ខេតតាកែវ ៖ រថយន្តយីឌុបដឹកស្រូវមួយគ្រឿងបានបុកជាមួយម៉ូតូ២គ្រឿងក្នុងទិសដៅបញ្ច្រាសគ្នា បណ្តាលឲ្យមនុស្សស្លាប់ម្នាក់ និងមនុស្ស២នាក់ទៀតរងរបួសស្រាល ។
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលា៥និង៤៥នាទីល្ងាចថ្ងៃទី២៩ ខែមករា ឆ្នាំ២០១៩ ស្ថិតនៅលើដងផ្លូវជាតិលេខ២ ចន្លោះបង្គោលគីឡូម៉ែត្រ១១៧-១១៨ ចំណុចភូមិកំពង់ ឃុំព្រះបាទជាន់ជុំ ស្រុកគីរីវង់ ខេត្តតាកែវ។
ប៉ូលិសចរាចរណ៍ស្រុកគីរីវង់បានអោយដឹងថា រថយន្តដឹកស្រូវមួយគ្រឿងខាងលើប្រភេទទម្ងន់៥តោន ពណ៌ ខៀវពាក់ស្លាកលេខ ព្រះសីហនុ ៣A-០៨៥៤ បើកបរដោយបុរសមិនស្គាល់អត្តសញ្ញាណ បានរត់គេចខ្លួន ។
ចំណែកម៉ូតូទាំង២គ្រឿងខាងលើ ក្នុងនោះមួយគ្រឿងម៉ាកវីវ៉ា ពណ៌ខ្មៅ ពាក់ស្លាកលេខ រដ្ឋ ១៧.១-១៧៨៣ បើកបរដោយឈ្មោះ រស់ ស្រ៊ន ភេទប្រុស អាយុ៦៣ឆ្នាំ មុខរបរកសិករ រស់នៅភូមិពោធិ៍រោង ឃុំព្រះបាទជាន់ជុំ ស្រុកគីរីវង់ បានស្លាប់នៅកន្លែងកើតហេតុ និងម៉ូតូមួយគ្រឿងទៀតជិះគ្នា២នាក់ម៉ាកសាន់យ៉ាន់ ពណ៌ក្រហម គ្មានស្លាកលេខ បើកបរដោយឈ្មោះ ចៅ ហ៊ុម ភេទប្រុស អាយុ៧៤ឆ្នាំ រស់នៅភូមិអង្គប្រាសាទ ឃុំអង្គប្រាសាទ ស្រុកគីរីវង់ ខេត្តតាកែវ រងរហួសស្រាល និងអ្នករួមដំណើរម្នាក់ឈ្មោះ ពេជ្រ សាវុន ភេទស្រី អាយុ៦០ឆ្នាំ ត្រូវជាប្រពន្ធ រស់នៅភូមិឃុំជាមួយគ្នា បានរងរបួសស្រាល។
ប៉ូលសនៃអធិការនគរបាលស្រុកគីរីវង់បានប្រាប់ឲ្យដឹងថា មុនពេលកើតហេតុ រថយន្តដឹកស្រូវមួយគ្រឿងប្រភេទទម្ងន់៥តោន ធ្វើដំណើរពីជើងទៅត្បូងក្នុងល្បឿនលឿន លុះមកដល់ចំណុចកើតហេតុ រថយន្តដឹកស្រូវបានបើកវ៉ារថយន្តមួយគ្រឿងទៀតដែលខូច រួចក៏បានបុកម៉ូតូ១គ្រឿងម៉ាកវីវ៉ា កំពុងធ្វើដំណើរក្នុងទិសដៅពីត្បូងទៅជើង រួចខ្ទាតទៅប៉ះម៉ូតូមួយគ្រឿងទៀតជិះគ្នា២នាក់ម៉ាកសាន់យ៉ាន់ បណ្តាលឲ្យអ្នកបើកបរម៉ូតូម៉ាកវីវ៉ាស្លាប់នៅនឹងកន្លែងកើតហេតុ និងភាគីខាងម៉ូតូម៉ាកសាន់យ៉ាន់រងរបូសស្រាលទាំង២នាក់តែម្តង ។ ចំណែកអ្នកបើកបររថយន្តដឹកស្រូវបានរត់គេចខ្លួនបាត់ស្រមោល ។
បច្ចុប្បន្ន រថយន្តដឹកស្រូវ និងម៉ូតូទាំង២គ្រឿងត្រូវបានយកមករក្សាទុកនៅអធិការដ្ឋាននគរបាលស្រុកគីរីវង់ជាបណ្តោះអាសន្នដើម្បីកសាងសំណុំរឿងតាមនីតិវិធី ចំណែកសពជនរងគ្រោះត្រូវបានប្រគាល់ជូនក្រុមគ្រួសារយកទៅធ្វើបុណ្យតាមប្រពៃណី ៕
ចែករំលែកព័តមាននេះ