រាជធានីភ្នំពេញ ៖ ក្នុងជំនួបរវាងលោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិនៃព្រះរាជាណាចក្រកម្ពុជា និង លោក ឌីមីតទ្រី កូប៊ិលគីន រដ្ឋមន្ត្រីធនធានធម្មជាតិ និងបរិស្ថាននៃសហព័ន្ធរុស្ស៊ី នៅរាជធានីភ្នំពេញ កាលពីថ្ងៃទី២៥ ខែមករា បានពិភាក្សាក្នុងក្របខ័ណ្ឌនៃកិច្ចប្រជុំសហប្រធាននៃគណៈកម្មការអន្តររដ្ឋាភិបាលកម្ពុជា-រុស្ស៊ី ហើយភាគីទាំងពីរប្រកាសពីកិច្ចសហប្រតិបត្តិការវិស័យពាណិជ្ជកម្មសេដ្ឋកិច្ចវិទ្យាសាស្ត្រ និងបច្ចេកទេស ។ នេះយោងតាមអ្នកនាំពាក្យក្រសួងការបរទេស និងសហប្រតិបត្តិការអន្តរជាតិ បានបញ្ជាក់កាលពីថ្ងៃទី២៨ ខែមករា កន្លងមក ។
តាមរយៈអ្នកនាំពាក្យក្រសួងការបរទេសបានលើកឡើងថា រុស្ស៊ីនឹងធ្វើជាម្ចាស់ផ្ទះរៀបចំកិច្ចប្រជុំក្រុមការងារជាន់ខ្ពស់លើកទី២ ស្តីពីការលើកកម្ពស់គម្រោងវិនិយោគរួមគ្នា ក្នុងពេលអនាគតដ៏ខ្លីខាងមុខ ដើម្បីពិនិត្យឡើងវិញនូវបញ្ជីឈ្មោះគម្រោងនានាសម្រាប់កិច្ចសហប្រតិបត្តិការពាណិជ្ជកម្ម សេដ្ឋកិច្ច និងវិនិយោគ រវាងកម្ពុជា-រុស្ស៊ី រហូតដល់ឆ្នាំ២០២០ និងសហការអភិវឌ្ឍគម្រោងលម្អិតរួមគ្នា ។ បន្ថែមលើនេះ រុស្ស៊ីបានបញ្ជាក់ឡើងវិញនូវការគាំទ្ររបស់ខ្លួនចំពោះបំណងរបស់កម្ពុជា ដែលចង់ចរចាកិច្ចព្រមព្រៀងពាណិជ្ជកម្មសេរីជាមួយសហភាពសេដ្ឋកិច្ចអឺរ៉ាស៊ី (EAEU)។
ជាងនេះទៅទៀត លោករដ្ឋមន្ត្រីទាំងពីរបានគូសបញ្ជាក់ថា កិច្ចប្រជុំប្រកបដោយផ្លែផ្ការវាងនាយករដ្ឋមន្ត្រីនៃប្រទេសទាំងពីរនៅទីក្រុងប្រ៊ុចស៊ែល កាលពីខែតុលា ឆ្នាំ២០១៨ ក៏ដូចជាកិច្ចសន្ទនារវាង សម្តេចតេជោ ហ៊ុន សែន នាយករដ្ឋមន្ត្រី និងប្រធានាធិបតីរុស្ស៊ី លោកវ្ល៉ាឌីមៀរ ពូទីន នៅប្រទេសសិង្ហបុរី កាលពីខែវិច្ឆិកា កន្លងទៅ មិនត្រឹមតែពង្រឹងបន្ថែមនូវជំនឿជាក់ផ្នែកនយោបាយប៉ុណ្ណោះទេ ប៉ុន្តែថែមទាំងបានផ្តល់នូវលទ្ធភាពថ្មី និងទូលំទូលាយ ដើម្បីលើកកម្ពស់ភាពជាដៃគូទេ្វភាគី ឲ្យកាន់តែខ្ពស់មួយកម្រិតទៀត ។
តាមរយៈអ្នកនាំពាក្យក្រសួងការបរទេសបានលើកឡើងថា សហប្រធានបានពិនិត្យឡើងវិញនូវកិច្ចព្រមព្រៀងចំនួន៤៤ ដែលបានចុះហត្ថលេខា ចាប់តាំងពីឆ្នាំ២០១៥មក និងបានកត់សម្គាល់ថា ការអនុវត្តកិច្ចព្រមព្រៀងមួយចំនួនមានការវិវត្តគួរឲ្យលើកទឹកចិត្ត។ ក្នុងនោះសហប្រធានបានឯកភាពជំរុញអាជ្ញាធរពាក់ព័ន្ធឲ្យប្រកាន់យកនូវវិធានការសកម្មក្នុងការធានាការអនុវត្តកិច្ចព្រមព្រៀងដទៃទៀតឲ្យបានពេញលេញ និងមានប្រសិទ្ធភាព។ លើសពីនេះទៅទៀត លោកសហប្រធានក៏បានពិភាក្សាពីបច្ចុប្បន្នភាពនៃកិច្ចព្រមព្រៀងចំនួនជាង១០ផ្សេងទៀត ដែលកំពុងស្ថិតក្នុងដំណាក់កាលចរចា និងបានគូសបញ្ជាក់ពីសារសំខាន់ក្នុងការបញ្ចប់ការចរចាលើឯកសារទាំងនេះឲ្យបានឆាប់រហ័ស។
ក្រសួងការបរទេសបានលើកឡើងថា រដ្ឋមន្ត្រីទាំងពីរបានឯកភាពលើវិធានការជាក់លាក់ថ្មីៗ ក្នុងការពង្រីកទំនាក់ទំនងផ្នែកពាណិជ្ជកម្ម វិនិយោគ និងសេដ្ឋកិច្ច។ ប្រទេសទាំងពីរមានសក្តានុពលកិច្ចសហប្រតិបត្តិការក្នុងវិស័យរ៉ែ វារីអគ្គិសនី ឧស្ម័នធម្មជាតិ និងប្រេង ការដឹកជញ្ជូន ហេដ្ឋារចនាសម្ព័ន្ធសម្រាប់បច្ចេកវិទ្យាព័ត៌មាន និងទូរគមនាគមន៍(ICT) គ្រឿងយន្តធុនធ្ងន់ ឧស្សាហកម្មកែច្នៃ និងផលិតផលកសិកម្ម ។ល។
លោករដ្ឋមន្ត្រីទាំងពីរ បានផ្តល់សារសំខាន់ខ្ពស់ចំពោះការចែករំលែកព័ត៌មានទាក់ទងនឹងពិព័រណ៍ធុរកិច្ច វេទិកាធុរកិច្ច និងព្រឹត្តិការណ៍ជំរុញពាណិជ្ជកម្មនានា និងបានឯកភាពជួយពន្លឿនការបង្កើតយន្តការ ដែលអាចជួយសម្រួលដល់ការផ្លាស់ប្តូរព័ត៌មានវិនិយោគ។
កម្ពុជារង់ចាំទទួលស្វាគមន៍ក្រុមហ៊ុនរុស្ស៊ី មកចូលរួមក្នុងកម្មវិធី « ពិព័រណ៌ផលិតផលកម្ពុជានិងផលិតផលនាំចេញ » ដែលនឹងប្រព្រឹត្តទៅនៅថ្ងៃទី១៥-១៨ ខែធ្នូ ឆ្នាំ២០១៩ នៅរាជធានីភ្នំពេញ ។
លោកសហប្រធានបានកត់សម្គាល់ប្រកបដោយសុទិដ្ឋិនិយម ចំពោះវឌ្ឍនភាពនៃភាពជាដៃគូសក្តានុពលក្នុងវិស័យការពារបរិស្ថាន និងថាមពលនុយក្លេអ៊ែរក្នុងគោលបំណងសន្តិភាព។
រដ្ឋមន្ត្រីទាំងពីរ បានស្វាគមន៍ចំពោះបំណងរបស់ប្រទេសទាំងពីរ ក្នុងការជំរុញកិច្ចសហប្រតិបត្តិការប្រកបដោយផ្លែផ្កាលើវិស័យការពារបរិស្ថាន ការគ្រប់គ្រងកាកសំណល់ ទឹកស្អាត និងការអភិវឌ្ឍទីក្រុង និងបានសង្កត់ធ្ងន់ពីសារសំខាន់នៃការអភិវឌ្ឍធនធានមនុស្សនៅក្នុងវិស័យថាមពលនុយក្លេអ៊ែរក្នុងគោលបំណងសន្តិភាព ការបង្កើតឲ្យបានឆាប់នូវមជ្ឈមណ្ឌលព័ត៌មានស្តីពីថាមពលនុយក្លេអ៊ែរ និងការបញ្ចប់ការចរចាលើកិច្ចព្រមព្រៀងស្តីពីការបង្កើតមជ្ឈមណ្ឌលវិទ្យាសាស្ត្រ និងបច្ចេកវិទ្យានុយក្លេអ៊ែរ ។
លោករដ្ឋមន្ត្រីទាំងពីរ បានកំណត់វិធានការជាក់លាក់ ដើម្បីជំរុញបន្ថែមទៀតនូវកិច្ចសហប្រតិបត្តិការប្រកបដោយផ្លែផ្កាក្នុងវិស័យអប់រំ វប្បធម៌ ទេសចរណ៍ និងសុខាភិបាល ហើយភាគីរុស្ស៊ីបានយល់ព្រមពិចារណាបង្កើនចំនួនអាហារូបករណ៍ប្រចាំឆ្នាំសម្រាប់និស្សិតកម្ពុជា និងបានបញ្ជាក់ជាថ្មីពីការគាំទ្រជាគោលការណ៍របស់ខ្លួន ក្នុងការស្តារនិងជួសជុលប្រាសាទព្រះវិហារ ។ ការសិក្សាពីលទ្ធភាពធ្វើទំនើបកម្មមន្ទីរពេទ្យមិត្តភាពខ្មែរ-សូវៀត ដែលនឹងត្រូវបញ្ចប់នៅខែមីនា ឆ្នាំ២០១៩ ។
ជាមួយគ្នានេះ រដ្ឋមន្ត្រីទាំងពីរ បានឯកភាពបន្តការពិភាក្សាលើលទ្ធភាពបើកឲ្យមានជើងហោះហើរត្រង់រវាងកម្ពុជានិងរុស្ស៊ី ។ កម្ពុជានឹងធ្វើជាម្ចាស់ផ្ទះរៀបចំសម័យប្រជុំលើកទី១១នៃគណៈកម្មការអន្តររដ្ឋាភិបាលកម្ពុជា-រុស្ស៊ី នៅឆ្នាំ២០២០ ដែលក្នុងឱកាសនោះ កិច្ចព្រមព្រៀងទ្វេភាគីមួយចំនួន នឹងត្រូវបានចុះហត្ថលេខា ហើយភាគីរុស្ស៊ីនឹងអមដំណើរដោយគណៈប្រតិភូធុរកិច្ចរុស្ស៊ីមួយក្រុមផងដែរ ៕
ចែករំលែកព័តមាននេះ