រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានប្រកាសយ៉ាងដាច់ណាត់ថា ប្រទេសកម្ពុជាត្រូវតែមានសន្តិភាពជានិច្ច ទោះបីស្ថិតក្នុងកាលៈទេសៈណាក៏ដោយ ។ សម្តេចតេជោ បានលើកឡើងលើបណ្តាញសង្គម នៅថ្ងៃទី២៩ ខែមករា នេះថា ដោយអមនឹងរូបថតជាច្រើនសន្លឹកដែលមានទាំងថតរូបសខ្មៅ និយាយតាំងពីយូរមកហើយ និងរូបថតនៃការអភិវឌ្ឍន៍នៅក្នុងរាជធានីភ្នំពេញ ។
សម្តេចបានលើកឡើងយ៉ាងដូច្នេះថា « កម្ពុជាត្រូវតែមានសន្តិភាពជានិច្ច រូប១សន្លឹកសខ្មៅដែលយើងបានឃើញ គឺជាទិដ្ឋភាពមួយផ្នែកនៃទីក្រុងភ្នំពេញដែលត្រូវបានបំផ្លាញ និងបោះបង់ចោលដោយសារសង្គ្រាម និងរបបប្រល័យពូជសាសន៍ប៉ុលពត កាលពីឆ្នាំ១៩៧៥-១៩៧៩ ។ សម្តេចបន្តថា ក្រោយពីកម្ពុជាមានសន្តិភាពពេញលេញជាង២០ឆ្នាំមកនេះទីក្រុងភ្នំពេញត្រូវបានអភិវឌ្ឍឲ្យរីកលូតលាស់ទៅមុខឥតឈប់ឈរ ។
យើងត្រូវរួមគ្នាថែរក្សាការពារសន្តិភាពឲ្យខានតែបាន ដើម្បីកុំឲ្យប្រទេសជាតិវិលធ្លាក់ទៅក្នុងភ្នក់ភ្លើងនៃសង្គ្រាម និងការបំភ្លេចបំផ្លាញសារជាថ្មី ។ សូមជូនពរបងប្អូនជនរួមជាតិ ជួបតែសេចក្តីសុខ និងសំណាងល្អគ្រប់ទីកន្លែង ។
សូមជម្រាបថា ការលើកឡើងរបស់ប្រមុខរាជរដ្ឋាភិបាលនេះ ខណៈដែលបណ្តាប្រទេសមួយចំនួននៅលើពិភពលោកបានកំពុងដែលមានអសន្តិសុខ ជាក់ស្តែងនោះប្រទេសវេណេស៊ុយអេឡា បានកំពុងតែកើតមានបាតុកម្ម បន្ទាប់ពីសហរដ្ឋអាមេរិក និងប្រទេសមួយចំនួនទៀតលូកដៃចូលក្នុងកិច្ចផ្ទៃក្នុងប្រទេសនេះ ៕
ចែករំលែកព័តមាននេះ