ខេត្តបាត់ដំបង ៖ ឧប្បត្តិហេតុគ្រោះថ្នាក់ចរាចរដ៏រន្ធត់មួយកាលពីវេលាម៉ោង៣រសៀលថ្ងៃទី១២ មីនា រវាងរថយន្តនិងម៉ូតូត្រង់ចំណុចផ្លូវកោងមួយកន្លែង ស្ថិតក្នុងភូមិប៉ោយស្វាយ ឃុំតាគ្រាម ស្រុកបាណន់ បានបណ្តាលឱ្យអ្នកជិះម៉ូតូ២នាក់ស្លាប់ភ្លាមៗ នៅកន្លែងកើតហេតុ ដែលគេសង្ស័យថា ភាគីអ្នកជិះម៉ូតូទំនងជាស្រវឹងផង។
ក្នុងឧប្បត្តិហេតុនេះគេមិនទាន់ស្គាល់អត្តសញ្ញាណអ្នកស្លាប់ទាំង២នាក់ដែលជិះម៉ូតូនៅឡើយទេ រីឯអ្នកបើកបររថយន្តធុនធ្ងន់ក៏មិនស្គាល់ដែរ ព្រោះក្រោយពេលជួបគ្រោះថ្នាក់តៃកុងបានដាក់មេប្រូចបាត់ស្រមោល ។
មន្ត្រីនគរបាលចរាចរខេត្តដែលចុះទៅពិនិត្យកន្លែងកើតហេតុបាននិយាយថា រថយន្តនិងអ្នកជិះម៉ូតូបានបុកពេលបើកបរបញ្ច្រាសទិសគ្នា ខណៈដែលភាគីម៉ូតូជិះក្នុងល្បឿនលឿនបំផុត ហើយពេលដល់ចំណុចផ្លូវកោង ក៏បានជ្រុលបុករថយន្តដែលបើកបញ្ច្រាសគ្នាពេញទំហឹង តែម្តង។ មន្ត្រីនគរបាលនិយាយថា អ្នកជិះម៉ូតូ២នាក់ភេទប្រុសបានស្លាប់តែគេមិនស្គាល់អត្តសញ្ញាណនៅឡើយជិះម៉ូតូម៉ាកវីវ៉ា ពណ៌កាប់ស្តាំង ស៊េរី២០០៩ ពាក់ស្លាកលេខប៉ៃលិន 1A-2272 ។ ដោយឡែករថយន្តម៉ាកហ៊ីណូ ដឹកថ្ម ពាក់ស្លាកលេខបាត់ដំបង 3A-0878 អ្នកបើករត់បាត់ ។
តាមការបំភ្លឺពីសាក្សីបាននិយាយដែរថា អ្នកជិះម៉ូតូទំនងជាស្រវឹងដោយបោះពួយពីទិសខាងកើតក្នុងល្បឿនលឿនបំផុត លុះដល់ចំណុចផ្លូវកោងទៅខាងស្តាំ អ្នកជិះបត់អត់ទាន់ក៏ជ្រុលទៅបុករថយន្តដឹកថ្មមកពីមុខនៅខាងឆ្វេងដៃខ្លួនពេញទំហឹងលាន់ដូចរន្ទះ ដួលចូលក្រោមរថយន្តបណ្តាលឱ្យរថយន្តកិនខ្ទេចទាំងម៉ូតូទាំងមនុស្ស ។ ទោះជាបែបណា មន្ត្រីនគរបាលបានបញ្ជាក់ថា គេបានដឹកសាកសពបុរស២នាក់ដែលមិនទាន់ស្គាល់ឈ្មោះទៅតំកល់ទុកក្នុងវត្តតាគ្រាមដើម្បីរង់ចាំសាច់ញាតិមកទទួល រីឯម៉ូតូនិងរថយន្ត សមត្ថកិច្ចបានយកទៅរក្សាទុកនៅការិយាល័យចរាចរជើងគោកខេត្តដើម្បីដោះស្រាយ ៕
ចែករំលែកព័តមាននេះ