ខេត្តបន្ទាយមានជ័យ ៖ កម្លាំងនគរបាលចុះបង្ក្រាបករណីជួញដូរគ្រឿងញៀនរយៈពេល២ថ្ងៃឃាត់ខ្លួនជនសង្ស័យចំនួន១៥នាក់ រឹបអូសគ្រឿងញៀនមួយចំនួនធំ និងអាវុធខ្លីទំនើបចំនួន៣ដើម ត្រូវបានកសាងសំណុំរឿងបញ្ជូនទៅសាលាដំបូងខេត្តបន្ទាយមានជ័យ ចាត់ការតាមច្បាប់នៅថ្ងៃទី២៨ ខែមករា ឆ្នាំ២០១៩។
លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យបានប្រាប់ថា ប្រតិបត្តិការបង្ក្រាបបទល្មើសគ្រឿងញៀនត្រូវបានធ្វើឡើងរយៈពេល២ថ្ងៃ ដែលមានកម្លាំងនគរបាលប្រឆាំងបទល្មើសគ្រឿងញៀនខេត្ត សហការជាមួយកម្លាំងអធិការដ្ឋាននគរបាលក្រុងប៉ោយប៉ែត ដែលមានការសម្របសម្រួលពីលោក តេង សម័យ ព្រះរាជអាជ្ញាអមសាលាដំបូងខេត្តបន្ទាយមានជ័យ។
លោកបានបញ្ជាក់ថា នៅពេលដែលកម្លាំងនគរបាលចុះប្រតិបត្តិការបង្ក្រាបឃាត់ខ្លួនជនសង្ស័យ១៥នាក់ ព្រមទាំងរឹបអូសវត្ថុតាងមានគ្រឿងញៀនមានប្រភេទមេតំហ្វេតាមីនហៅយ៉ាម៉ា និងខេទឹកកក និងអាវុធខ្លីសេរីទំនើប៣ដើម និងគ្រាប់អាវុធខ្លី រួមទាំងមធ្យបាយសម្រាប់ធ្វើសកម្មភាពមានរថយន្ត១គ្រឿង និងម៉ូតូ៩គ្រឿងដែលចុះបង្ក្រាបរយៈពេល២ថ្ងៃ ចាប់ពីថ្ងៃទី២៦ដល់២៧ ខែមករា ឆ្នាំ២០១៩ ក្នុងភូមិសាស្ត្រក្រុងប៉ោយប៉ែត។
លោកឧត្តមសេនីយ៍ទោ អាត់ ខែម បានបញ្ជាក់ថា ក្រោយពេលឃាត់ខ្លួនជនសង្ស័យចំនួន១៥នាក់ មាននិងវត្ថុតាងដែលត្រូវបានបញ្ជូនទៅស្នងការដ្ឋាននគរបាលខេត្តបន្ទាយមានជ័យដើម្បីធ្វើការសាកសួរ ហើយកសាងសំណុំរឿងបញ្ជូនទៅសាលាដំបូងខេត្តបន្ទាយមានជ័យចាត់ការតាមច្បាប់៕
ចែករំលែកព័តមាននេះ