ខេត្តបាត់ដំបង ៖ ជនសង្ស័យប្រុស-ស្រី ចំនួន៣នាក់ដែលពាក់ព័ន្ធនឹងករណីដាក់ថ្នាំសណ្ដំម្ចាស់ផ្ទះសំណាក់លួចយកទ្រព្យសម្បត្តិ នៅស្រុកមោងឬស្សី ត្រូវបានកម្លាំងជំនាញនៃស្នងការខេត្តបាត់ដំបងធ្វើការស្រាវជ្រាវតាមឃាត់ខ្លួនបានជាបន្តបន្ទាប់ដល់ខេត្តបន្ទាយមានជ័យកាលពីថ្ងៃទី២៨ មករា ដោយមានកិច្ចសហការពីកម្លាំងស្នងការខេត្តនេះផង ។ លោកឧត្តមសេនីយត្រី…
ខេត្តបាត់ដំបង ៖ ជនសង្ស័យប្រុស-ស្រី ចំនួន៣នាក់ដែលពាក់ព័ន្ធនឹងករណីដាក់ថ្នាំសណ្ដំម្ចាស់ផ្ទះសំណាក់លួចយកទ្រព្យសម្បត្តិ នៅស្រុកមោងឬស្សី ត្រូវបានកម្លាំងជំនាញនៃស្នងការខេត្តបាត់ដំបងធ្វើការស្រាវជ្រាវតាមឃាត់ខ្លួនបានជាបន្តបន្ទាប់ដល់ខេត្តបន្ទាយមានជ័យកាលពីថ្ងៃទី២៨ មករា ដោយមានកិច្ចសហការពីកម្លាំងស្នងការខេត្តនេះផង ។
លោកឧត្តមសេនីយត្រី ជេត វណ្ណនី ស្នងការរងខេត្តបានថ្លែងថា ជនសង្ស័យទាំង៣នាក់នោះមាន១- ឈ្មោះជា ចិន្តា ភេទស្រី អាយុ៥៤ឆ្នាំ ២- ឈ្មោះ ឡុង ស្រីយ៉ា ភេទស្រី អាយុ១៦ឆ្នាំ ជាម្ដាយ និងកូន រស់នៅភូមិ៤ សង្កាត់ព្រះពន្លា ក្រុងសេរីសោភ័ណ្ឌ ខេត្តបន្ទាយមានជ័យ និង៣-ឈ្មោះ ឆេង សីហា ភេទប្រុស អាយុ២៤ឆ្នាំ រស់នៅភូមិតាសិត ឃុំពេល ស្រុកត្រាំកក់ ខេត្តតាកែវ ។
លោកស្នងការរងបាននិយាយថា ក្រុមនេះបានប្រើល្បិចដាក់ថ្នាំក្នុងកំប៉ុងស្រាបៀរ ហើយល្បូងបុរសម្នាក់ឈ្មោះ សោរ យឹម ភេទប្រុស អាយុ៦៣ឆ្នាំ ជាម្ចាស់ផ្ទះសំណាក់យីហោ«សោរ យឹម» នៅស្រុកមោងឬស្សី ផឹករហូតដល់ម្ចាស់ផ្ទះសំណាក់នេះសន្លប់ ក៏នាំគ្នាលួចទ្រព្យសម្បត្តិអស់ពីខ្លួនរួចនាំគ្នាគេចខ្លួនបាត់ កាលពីវេលាម៉ោង៩និង៣០នាទីយប់ ថ្ងៃទី២៧ មករា ក្នុងគ្រាដែលក្រុមជនសង្ស័យនាំគ្នាទៅស្នាក់នៅក្នុងផ្ទះសំណាក់នោះ ។ លោកជេត វណ្ណនី ក៏បានបញ្ជាក់ដែរថា បន្ទាប់ពីធ្វើការស៊ើបអង្កេតទើបកំណត់មុខសញ្ញាជនសង្ស័យ និងតាមឃាត់ខ្លួនបានដល់ផ្ទះនៅខេត្តបន្ទាយមានជ័យតែម្ដង ។
ជុំវិញករណីនេះ បើតាមប្រភពពីសមត្ថកិច្ចថា ក្រុមជនសង្ស័យបានប្រើប្រាសសម្រស់នាងឡុង ស្រីយ៉ា អាយុ១៦ឆ្នាំ ជានុយ ដើម្បីអូសទាញឲ្យម្ចាស់ផ្ទះសំណាក់នេះផឹកស្រាបៀរ ជាមួយគ្នានៅក្នុងផ្ទះសំណាក់ ។ ប្រភពដដែលបានបញ្ជាក់ថា ពេលកំពុងផឹកស៊ីមានតែស្ត្រី២នាក់នេះទេ ដែលផឹកជាមួយម្ចាស់ផ្ទះសំណាក់ រីឯបុរសម្នាក់ទៀតមិនបង្ហាញខ្លួនទេ ។
ប៉ុន្តែទំនងស្ត្រីម្ដាយនិងកូន បានលួចដាក់ថ្នាំចូលកំប៉ុងស្រាបៀរជាមុន មុនពេលឲ្យស្រាបៀរនោះទៅម្ចាស់ផ្ទះផឹក លុះបានបន្តិចស្រាប់តែជនរងគ្រោះដួលសន្លប់តែម្ដង ។ ឃើញដូច្នេះម្ដាយ និងកូនស្រីបានលួចយកគ្រឿងអល័ង្កា និងសម្ភារពីជនរងគ្រោះអស់រួចគេចខ្លួនពីផ្ទះសំណាក់ទាំងយប់តែម្ដង ។
បើតាមរបាយការណ៍សមត្ថកិច្ចបានឲ្យដឹងថា ជនរងគ្រោះបានបាត់បង់លុយចំនួន៦០ម៉ឺនរៀល ខ្សែរកប្លាទីន០១ខ្សែរ មានទម្ងន់០២តម្លឹង បន្តោងមាសទម្ងន់០៥ជី ទូរស័ព្ទអាយហ្វូន X ០១គ្រឿង នាឡិការដៃ០២គ្រឿង ។ ប៉ុន្តែក្រោយពេលឃាត់ខ្លួនសមត្ថកិច្ចដកហូតវត្ថុតាងបាន ទូរស័ព្ទដៃ០១គ្រឿងនិង នាឡិកាដៃ០២គ្រឿងតែប៉ុណ្ណោះ ។
លោកឧត្តមសេនីយត្រី ជេត វណ្ណនី ស្នងការរងខេត្តបានបញ្ជាក់ថា ក្រុមនេះធ្លាប់ប្រព្រឹត្តបែបនេះនាពេលកន្លងមក តែពួកគេបានគេចផុតពីសមត្ថកិច្ចលុះប្រព្រឹត្តលើកចុងក្រោយនេះទើបជាប់អន្ទាក់តែម្ដង ។ លោកបានបន្ថែមថា ពេលនេះកម្លាំងជំនាញកំពុងសួរនាំជនសង្ស័យប្រុសស្រីទាំង៣នាក់នេះ ដើម្បីស្វែងរកវត្ថុតាងមួយចំនួនទៀតមុនពេលកសាងសំណុំរឿងបញ្ជូនពួកគេទៅសាលាដំបូងខេត្តចាត់ការតាមនីតិវិធី ៕
ចែករំលែកព័តមាននេះ