រាជធានីភ្នំពេញ ៖ នៅឆ្នាំ២០១៨ ទំហំពាណិជ្ជកម្មរវាងកម្ពុជា និងសហរដ្ឋមេរិកមានទឹកប្រាក់ជាង៣ប៊ីលានដុល្លារ កើនឡើងប្រមាណ២៧% បើធៀបនឹងឆ្នាំ២០១៧ ។ នេះបើតាមមន្ត្រីជាន់ខ្ពស់ក្រសួងពាណិជ្ជកម្ម ។
ថ្លែងក្នុងកិច្ចប្រជុំក្រុមប្រឹក្សាចម្រុះ លើកទី៥ ស្តីពី កិច្ចព្រមព្រៀងក្របខ័ណ្ឌវិនិយោគ និងពាណិជ្ជកម្ម រវាងរាជរដ្ឋាភិបាលកម្ពុជា និងរដ្ឋាភិបាលសហរដ្ឋអាមេរិក កាលពីថ្ងៃទី២៨ មករា នៅសណ្ឋាគារអប្សរា ផាឡេស រីសតខេត្តសៀមរាប លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម មានប្រសាសន៍ថា ៖« ទំហំពាណិជ្ជកម្មសរុបរវាងកម្ពុជា និងសហរដ្ឋអាមេរិកនៅក្នុងឆ្នាំ២០១៨ មានទឹកប្រាក់ប្រមាណ៣,៣១ប៊ីលានដុល្លារ ធៀបនឹងឆ្នាំ២០១៧ មានត្រឹមតែ២,៦១ប៊ីលានដុល្លារ ពោលបានកើនឡើងប្រមាណ២៧%។ ក្នុងនោះកម្ពុជានាំចេញមានតម្លៃ២,៨៨ប៊ីលានដុល្លារ និងនាំចូលមានតម្លៃ៤២៦លានដុល្លារ ធ្វើឱ្យសហរដ្ឋអាមេរិក ក្លាយជាទីផ្សារធំលំដាប់ទីពីររបស់កម្ពុជា »។
បើតាមលោករដ្ឋមន្ត្រី មានជំនឿមុតមាំថា ប្រទេសទាំងពីរត្រូវការពង្រឹងកិច្ចសហប្រតិបត្តិការថែមទៀត ស្របពេលដែលពិភពលោក មានការផ្លាស់ប្តូរមិនទៀងទាត់ នៅក្នុងរបៀបវារៈពាណិជ្ជកម្មអន្តរជាតិ ហើយតាមរយៈកិច្ចប្រជុំក្រុមប្រឹក្សាTIFA លើកទី៥នេះ គឺជាឱកាសដ៏សំខាន់មួយ សម្រាប់ភាគីទាំងពីរ ធ្វើការតាមដាន និងធ្វើបច្ចុប្បន្នភាពបញ្ហាដែលនៅសេសសល់ រួមជាមួយបញ្ហាថ្មីៗផ្សេងទៀត ដើម្បីបម្រើឧត្តមប្រយោជន៍ប្រទេសទាំងពីរ ដូចដែលមានចែងនៅក្នុងរបៀបវារៈនៃកិច្ចប្រជុំ ។
លោកលើកឡើងថា រាជរដ្ឋាភិបាលកម្ពុជាមានការប្តេជ្ញាចិត្ត ក្នុងការបន្តអនុវត្តគោលនយោបាយបើកចំហ និងការធ្វើសមាហរណកម្មសេដ្ឋកិច្ចនៅគ្រប់កម្រិត ដើម្បីទាក់ទាញការវិនិយោគ សំដៅធ្វើពិពិធកម្មឱកាសការងារ និងប្រាក់ចំណូលជូនប្រជាជន ព្រមទាំងប្រែក្លាយកម្ពុជា ទៅជាប្រទេសដែលមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសដែលមានចំណូលកម្រិតខ្ពស់នៅឆ្នាំ២០៥០ ។
យោងតាមរបាយការណ៍ប្រចាំឆ្នាំ២០១៨របស់ធនគារជាតិនៃកម្ពុជាចេញផ្សាយថ្មីៗបង្ហាញថា នៅឆ្នាំ២០១៨កម្ពុជានាំចេញសរុបមានទឹកប្រាក់ប្រមាណ១៣ប៊ីលានដុល្លារ ក្នុងនោះនាំចេញទៅទីផ្សារសហរដ្ឋអាមេរិកមានប្រមាណ២៤%នៃការនាំចេញសរុប ។
លោក ជា ចាន់តូ ទេសាភិបាលធនាគារជាតិនៃកម្ពុជាមានប្រសាសន៍ថា ទោះបីស្ថានភាពសេដ្ឋកិច្ចពិភពលោកនៅឆ្នាំ២០១៩នេះ ប្រឈមហានិភ័យខ្ពស់ ឬមានភាពមិនប្រាកដប្រជាណាមួយក្តី តែសម្រាប់អត្រាកំណើនសេដ្ឋកិច្ចកម្ពុជានៅឆ្នាំ២០១៩ ត្រូវបានគេរំពឹងថានឹងបន្តររក្សាបានក្នុងរង្វង់៧% ដោយសាររក្សាបានស្ថានភាពម៉ាក្រូសេដ្ឋកិច្ច និងហិរញ្ញវត្ថុបន្តមានភាពរឹងមាំ ៕
ចែករំលែកព័តមាននេះ