រាជធានីភ្នំពេញ ៖ លោកឧត្តមសេនីយ៍ឯក អ៊ុក ហៃសីឡា ប្រធាននាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍មានប្រសាសន៍ថា «ប្រទេសកម្ពុជាបើកចំហជើងមេឃ ដើម្បីស្វាគមន៍ជនបរទេសគ្រប់ជាតិសាសន៍ទាំងអស់ ដែលមានបំណងចូលមកប្រកបមុខរបររកស៊ីដោយស្របច្បាប់ តែមិនស្វាគមន៍ជនបរទេសណាដែលចូលមកធ្វើការរកស៊ី ឬប្រព្រឹត្តបទល្មើសផ្សេងៗឡើយ » ។
លោកឧត្តមសេនីយ៍ឯកបានថ្លែងបែបនេះ ក្នុងពេលដែលកម្លាំងនាយកដ្ឋានរបស់លោក សហការជាមួយនឹងកម្លាំងមានសមត្ថកិច្ចចិន ក្នុងការបណ្តេញជនជាតិចិនចំនួន៦៩នាក់ (ស្រី្ត១៦នាក់) ទៅប្រទេសកំណើតវិញតាមជើងយន្តហោះពិសេសរបស់ប្រទេសចិនចំនួន២គ្រឿង ដែលមកទទួលយកទៅវិញតាមច្រកអាកាសយានអន្តរជាតិភ្នំពេញ នាព្រឹកថ្ងៃទី២៨ ខែមករា ។
លោកឧត្តមសេនីយ៍ឯក អ៊ុក ហៃសីឡា បានឱ្យដឹងថា កម្លាំងនៃអគ្គនាយកដ្ឋានអន្តោប្រវេសន៍កម្ពុជា សហការជាមួយនឹងកម្លាំងមានសមត្ថកិច្ចរបស់ប្រទេសចិន បានធ្វើការបណ្តេញជនជាតិចិនចំនួន៦៩នាក់ក្នុងនោះស្រីចំនួន១៦នាក់ ទៅកាន់ប្រទេសកំណើតរបស់ពួកគេវិញ ដោយមានយន្តហោះពិសេសរបស់ប្រទេសចិនចំនួន២គ្រឿងមកទទួលយក និងមានកម្លាំងសមត្ថកិច្ចចិនចំនួន១៥០នាក់មកអមដំណើរផងដែរ។
លោកឧត្តមសេនីយ៍ឯក មានប្រសាសន៍បន្តទៀតថា ជនជាតិចិនប្រុសស្រីទាំង៦៩នាក់ ដែលត្រូវកម្លាំងរបស់អគ្គនាយដ្ឋានអន្តោប្រវេសន៍ សហការជាមួយនឹងកម្លាំងមានសម្ថកិច្ចរបស់ប្រទេសចិន ធ្វើការបណ្តេញចេញនាពេលនេះ គឺធ្វើឡើងក្រោយពីកម្លាំងរបស់នាយកដ្ឋានប្រឆាំងភេរវកម្មនិងឧក្រិដ្ឋកម្មឆ្លងដែននៃអគ្គស្នងការដ្ឋាននគរបាលជាតិ ធ្វើការបង្ក្រាបកាលពីថ្ងៃទី២១ ខែមករាកន្លងទៅ នៅក្រុងបាវិត ខេត្តស្វាយរៀង ។
ការចាប់ខ្លួនពួកគេនេះ គឺក្រោយពីកម្លាំងសម្ថកិច្ចរបស់ប្រទេសកម្ពុជា សហការជាមួយនឹងកម្លាំងមានសម្ថកិច្ចរបស់ប្រទេសចិន ធ្វើការស្រាវជ្រាវរកឃើញថា «ក្រុមជនជាតិចិនប្រុស ស្រីទាំង៦៩នាក់នេះ បានប្រព្រឹត្តបទល្មើសក្លែង បន្លំតាមប្រព័ន្ធទូរគមនាគមន៍នៅឯប្រទេសចិន»។
គួរបញ្ជាក់ថា កាលពីពេលកន្លងមក កម្លាំងនាយកដ្ឋានរបស់លោកសហការជាមួយនឹងកម្លាំងមានសមត្ថកិច្ចរបស់ប្រទេសចិន តែងតែធ្វើការបង្ក្រាបនិងឃាត់ខ្លួនជនជាតិចិនដែលពាក់ព័ន្ធទៅនឹងបទល្មើសខាងលើ និងបទល្មើសគំរាមកំហែងទារប្រាក់តាមប្រព័ន្ធអុីនធើរណេតដែលយើងហៅថា «VOIP» ជាច្រើនករណី និងធ្វើការបណ្តេញចេញទៅវិញជាច្រើនលើកច្រើនសាមកហើយ ។
នេះជាការបណ្តេញចេញក្រុមជនជាតិចិនលើកទី១ហើយនាដើមឆ្នាំ២០១៩នេះ ដែលកាលពីឆ្នាំ២០១៨ មានជនជាតិចិនត្រូវបានបណ្តេញចេញចំនួន៥លើកសរុប៧៥៥នាក់ ក្នុងនោះស្រី១៥០នាក់ ៕
ចែករំលែកព័តមាននេះ