ខេត្តស្វាយរៀង ៖ បុរស២នាក់បងប្អូនទាស់សំដីគ្នារឿងប្រាក់២ម៉ឺនរៀលក្លាយជាជម្លោះផ្ទុះកំហឹង បងប្រុសទាញកាំបិតខ្វែវកាប់ប្រហារប្អូនប្រុសបង្កើតមួយកាំបិតចំកស្ទើរដាច់ក.កចេញពីស្មា បណ្តាលឲ្យស្លាប់ ក្នុងថ្លុកឈាមភ្លាមៗគួរឲ្យស្រៀវសាច់។ ហេតុការណ៍ខាងលើនេះបានកើតឡើងកាលពីវេលាម៉ោង១និង១០នាទីរសៀលថ្ងៃទី២៧ ខែមករា ឆ្នាំ២០១៩ ស្ថិតនៅផ្ទះម្តាយរបស់ជនរងគ្រោះ…
ខេត្តស្វាយរៀង ៖ បុរស២នាក់បងប្អូនទាស់សំដីគ្នារឿងប្រាក់២ម៉ឺនរៀលក្លាយជាជម្លោះផ្ទុះកំហឹង បងប្រុសទាញកាំបិតខ្វែវកាប់ប្រហារប្អូនប្រុសបង្កើតមួយកាំបិតចំកស្ទើរដាច់ក.កចេញពីស្មា បណ្តាលឲ្យស្លាប់ ក្នុងថ្លុកឈាមភ្លាមៗគួរឲ្យស្រៀវសាច់។
ហេតុការណ៍ខាងលើនេះបានកើតឡើងកាលពីវេលាម៉ោង១និង១០នាទីរសៀលថ្ងៃទី២៧ ខែមករា ឆ្នាំ២០១៩ ស្ថិតនៅផ្ទះម្តាយរបស់ជនរងគ្រោះ ក្នុងភូមិព្រៃរការ ឃុំដូនសរ ស្រុកស្វាយជ្រំ ។
បើតាមសមត្ថកិច្ចបានឲ្យដឹងថា ជនសង្ស័យឈ្មោះលី សារ៉ត ភេទប្រុស អាយុ៣១ឆ្នាំ ត្រូវជាបង រីឯជនរងគ្រោះដែលស្លាប់ឈ្មោះលី សារឿន ភេទប្រុស អាយុ២៧ឆ្នាំ ត្រូវជាប្អូន ។ អ្នកទាំងពីររស់ភូមិកើតហេតុខាងលើ មានឪពុកឈ្មោះស៊ាង សារុន និងម្តាយឈ្មោះស៊ិន សាវន។
ប្រភពដដែលបានឲ្យដឹងទៀតថា សព្វថ្ងៃជនរងគ្រោះមានប្រពន្ធ និងមានកូនម្នាក់ទៅរកស៊ីនៅរាជធានីភ្នំពេញ ហើយនាំប្រពន្ធនិងកូនទៅរស់នៅឯភ្នំពេញ យូរៗក៏មកលេងផ្ទះម្តង ហើយទាំង២នាក់បងប្អូននេះក៏ពុំសូវត្រូវគ្នានោះទេ ដោយសារពេលជនរងគ្រោះមកលេងផ្ទះម្តងៗពុំដែលសល់លុយសល់កាក់ឲ្យអ្នកផ្ទះ(ឲ្យម្តាយ)នោះឡើយ នៅពេលត្រឡប់ទៅវិញ ជនរងគ្រោះតែងតែសុំលុយម្តាយឪពុកដើម្បីត្រឡប់ទៅវិញ។
សមត្ថកិច្ចបានបន្តទៀតថា នៅថ្ងៃកើតហេតុ ជនសង្ស័យបានផឹកស្រាឡើងស្រវឹងហើយក៏ចាប់ផ្តើមមានទំនាស់ជាមួយជនរងគ្រោះ ដោយជនសង្ស័យបាននិយាយថា «ទៅរកស៊ីនៅភ្នំពេញយូរហើយមិនដែលឃើញសល់លុយសោះចឹង មិនត្រឹមតែប៉ុណ្ណឹងទេ ពេលមកលេងផ្ទះម្តងៗសុំលុយ២ម៉ឺនរៀលទៅវិញទៀត» ។
ពេលនោះអ្នកទាំង២ក៏មានជម្លោះកាន់តែខ្លាំងឡើង រហូតដល់ទ្រាំមិនបាន ជនសង្ស័យជាបងក៏បានទៅយកកាំបិតខ្វែវកាប់ទៅលើជនរងគ្រោះជាប្អូនមួយកាំបិតចំក បណ្តាលឲ្យស្លាប់ក្នុងថ្លុកឈាមតែម្តងទៅ។
ក្រោយពីកាប់ប្រហារប្អូនប្រុសបណ្តាលឱ្យស្លាប់រួចហើយ ជនសង្ស័យបានរត់គេចខ្លួនមកដល់ផ្លូវជាតិលេខ៣១៥ ក៏ត្រូវបានកម្លាំងសមត្ថកិច្ចនគរបាលនៃអធិការដ្ឋាននគរបាលស្រុកស្វាយជ្រុំបានស្ទាក់ចាប់បាន ហើយបញ្ជូនមកកាន់អធិការដ្ឋាននគរបាល ស្រុកស្វាយជ្រុំ ដើម្បីកសាងសំណុំរឿងបញ្ជូនមកស្នងការដ្ឋាននគបាលខេត្ត និងចាត់ការបន្តទៅតាមផ្លូវច្បាប់រួមនឹងវត្ថុតាងបញ្ជូនមកសាលាដំបូងខេត្តស្វាយរៀងចាត់ការតាមនីតិវិធីនៅថ្ងៃទី២៨ មករា២០១៩នេះ៕
ចែករំលែកព័តមាននេះ