រាជធានីភ្នំពេញ ៖ អតីតប្រធានគណបក្សសង្គ្រោះជាតិលោក សម រង្ស៊ី បានអះអាងលោកនឹងជួយនិយាយជាមួយអន្តរជាតិចំពោះរឿងដាក់ទណ្ឌកម្មផ្នែកសេដ្ឋកិច្ចមកលើកម្ពុជា ។ ប៉ុន្តែលោកចង់ឃើញប្រមុខរាជរដ្ឋាភិបាលកម្ពុជាសម្តេចតេជោ ហ៊ុន សែន ចរចាជាមួយអន្តរជាតិជាមុន ។
យោងតាមវិឌីអូឃ្លីបបង្ហោះនៅថ្ងៃទី៣០ មករា ឆ្នាំ២០១៩ ប្រមាណជាង១០នាទីលោកសម រង្ស៊ី បានថ្លែងទៅកាន់អ្នកគាំទ្រយ៉ាងដូច្នេះថា ការទណ្ឌកម្មផ្នែកសេដ្ឋកិច្ច ពិសេសលើការនាំចូលអង្ករមិនជាប់ពាក់ព័ន្ធនឹងគណបក្សសង្គ្រោះជាតិនោះទេ ។ លោកបន្តថា ដើម្បីប្រជារាស្ត្រពិតមែននោះសម្តេចតេជោ ហ៊ុន សែន គួរចរចាជាមួយអន្តរជាតិ ពិសេសនោះសហគមន៍អឺរ៉ុប ដើម្បីជៀសវាងការដាក់ទណ្ឌកម្មបន្ថែមទៀត ។
លោកបញ្ជាក់យ៉ាងដូច្នេះថា «បើហ៊ុន សែន អាណិតប្រជារាស្ត្រនោះហ៊ុនសែនត្រូវចរចាជាមួយសហគមន៍អន្តរជាតិ ដើម្បីបញ្ជៀសទណ្ឌកម្មដែលឃើញច្បាស់នោះ គឺអង្ករហើយបន្តិចទៀតសម្លៀកបំពាក់នឹងដាក់មកកម្ពុជាទៀត» ។ លោកសម រង្ស៊ី ក៏បានលើកឡើងថា ការចរចាមួយអន្តរជាតិនឹងធ្វើឲ្យប្រទេសជាតិចំណេញ និងទទួលបានសេរីភាពប្រជារាស្ត្រខ្មែរក៏សប្បាយអន្តរជាតិក៏ពេញចិត្ត ដោយឃើញលទ្ធិប្រជាធិបតេយ្យរស់នៅវិញក្នុងការជ្រើសរើសថ្នាក់ដឹកនាំតាមឆន្ទៈពិតប្រាកដ ។
ដើម្បីបញ្ជៀសការដាក់ទណ្ឌកម្មមកកម្ពុជាលោក សម រង្ស៊ី បានគូសបញ្ជាក់យ៉ាងដូច្នេះថា «ខ្ញុំនឹងចេញមុខទៅសុំឲ្យអន្តរជាតិបើកទីផ្សារឲ្យកាន់តែធំទូលំទូលាយថែមទៀត ដើម្បីឲ្យបានជំនួយកាន់តែច្រើនថែមទៀត ។ ឲ្យពលរដ្ឋខ្មែរយុវជនខ្មែរមានការងារច្រើន និងល្អ ហើយ ទទួលបានប្រាក់ខែច្រើន» ។ លោកបន្ថែមការដើរតាមលទ្ធិប្រជាធិបតេយ្យ និងឯករាជ្យនោះកម្ពុជានឹងសប្បូរសប្បាយរុងរឿងជាមិនខាន ។
ចំពោះការលើកឡើងរបស់លោក សម រង្ស៊ី នេះត្រូវបានលោក សុខ ឥសាន អ្នកនាំពាក្យគណបក្សប្រជាជនកម្ពុជាលើកឡើងថា ជាល្បិចកលតែប៉ុណ្ណោះ ។ អ្នកនាំពាក្យគណបក្សកាន់អំណាចបានឲ្យដឹងនៅថ្ងៃទី៣០ មករាថា នៅពេលដែលកំពុងឮថា ពួកបរទេសត្រៀមដាក់ទណ្ឌកម្មដកប្រព័ន្ធអនុគ្រោះពន្ធនាំចូលទំនិញពីកម្ពុជា ស្រាប់តែទណ្ឌិត សម រង្ស៊ី លើកឡើងថា បើសិនជាសម្តេចតេជោ ហ៊ុន សែន យល់ព្រមឲ្យមានដំណោះស្រាយនយោបាយ នៅកម្ពុជាទណ្ឌិតនេះនឹងទៅចរចាជាមួយសហគមន៍អន្តរជាតិឲ្យលុបចោលការដាក់ទណ្ឌកម្មនេះវិញ ។ ករណីនេះត្រូវបានលោក សុខ ឥសាន គូសបញ្ជាក់ថា «ដូច្នេះ ដើម្បីបានសម្រេចបំណងរបស់ខ្លួនទណ្ឌិតរត់ចោលស្រុកនេះហ៊ាននិយាយបោកប្រាស់គ្រប់រូបភាព និងគ្រប់ល្បិចកល ។ ហើយនៅទីបំផុតចង់តាំងខ្លួនជាចៅហ្វាយនាយរបស់ចៅហ្វាយនាយខ្លួនទៅវិញតែប៉ុណ្ណោះ» ។
សូមជម្រាបថា ដើមហេតុដែលអន្តរជាតិដាក់ទណ្ឌកម្មមកកម្ពុជានោះដោយសារ តែមេបក្សប្រឆាំងបាននាំគ្នាលើកសំណើរជាច្រើនករណីបន្ទាប់ពីអតីតប្រឆាំងត្រូវបានតុលាការកំពូល រំលាយចោលកាលពីចុងឆ្នាំ២០១៧ កន្លងមក ។ ជាងនេះមានការចាប់ខ្លួនលោក កឹម សុខា អតីតប្រធានគណបក្សសង្គ្រោះជាតិផងដែរ ។ យ៉ាងណាក្តីសម្រាប់ទណ្ឌកម្មសេដ្ឋកិច្ចនេះត្រូវបានអ្នកជំនាញថា កម្ពុជាមានផ្លូវសម្រាប់ដោះស្រាយ ដោយតែកម្ពុជាចង់ដោះស្រាយ ៕
ចែករំលែកព័តមាននេះ