រាជធានីភ្នំពេញ ៖ ជនសង្ស័យជាឃាតកច្របាច់កសំលាប់ស្ត្រីម្នាក់ទាំងខ្លួនប្រាណអាក្រាតនៅផ្ទះសំណាក់ ហេង ឡៃ ស្ថិតនៅផ្ទះលេខ២៨៣ កែងផ្លូវលេខ២៦១ សង្កាត់ទឹកល្អក់ទី២ ខណ្ឌទួលគោក ត្រូវសមត្ថកិច្ចខណ្ឌទួលគោក សហការជាមួយសមត្ថកិច្ចការិយាល័យព្រហ្មទណ្ឌកំរិតធ្ងន់ នៃស្នងការនគរបាលរាជធានីភ្នំពេញ ស្រាវជ្រាវចាប់ខ្លួនបានកាលពីវេលាម៉ោង៥ល្ងាចថ្ងៃទី២២ តុលា។ ជនសង្ស័យនោះត្រូវសមត្ថកិច្ចឱ្យដឹងថា ឈ្មោះហុង គឹមឡុង ភេទប្រុស អាយុ២០ឆ្នាំ ជាអ្នកទទួលភ្ញៀវផ្ទះសំណាក់ខាងលើ ហើយត្រូវជាកូនមេការផ្ទះសំណាក់នោះផងដែរ។ ទោះបីជាយ៉ាងណា សមត្ថកិច្ចពុំទាន់ផ្តល់ព័ត៌មានជាក់លាក់ទាក់ទងនឹងការចាប់ជនសង្ស័យជាឃាតកនេះឱ្យដឹងជាផ្លូវការនៅឡើយទេ។
សូមបញ្ជាក់ថា កាលពីវេលាម៉ោង៨ព្រឹកថ្ងៃទី២១ ខែតុលា មានការភ្ញាក់ផ្អើលយ៉ាងខ្លាំង បន្ទាប់ពីប្រទះឃើញស្ត្រីម្នាក់មានអាយុប្រមាណជាង២០ឆ្នាំ ត្រូវឃាតកច្របាច់កសំលាប់នៅក្នុងបន្ទប់លេខA3 ផ្ទះសំណាក់ហេងឡៃ ស្ថិតនៅអគារលេខ២៨៣ វិថីឧកញ៉ាទេពផន កែងផ្លូវលេខ២៦១ សង្កាត់ទឹកល្អក់ទី២ ខណ្ឌទួលគោក។ រហូតមកដល់ថ្ងៃទី២៤ តុលា ស្ត្រីរូបនេះពុំត្រូវគេស្គាល់អត្តសញ្ញាណឡើយ ហើយជនសង្ស័យជាឃាតកត្រូវបានសមត្ថកិច្ចស្រាវជ្រាវចាប់ខ្លួន។
ស្ត្រីរូបនោះត្រូវបានបុរសម្នាក់ជិះម៉ូតូម៉ាកគុបជ្រុងពណ៌ទឹកប៊ិចមួយគ្រឿង នាំចូលទៅដេកផ្ទះសំណាក់ខាងលើ នៅវេលាម៉ៅង៤និង៤៥នាទីទៀបភ្លឺ ចូលថ្ងៃទី២១ តុលា។ លុះនៅវេលាម៉ោង៦ព្រឹក បុរសនោះបានចាកចេញបាត់ទៅហើយនៅវេលាម៉ោង៨ព្រឹក ក៏មានការភ្ញាក់ផ្អើលនៅពេលអ្នកបោសសំអាតបើកទ្វារចូលទៅបោសសំអាតបន្ទប់ក៏ប្រទះឃើញដេកស្លាប់ទាំងកាយអក្រាត។ បន្ទាប់ពីមានឃាតកម្មនៅក្នុងផ្ទះសំណាក់ សមត្ថកិច្ចខណ្ឌទួលគោក បានធ្វើការស្រាវជ្រាវយ៉ាងសកម្ម ហើយឈានទៅចាប់ខ្លួនជនសង្ស័យជាឃាតកនេះ។
តាមសមត្ថកិច្ចឱ្យដឹងថា បន្ទាប់ពីចាប់ខ្លួនជនសង្ស័យបានសារភាពថា ខ្លួនពិតជាបានសំលាប់ទៅលើស្ត្រីរូបនោះពិតប្រាកដមែន។ តាមការសាកសួរជនសង្ស័យបានសារភាពថា នៅថ្ងៃទី២១ តុលា វេលាម៉ោង៤និង៤៥នាទីភ្លឺ មានភ្ញៀវ២នាក់ ប្រុសម្នាក់ ស្រីម្នាក់ បានមកជួលបន្ទប់ផ្ទះសំណាក់ស្នាក់។ លុះក្រោយមកបុរសនោះបានចាកចេញពីបន្ទប់ផ្ទះសំណាក់ទៅបាត់ ហើយខ្លួនបានលបចូលទៅក្នុងបន្ទប់ឃើញស្ត្រីរូបនោះកំពុងដេកស្រាតធ្វើឱ្យខ្លួនមានចំណង់ភ្លាមក៏សុំស្ត្រីរូបនោះរួមរ័ក តែនាងមិនព្រមក៏ច្របាច់ករហូតនាងលែងរើបំរះ រួចខ្លួនក៏ចាប់ផ្តើមរួមរ័ក ទោះបីដឹងថា នាងស្លាប់ក៏ដោយ៕
ចែករំលែកព័តមាននេះ