រាជធានីភ្នំពេញ ៖ ព័ត៌មានក្លែងក្លាយបានកំពុងតែធ្វើឲ្យកម្ពុជាមានសង្គ្រាមយ៉ាងក្តៅគគុក ដែលក្រុមប្រឆាំងបានវាយប្រហាររាជរដ្ឋាភិបាល ។ នេះបើតាមការអះអាងរបស់រដ្ឋមន្ត្រីក្រសួ ងព័ត៌មាន ។
លោកខៀវកាញារិទ្ធ រដ្ឋមន្ត្រីក្រសួងព័ត៌មានបានលើកឡើងក្នុងពិធីប្រកាសចូលកាន់តំណែងរបស់អគ្គនាយយិកានៃអគ្គនាយកដ្ឋានវិទ្យុជាតិ នាព្រឹកថ្ងៃទី៣០ មករា ឆ្នាំ២០១៩ នៅទីស្តីការក្រសួងបានលើកឡើងថា នៅកម្ពុជាព័ត៌មានកំពុងតែជាសង្គ្រាមមួយយ៉ាងក្តៅគគុកដែលស្នើសុំប្រធានអនុប្រធាន និងមន្ត្រីព័ត៌មានមន្ទីរទាំងអស់ត្រូវចាប់អារម្មណ៍ចំពោះដំណឹង ឬព័ត៌មានក្លែងក្លាយ ។ លោកបានបញ្ជាក់ថា នៅកម្ពុជាដែលជាឯកបក្សមានបក្សតែមួយកាន់រដ្ឋាភិបាល រដ្ឋសភា ដូច្នេះការទទួលខុសត្រូវធំណាស់របស់គណបក្សក៏ដូចជា របស់រាជរដ្ឋាភិបាល ហើយពីនេះរហូតដល់ឆ្នាំ២០២៣ ក្នុងពេលដែលគណបក្សដទៃទៀតមិនទាន់ចេញមុខអស់ និងបញ្ចេញសកម្មភាពខ្លាំងក្លានោះ ការធ្វើសង្គ្រាមចិត្តសាស្ត្រ និងការធ្វើព័ត៌មានក្លែងបន្លំក្តៅគគុកតាំងពីអាឡូវនេះទៅ ។
លោករដ្ឋមន្ត្រីបានបញ្ជាក់ថា «យើងឃើញដំណឹងក្លែងបន្លំច្រើនណាស់ ហើយហេតុអីបានជាគេធ្វើបាបពេលនេះពីព្រោះវាដូចជា សត្វកណ្តៀបានស៊ីខាងក្នុង ពេលដល់យើងដឹងគឺវាបានខូចទៅ ។ អីចឹងឥឡូវនេះ គឺធ្វើសង្គ្រាមក្លែងបន្លំ ដើម្បីធ្វើយ៉ាងណាឲ្យប្រជាជន ឬអ្នកបោះឆ្នោតបាត់បង់ទំនុកចិត្តលើរាជរដ្ឋាភិបាលដែលដឹកនាំដោយសម្តេចតេជោ ហ៊ុន សែន នៅពេលបច្ចុប្បន្ន» ។ លោករដ្ឋមន្ត្រីបានបន្ថែមថា ក្រុមប្រឆាំងនឹងយកដំណឹងក្លែងបន្លំបន្តិចម្តងៗ នៅទីបំផុតនៅពេលបោះឆ្នោតសេចក្តីទុកចិត្តនឹងបាត់បង់អស់រលីងទំរាំងយើងដឹងនោះ ។
ដូច្នេះដើម្បីទប់ស្កាត់ចំពោះករណីនេះទាមទាឲ្យមន្ត្រីព័ត៌មានទាំងអស់យកចិត្តទុកដាក់ចំពោះដំណឹងក្លែងបន្លំនេះ ។ ដំណឹងនេះបានកំពុងកើតមានច្រើនឡើង នៅក្នុងពេលនេះស្របពេលដែលប្រជាជនបានយល់ដឹងចំពោះដំណឹងនេះ ។ ប៉ុន្តែដំណឹងខ្លះជាដំណឹងក្តៅគគុកពេកទើប គាត់ (ប្រជាជន) ចាប់យកភ្លាម ។ លោកបន្ថែមថា សម័យមុនយើងរើសស៊ីអាឡូវនេះ យើងស៊ីរើសព័ត៌មានក៏អីញ្ចឹងដែរ ដូច្នេះអ្នកស្អប់រើសយកព័ត៌មានអ្វីដែលគេស្អប់ដោយមិនពិចារណាទេ ដើម្បីវាយមកលើរាជរដ្ឋាភិបាល ។
ដូច្នេះភារកិច្ចរបស់យើងនេះត្រូវធ្វើ គឺរឿងអ្វីដែលកើតឡើងនោះតែងតែមានថតចំលងពីប្រភព ដើម ដូច្នេះយើងត្រូវបង្ហាញមុខពិតប្រាកដ ដើម្បីឲ្យសាធារណៈជនដឹងច្បាស់ ។ លោករដ្ឋមន្ត្រីបញ្ជាក់ថា «រឿងអ្វីទាំងអស់ គឺមានការថតចំលង អីញ្ចឹងយើងត្រូវបង្ហាញមុខរបស់វា ដែលខ្ញុំតែងតែនិយាយថា មន្ត្រីគ្រប់ព័ត៌មានទាំងអស់ត្រូវធ្វើយ៉ាងណាឆ្លើយឲ្យបានមួយសំណួរថា តើហេតុអី ? មុននឹងធ្វើការផ្សេងៗពាក់ព័ន្ធនឹងព័ត៌មាន» ។ លោករដ្ឋមន្ត្រីក៏បានស្នើដល់មន្ត្រីនៅតាមមន្ទីរទាំងអស់ត្រូវរាយការណ៍ព័ត៌មានឲ្យបានទាន់ពេលវេលាកុំចាំគេរាយការណ៍ទាំងមិនដឹងខុសត្រូវ ទើបខ្លួនធ្វើការរាយការណ៍មកថ្នាក់លើ ឬធ្វើការបកស្រាយចំពោះព័ត៌មានក្លែងក្លាយតបវិញ ។
ដូច្នេះប្រធានមន្ទីត្រូវធ្វើការកុំប្រហែសចំពោះព័ត៌មានដែលក្តៅគគុកឲ្យសោះ ។ លោករដ្ឋមន្ត្រីក៏ដាស់តឿនដល់មន្ត្រីទាំងអស់ថា ត្រូវមានការប្រុងប្រយ័ត្នចំពោះការងារឲ្យបានម៉ឹងម៉ាត់បំផុត ។ ហើយក៏ស្នើដល់ប្រធានមន្ទីព័ត៌មានទាំងអស់ត្រូវរាយការណ៍ព័ត៌មានឲ្យបានអស់ ទោះបីជាព័ត៌មានបែបពិធីការ ឬព័ត៌មានផ្សេងៗក៏ដោយ ដើម្បីងាយស្រួល ។ ជាមួយគ្នានោះដែរលោករដ្ឋមន្ត្រីក៏បានស្នើដល់ប្រធានមន្ទីរ ឬស្ថានីយ៍ទូរទស្សន៍របស់ជាតិធ្វើការផ្សព្វផ្សាយអំពីចំណុចវិជ្ជាមានរបស់ជាតិឲ្យបានច្រើន ដើម្បីឲ្យប្រជាពលរដ្ឋបានដឹង ។ ជាមួយគ្នានោះដែរក៏មិនត្រូវរំលងពីចំណុងអវិជ្ជាមាននោះទេ គឺត្រូវធ្វើការពិភាក្សាគ្នា ហើយរកពីដំណឹងវិជ្ជមានឲ្យបានច្រើន ។ សម្រាប់ការចូលកាន់តំណែងជាអគ្គនាយិកានៃអគ្គនាយកដ្ឋានវិទ្យុជាតិកម្ពុជាត្រូវបានលោករដ្ឋមន្ត្រីបានលើកឡើងថា ការចូលកាន់តំណែងរបស់អគ្គនាយកដ្ឋានវិទ្យុជាតិជាស្ត្រីនេះក៏បានចូលរួមលើកស្ទួយផ្នែកស្ត្រីក្នុងវិស័យផ្សព្វផ្សាយផងដែរ ។ ក្នុងឱកាសនោះដែរលោកស្រី ឈឹម ពៅសុកាន់ឌី អគ្គនាយិកាវិទ្យុជាតិកម្ពុជាបានប្តេជ្ញាខិតខំជម្រុញឲ្យថ្នាក់ដឹកនាំគ្រប់នាយកដ្ឋាន និងការិយាល័យចំណេះឲ្យអគ្គនាយកដ្ឋានវិទ្យុជាតិទាំងមូលយកចិត្តទុកដាក់ពង្រឹងបន្ថែមលើការគ្រប់គ្រងផ្នែកទាំងពេលវេលា បំពេញការងារ ការផ្សព្វផ្សាយព័ត៌មាន ទាំងកម្មវិធីផ្សាយ ។
លោកស្រីបានបន្តថា ត្រូវពង្រីកបន្ថែមនូវចំណុចខ្លាំង ដែលជាគុណប្រយោជន៍ក្នុងការផ្សព្វផ្សាយបម្រើប្រជារាស្ត្រ និងសង្គមជាតិ ពិសេសអនុវត្តតាមអនុសាសន៍របស់សម្តេចតេជោ ហ៊ុន សែន ដោយយកចិត្តទុកដាក់ទប់ស្កាត់ និងប្រឆាំងចំពោះព័ត៌មានក្លែងក្លាយដែលបំពុល ដល់សង្គម ដើម្បីឈានទៅអនុវត្តន៍ឲ្យបានសម្រេចតាមទិសដៅរបស់ក្រសួងកំណត់ ពិសេសនោះចូលរួមចំណែកឲ្យបានជោគជ័យនូវយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលអាណត្តិទី៦ ៕
ចែករំលែកព័តមាននេះ