អាជីវកម្មផលិតរថយន្តបានផ្លាស់ប្តូរច្រើនណាស់ក្នុងប៉ុន្មានឆ្នាំនេះនៅពេលដែលពិភពលោកបានឈានឆ្ពោះទៅរកសេដ្ឋកិច្ចលក្ខណៈសកល និងមានទំនាក់ទំនងគ្នា ។ ក្រុមហ៊ុនរថយន្តអាល្លឺម៉ង់ដូចជា Mercedes-Benz បានវិនិយោគរាប់ប៊ីលានដុល្លារនៅក្នុងរោងចក្រនៅសហរដ្ឋអាមេរិក ហើយថែមទាំងកំពុងស្វែងរកទីតាំងផលិតថ្មីដូចជានៅអេហ្ស៊ីប ។ ខណៈដែលក្រុមហ៊ុន Mercedes បន្តស្វែងរកយុទ្ធសាស្ត្រធ្វើយ៉ាងណាឱ្យមានផលចំណេញដល់ផលិតកម្មគេក៏បានគិតដល់ប្រទេសចិនផងដែរ ។
យោងតាមរបាយការណ៍របស់ទីភ្នាក់ងារព័ត៌មាន Reuters បានឱ្យដឹងថា ក្រុមហ៊ុន Mercedes កំពុងស្វែងរកការពង្រឹងភាពជាដៃគូរបស់ខ្លួននៅក្នុងប្រទេសចិន ដោយសារតែបច្ចុប្បន្នពួកគេកំពុងនាំមុខគូប្រជែងនៅអាមេរិក និង អឺរ៉ុប ទៅលើបច្ចេកវិទ្យាដូចជា រថយន្តអគ្គិសនីជាដើម ។
នាយកប្រតិបត្តិ Mercedes-Benz លោក Wilko Stark បានពន្យល់ថា ការជំរុញឆ្ពោះទៅរករថយន្តអគ្គិសនី បានបង្កឱ្យមានតម្រូវការអ្នកជំនាញខាងផលិតអាគុយពីក្រៅក្រុមហ៊ុន។ លោក Stark បាននិយាយក្នុងសន្និសីទសារព័ត៌មានមួយថា ៖«យើងនឹងគិតអំពីភាពជាដៃគូនៅតាមតំបន់មួយចំនួន ដែលវាមានសារៈសំខាន់ណាស់។ ប្រទេសចិនមានភាពជឿនលឿនច្រើនជាងសហរដ្ឋអាមេរិកនៅក្នុងវិស័យជាច្រើននៃការច្នៃប្រឌិតឌីជីថល» ។
យើងដឹងថា ក្រុមហ៊ុន Mercedes នឹងផលិតអាគុយសម្រាប់រថយន្ត EQC SUV របស់ខ្លួននៅអាមេរិក ប៉ុន្តែប្រទេសចិននៅតែមានអត្ថប្រយោជន៍ជាមួយនឹងសេវាធ្វើដំណើរនិងសេវាឌីជីថល ។ ឧទាហរណ៍ចិនកំពុងនាំមុខសហរដ្ឋអាមេរិកជាមួយនឹងប្រព័ន្ធទូទាត់តាមទូរស័ព្ទ ដែលអាចផ្ដល់ឱ្យអ្នកផ្គត់ផ្គង់ក្នុងស្រុកនូវអត្ថប្រយោជន៍ ។
លោក Stark បានថ្លែងថា ៖«ប្រទេសចិននឹងកាន់តែមានសារៈសំខាន់ថែមទៀត ។ សម្រាប់សេវាកម្មទំនាក់ទំនង ចិនកំពុងតែនាំមុខអាមេរិក ។ ដូចនេះពួកយើងត្រូវធ្វើយ៉ាងណា ដើម្បីពង្រឹងទំនាក់ទំនងរបស់យើងជាមួយអ្នកផ្គត់ផ្គង់ទាំងនេះ» ។
គួរបញ្ជាក់ផងដែរថា នេះមិនមែនមានន័យថា Mercedes នឹងងាកចេញពីអាមេរិកនិងអឺរ៉ុបនោះទេ តែវាបានបង្ហាញថាតើចិនកំពុងក្លាយជាជើងខ្លាំងនៅក្នុងវិស័យផលិតរថយន្តយ៉ាងណា ៕
ចែករំលែកព័តមាននេះ