រាជធានីភ្នំពេញ ៖ លោកឧបនាយករដ្ឋមន្ត្រីប្រាក់ សុខុន រដ្ឋមន្ត្រីក្រសួងការទេស និងសហការបានថ្លែងប្រាប់ទៅសមាគម និងអង្កការសង្គមស៊ីវិលបរទេសថា«ត្រូវជៀសវាងការលាងលុយកខ្វក់នៅកម្ពុជា» ការបញ្ជាក់របស់លោកឧបនាយករដ្ឋមន្ត្រីបានធ្វើឡើង នៅក្នុងប្រជុំពិគ្រោះយោបល់ជាមួយអង្គការមិនមែនរដ្ឋាភិបាលបរទេស កាលពីថ្ងៃទី២៩ ខែមករា ឆ្នាំ២០១៩ នៅថ្ងៃទី២៩ ខែមករា ឆ្នាំ២០១៩ នៅទៅស្តីការក្រសួងការបរទេស ដែលមានអ្នកចូលរួមប្រមាណ៥០០នាក់ ។
លោកឧបនាយករដ្ឋមន្ត្រីបានថ្លែងថា សូមបញ្ជាក់ជូនថា ច្បាប់ស្តីពីសមាគម និងអង្គការមិនមែនរដ្ឋាភិបាលបានកំណត់យ៉ាងច្បាស់អំពីសមត្ថកិច្ចរបស់ក្រសួងមហាផ្ទៃ និងក្រសួងការបរទេស និងសហប្រតិបត្តិការអន្តរជាតិក្នុងការចុះបញ្ជីសមាគម និងអង្គការមិនមែនរដ្ឋាភិបាល ។ សមាគម និងអង្គការមិនមែនរដ្ឋាភិបាលក្នុងស្រុក (Local Associations/NGOs) ត្រូវចុះបញ្ជីនៅក្រសួងមហាផ្ទៃ ហើយសមាគម និងអង្គការមិនមែនរដ្ឋាភិបាលបរទេស (Foreign Associations/NGOs) ត្រូវចុះបញ្ជីនៅក្រសួងការបរទេស និងសហប្រតិបត្តិការអន្តរជាតិ ក្រោមទម្រង់អនុស្សរណៈនៃការយោគយល់គ្នា (MoU) ។
លោកឧបនាយករដ្ឋមន្ត្រីបានថ្លែងថា MoU រវាងក្រសួងការបរទេសជាមួយអង្គការមិនមែនរដ្ឋាភិបាលបរទេសមានសុពលភាព៣ (បី)ឆ្នាំ និងអាចបន្តសុពលភាពបាន ។ ក្រោយច្បាប់នេះចូលជាធរមានក្រសួងបានធ្វើការកែតម្រូវខ្លឹមសារនៃ MoU គំរូចាស់ឲ្យស្របតាមខ្លឹមសារនៃច្បាប់ និងបានអនុវត្ត MoU គំរូថ្មីចាប់ពីខែមករា ឆ្នាំ២០១៦ ព្រមទាំងបានទទួលចុះ MoU ជាមួយអង្គការមិនមែនរដ្ឋាភិបាលបរទេសថ្មីចំនួន៦៥ បន្ថែមទៀត ។
លោកឧបនាយករដ្ឋមន្ត្រីបន្តថា គិតត្រឹមខែធ្នូ ឆ្នាំ២០១៨ មានអង្គការមិនមែនរដ្ឋាភិបាលបរទេសចំនួន៣៨៦ នៅមានសុពលភាព ហើយអង្គការមិនមែនរដ្ឋាភិបាលបរទេសទាំងនោះមកពីប្រទេសផ្សេងៗនៃទ្វីបអាស៊ី អាមេរិក អឺរ៉ុប និងអូស្ត្រាលី ដែលមានគម្រោងសំខាន់ៗផ្តោតលើវិស័យអប់រំសុខាភិបាលសង្គមកិច្ច កសិកម្ម បណ្តុះបណ្តាល វិជ្ជាជីវៈ អភិវឌ្ឍន៍សហគមន៍ បរិស្ថាន និងបោសសម្អាតមីន ។ លោកបន្តថា រាជរដ្ឋាភិបាលបានជ្រាប និងយល់ច្បាស់នូវក្តីបារម្ភ និងក្តីកង្វល់របស់ដៃគូអភិវឌ្ឍន៍ និងអង្គកា សង្គមស៊ីវិលមួយចំនួនពាក់ព័ន្ធនឹងសិទ្ធិសេរីភាពក្នុងការបំពេញការងាររបស់ខ្លួននៅមូលដ្ឋាននៅក្នុងបរិបទនៃក្របខណ្ឌច្បាប់ថ្មី ៕
ចែករំលែកព័តមាននេះ