ខេត្តប៉ៃលិន ៖ បុរសម្នាក់ត្រូវបានប្រជាពលរដ្ឋប្រទះឃើញស្លាប់នៅលើចិញ្ចើមផ្លូវ ដោយមានស្នាមកង់រថយន្តនៅក្បែរខ្លួនរបស់ជនរងគ្រោះ ខណៈបុរសរងគ្រោះដើរពីផ្ទះអ្នកជិតខាងបម្រុងត្រឡប់ទៅផ្ទះរបស់ខ្លួនវិញ ។ ក្រោយពីប្រជាពលរដ្ឋប្រទះឃើញក៏រាយការណ៍ជូននគរបាលឱ្យចុះទៅពិនិត្យមើល ក៏សន្និដ្ឋានថា ជនរងគ្រោះបានស្លាប់ដោយសាររថយន្តបុកពេលកំពុងដើរលើផ្លូវ ។…
ខេត្តប៉ៃលិន ៖ បុរសម្នាក់ត្រូវបានប្រជាពលរដ្ឋប្រទះឃើញស្លាប់នៅលើចិញ្ចើមផ្លូវ ដោយមានស្នាមកង់រថយន្តនៅក្បែរខ្លួនរបស់ជនរងគ្រោះ ខណៈបុរសរងគ្រោះដើរពីផ្ទះអ្នកជិតខាងបម្រុងត្រឡប់ទៅផ្ទះរបស់ខ្លួនវិញ ។ ក្រោយពីប្រជាពលរដ្ឋប្រទះឃើញក៏រាយការណ៍ជូននគរបាលឱ្យចុះទៅពិនិត្យមើល ក៏សន្និដ្ឋានថា ជនរងគ្រោះបានស្លាប់ដោយសាររថយន្តបុកពេលកំពុងដើរលើផ្លូវ ។
ហេតុការណ៍ខាងលើបានកើតឡើងកាលពីវេលាម៉ោង៦និង៣០នាទីយប់ថ្ងៃទី២៩ ខែមករា ឆ្នាំ២០១៩ ត្រង់ចំណុចផ្លូវលំក្រាលក្រួសក្រហម ស្ថិតនៅក្នុងភូមិអូរចិតប្រាំ ឃុំអូរអណ្ដូង ស្រុកសាលាក្រៅ ខេត្តប៉ៃលិន ។
ប្រភពព័ត៌មានពីលោក រី តារា អធិការស្តីទីស្រុកសាលាក្រៅបានឱ្យដឹងថា ជនរងគ្រោះដែលស្លាប់ឈ្មោះមឹក អឿន ភេទប្រុស អាយុ៦១ឆ្នាំ មុខរបរកម្មករ មានទីលំនៅភូមិព្រៃផ្ដៅ ឃុំតាគ្រាម ស្រុកបាណន់ ខេត្តបាត់ដំបង បច្ចុប្បន្នស្នាក់នៅក្នុងភូមិកើតហេតុខាងលើ ។
លោកបន្តទៀតថា រថយន្តបង្កអាចបើកបរក្នុងទិសដៅពីត្បូងទៅជើង ហើយប្រហែលជាផ្លូវលំដីហុយខ្លាំងពេកមើលមិនឃើញជនរងគ្រោះដើរ ក៏បុកពេញទំហឹង បណ្តាលឱ្យជនរងគ្រោះស្លាប់នៅលើចិញ្ចើមផ្លូវតែម្តង។ ក្រោយពេលកើតហេតុ រថយន្តបង្កបានបើកគេចទៅទិសខាងជើង បាត់ ដោយពុំអាចនឹងកំណត់ភិនភាគរថយន្តនោះបានទេ ។
លោកបញ្ជាក់ថា ក្នុងករណីខាងលើនេះ សមត្ថកិច្ចជំនាញកំពុងធ្វើការតាមដានស្រាវជ្រាវស្វែងរករថយន្តបង្ក ដើម្បីយកមកដោះស្រាយតាមនីតិវិធី ។ ចំណែកសពជនរងគ្រោះ ត្រូវបានក្រុមគ្រួសារយកទៅធ្វើបុណ្យតាមប្រពៃណី ៕
ចែករំលែកព័តមាននេះ