ប្រទេសវៀតណាម ៖ យោងតាមភ្នាក់ងារសារព័ត៌មាន Viet Nam News ដែលបានចេញផ្សាយកាលពីថ្ងៃចន្ទកន្លងមកបានឲ្យដឹងថា នាយកដ្ឋានពាណិជ្ជកម្ម និងឧស្សាហកម្មរបស់ប្រទេសហ្វីលីពីន (DTI) បានសម្រេចចិត្តដាក់វិធានការការពារស៊ីម៉ងត៍ដែលនាំចូលពីប្រទេសជាច្រើនដែលរួមមានប្រទេសវៀតណាមផងដែរ ។ វិធានការការពារនេះនឹងមានទម្រង់ជាថ្លៃប្រមាណ៤ដុល្លារក្នុងមួយតោនក្នុងកំឡុងពេល២០០ថ្ងៃ ។
យោងទៅតាម DTI បានឲ្យដឹងដែរថា កំណើនស៊ីម៉ងត៍នាំចូលក្នុងប្រទេសបានបង្កការប៉ះពាល់យ៉ាងខ្លាំងដល់វិស័យក្នុងស្រុក ។ ការស៊ើបអង្កេតដំណាក់កាលដំបូងបានប្រទះឃើញថា ចំនួនស៊ីម៉ងត៍ដែលត្រូវបាននាំចូលបានកើនឡើងជាបន្តបន្ទាប់ក្នុងកំឡុងពេលស៊ើបអង្កេតដែលបានចាប់ផ្តើមពីឆ្នាំ ២០១៣ ទៅ ២០១៧ ឬកើនបានប្រមាណ ៧០%ក្នុងឆ្នាំ ២០១៤, ៤,៤០១%នៅឆ្នាំ ២០១៥, ៥៥០%នៅឆ្នាំ ២០១៦ និង ៧២%នៅឆ្នាំ ២០១៧ ផងដែរ ។
ប្រាក់ចំណូលបានពីការលក់ស៊ីម៉ងត៍ផលិតក្នុងប្រទេសបានធ្លាក់ចុះអស់ ១២% កាលពីឆ្នាំ ២០១៧ ខណៈដែលប្រាក់ចំណេញបានធ្លាក់ចុះ ៤៩%ផងដែរ ។ លើសពីនេៈទៅទៀត ក្រុមហ៊ុនផលិតស៊ីម៉ងត៍ក្នុងស្រុកត្រូវបានបង្ខំឲ្យបន្ទាបតម្លៃជិត១០%ឯណោះដើម្បីប្រកួតប្រជែងជាមួយនឹងស៊ីម៉ងត៍ដែលនាំចូល ។
DTI បានឲ្យដឹងទៀតថា ពួកគេនឹងមានការត្រួតពិនិត្យដើម្បីបញ្ជាក់ថា ការដាក់វិធានការការពារនេះជួយការពារអត្ថប្រយោជន៍របស់សាធារណជនឬទេ ខណៈឯកសារតម្កល់ផ្សេងៗនឹងត្រូវបានផ្ញើទៅគណៈកម្មាធិការពន្ធសម្រាប់ការស៊ើបអង្កេតផ្លូវការ ។
ទិន្នន័យដែលបានពី DTI បានបង្ហាញមកថាវៀតណាមគឺជាប្រភពស៊ីម៉ងត៍នាំចូលធំជាងគេសម្រាប់ប្រទេសហ្វីលីពីន ដែលគ្រប់គ្រងប្រមាណ ៦៦%នៃស៊ីម៉ងត៍សរុបដែលនាំចូលទៅហើយនៅឆ្នាំ ២០១៤ មុននឹងកើនដល់ ៧២%នៅឆ្នាំ ២០១៧ ។
ក្នុងកំឡុងពីខែមករា ដល់ ខែមេសា ឆ្នាំ២០១៨ វិញ ស៊ីម៉ងត៍ដែលនាំចូលពីប្រទេសវៀតណាមស្មើប្រមាណ ៧៥%នៃស៊ីម៉ងត៍ដែលនាំចូលសរុបក្នុងប្រទេសហ្វីលីពីន ៕
ចែករំលែកព័តមាននេះ