ខេត្តបាត់ដំបង ៖ បុរសម្នាក់ត្រូវសមត្ថកិច្ចឃាត់ខ្លួនកាលពីព្រឹកថ្ងៃទី៦ សីហា នៅភូមិអន្លង់តាម៉ុក ឃុំរបស់មង្គល ស្រុកមោងឫស្សី ក្រោយពីភរិយាប្ដឹងចោទថា បានរំលោភកូនស្រីខ្លួនអាយុជាង១០ឆ្នាំ រាប់ភ្លេចនៅប្រទេសថៃ និងលើកចុងក្រោយកាលពីពាក់កណ្ដាលសប្ដាហ៍មុននេះនៅស្រុកខ្មែរ ។
លោក គិត ហៀង អធិការស្រុកមោងឫស្សីបានឲ្យដឹងថា ជនសង្ស័យដែលត្រូវឃាត់ខ្លួនឈ្មោះខុន ខេន អាយុ៣១ឆ្នាំ រីឯកូនស្រីរងគ្រោះឈ្មោះខ.ច អាយុ១៣ឆ្នាំ ។ លោកអធិការបញ្ជាក់ថា បុរសនេះត្រូវភរិយារបស់ខ្លួនឈ្មោះឆេម ឈុត អាយុ៣៥ឆ្នាំ ប្ដឹងចោទប្រកាន់ថា បានបង្ខំរំលោភកូនស្រីខាងលើស្ទើររាប់ភ្លេច និងលើកចុងក្រោយនៅរសៀលថ្ងៃទី១ សីហា ក្បែរមាត់បឹងខាងក្រោយផ្ទះ ។ ក្រោយពីទទួលបណ្ដឹង និងមានបញ្ជាពីលោកស្នងការខេត្តទើបលោកបញ្ជាកម្លាំងជំនាញឲ្យចុះនាំខ្លួនបុរសអគតិនោះតែម្ដង។
ប្រពន្ធជនសង្ស័យឈ្មោះឆេម ឈុត បានប្រាប់សមត្ថកិច្ចថា ប្ដី ប្រពន្ធ និងកូនស្រីគាត់ខាងលើនេះភាគច្រើនបានទៅធ្វើការនៅប្រទេសថៃ តែគាត់មិនបានដឹងរឿងរ៉ាវដ៏អាស្រូវនេះទេ ។ អ្នកស្រីបន្តទៀតថា គាត់បានដឹងនៅពេលកូនស្រីទម្លាយអំពីរឿងអាក្រក់នេះខណៈគាត់និងប្ដីត្រៀមបម្រុងចេញទៅធ្វើកម្មករនៅប្រទេសថៃជាថ្មីទៀត ។
សូមបញ្ជាក់ថា តាមការផ្ដល់ព័ត៌មានថា គ្រួសារខាងលើនេះបានមកពីប្រទេសថៃមុនថ្ងៃបោះឆ្នោត ហើយក្រោយបោះឆ្នោត គ្រួសារនេះបម្រុងចេញទៅធ្វើការនៅប្រទេសថៃវិញ តែមិនទាន់បានទៅផង ស្រាប់តែបែកការណ៍រឿងឪពុករំលោភកូនស្រី ទើបប្រពន្ធដាក់ពាក្យប្ដឹងប្រឆាំងប្ដីរបស់ខ្លួនតែម្ដង ។ ក្មេងស្រីរងគ្រោះបានប្រាប់សមត្ថកិច្ចថា នាងត្រូវឪពុកបង្ខំចាប់រំលោភច្រើនឥតគណនា ប៉ុន្តែនាងមិនអាចចាំបាន ហើយនាងក៏មិនដែលបង្ហើបប្រាប់ម្ដាយឱ្យដឹងដែរ ពីព្រោះឪពុកគំរាមស្លាប់ ។ នាងប្រាប់ថា ការរំលោភលើនាងចុងក្រោយគឺខណៈពេលនាងត្រឡប់មកស្រុកខ្មែរវិញនៅមុនថ្ងៃបោះឆ្នោត និងនៅថ្ងៃទី១ សីហា ។
នៅចំពោះមុខសមត្ថកិច្ច បុរសឈ្មោះខុន ខេន បានសារភាពពីទោសកំហុសដ៏លាមករបស់ខ្លួនថា ខ្លួនពិតជាបានប្រព្រឹត្តដូចការចោទប្រកាន់របស់ប្រពន្ធ និងកូនស្រីខ្លួនមែន តែខ្លួនមិនបានចាំចំនួនលើកទេ ព្រោះច្រើនដងពេក តែខ្លួនបានចាំការប្រព្រឹត្តដ៏ថោកទាបនេះចំនួន២លើកចុងក្រោយកាលពីសប្ដាហ៍មុន ។
លោកគិត ហៀង អធិការស្រុកមោងឫស្សីបានបញ្ជាក់ថា មន្រ្តីជំនាញរបស់លោកកំពុងសួរនាំជនសង្ស័យខាងលើនេះ ហើយជននេះក៏បានសារភាពអំពីកំហុសរបស់ខ្លួនផងដែរ ។ លោកអធិការបន្ថែមថា លោកស្នងការខេត្តបានបញ្ជាឲ្យរៀបចំកសាងសំណុំរឿង ដើម្បីបញ្ជូនជនអគតិនេះទៅកាន់តុលាការចាត់ការតាមនីតិវិធីច្បាប់ហើយ ៕
ចែករំលែកព័តមាននេះ