នាឡិកា Smartwatch នាពេលបច្ចុប្បន្ននេះមានភាពទំនើបដល់អាចផ្ញើសារបាន តាមដានលំហាត់ប្រាណ ខលទៅលេខទូរស័ព្ទដទៃ និងអនុញ្ញាតឲ្យអ្នកប្រើប្រាស់ទាញយកអ៊ីម៉ែលផងដែរ ប៉ុន្តែតើនាឡិកាទាំងនេះអាចជំនួសស្មាតហ្វូនរបស់អ្នកបានទេ?
អ្នកអាចប្រើនាឡិកាទាំងនេះទាំងដែលមិនមានស្មាតហ្វូនបាន ហើយមាននាឡិកាជាច្រើនដូចជា Apple Watch Series 3, Series 4 និង Galaxy Watch របស់ Samsung ជាដើមដែលអនុញ្ញាតឲ្យអ្នកប្រើប្រាស់ប្រើអ៊ីនធើណែតបានដោយងាយស្រួល ។
ប៉ុន្តែនាឡិកាទាំងនេះមិនអាចដំណើរការបានយូរទេ ជាពិសេសប្រសិនបើអ្នកប្រើវាដើម្បីជំនួសស្មាតហ្វូនរបស់អ្នក ។ អ្នកអាចប្រើវាដល់ទៅប្រមាណ៨ម៉ោងក្នុងមួយថ្ងៃបានប្រសិនបើអ្នកបើកអ៊ីនធើណែតជាប់រហូត ។ ហើយនាឡិកា Smartwatch ក៏ពិបាកក្នុងការចាប់សេវាអ៊ីនធើណែតជាងស្មាតហ្វូនរបស់អ្នកដែរ ។
ហើយការធ្វើដូច្នេះនឹងបង្ខំឲ្យអ្នកចំណាយថវិកាបន្ថែមទៅលើថ្លៃអ៊ីនធើណែតដែលប្រើលើ Smartwatch ដែរ ។ ប៉ុន្តែអ្នកអាចជៀសវាងវាបានដោយប្រើ Wear OS ថ្មីៗ ឬនាឡិកាថ្មីៗរបស់ Samsung និង Apple ដែលអនុញ្ញាតឲ្យអ្នកភ្ជាប់នាឡិកាទៅនឹងបណ្តាញ Wi-Fi បាន ។
យ៉ាងណាក្តី ពេលដែលធ្វើដូច្នេះ អ្នកមិនអាចផ្ញើសារ SMS ចេញបានទេ បើទោះជាអ្នកអាចផ្ញើជា iMessage បានពិតមែនក្តី ។ លើសពីនេះទៅទៀត នាឡិកា Smartwatch ដែលអាចប្រើអ៊ីនធើណែតបានដាច់ដោយឡែកមានតម្លៃថ្លៃណាស់ ហើយអ្នកមិនអាចយកវាទៅជំនួសស្មាតហ្វូនរបស់អ្នកបានទេលុះត្រាតែអ្នកអាចប្រើវាបានពេញមួយថ្ងៃ ។ ប៉ុន្តែអ្នកនៅតែអាចធ្វើបានដោយគ្រាន់តែកាត់បន្ថយពេលប្រើប្រាស់ ឬប្រើ Wi-Fi ពេលដែលចង់ប្រើអ៊ីនធើណែត ៕
ចែករំលែកព័តមាននេះ