល់អ្នកដែលស្វែងរកការពិតនឹងអ្នកទទួលខុសត្រូវនៅកម្ពុជា និងក្នុងប្រទេសដ៍ទៃទៀតដែលកំពុងខិតខំផ្សះផ្សាជាមួយនឹងអំពើយង់ឃ្នងពីអតីតកាល ។ ថ្លែងការណ៍បញ្ជាក់ថា« វាក៏គួរតែជាការព្រមានដ៏ខ្លាំងមួយដល់រដ្ឋាភិបាលនឹងក្រុមអ្នកប្រព្រឹត្តអំពើព្រៃផ្សៃ ឬបំបាត់សំឡេងប្រជាជនដែលថា យុត្តិធម៌អាចឈ្នះបាននៅពេលដែលយើងទាំងអស់រួមគ្នាស្វែងរកតម្លាភាព ការពិត និងការទទួលខុសត្រូវ ។
វាគឺជារឿងដ៏សំខាន់ណាស់ដែលយើងត្រូវចងចាំដែរថា ក្រុមខ្មែរក្រហមបានពឹងផ្អែកយ៉ាងងប់ងល់ទៅលើមហាអំណាចធំមួយដែលមានផលប្រយោជន៍ខុសពីផលប្រយោជន៍របស់ប្រជាជនកម្ពុជា» ។ ថ្លែងការក៏បានគូសបញ្ជាក់យ៉ាងដូច្នេះថា « យើងសូមអំពាវនាវអោយប្រទេសកម្ពុជាប្រកាន់ខ្ជាប់នូវនយោបាយការបរទេសឯករាជ្យ អធិបតេយ្យភាព និងប្រកបដោយតុល្យភាព ដែលរក្សាបាននូវអនាគតរបស់ប្រទេសសម្រាប់ប្រជាជនកម្ពុជាទាំងអស់» ។ សូមជម្រាបថាការចេញថ្លែងការណ៍របស់ទូតអាមេរិកនេះដូចជា ចង់ឲ្យកម្ពុជាផ្តាច់ទំនាក់ទំនងជាមួយចិន ខណៈដែលកម្ពុជាកំពុងតែមានភាពជិតស្និទ្ធពោល គឺមិត្តភាពដែកថែប ៕
ចែករំលែកព័តមាននេះ