រាជធានីភ្នំពេញ ៖ ក្រសួងធនធានទឹក និងឧតុនិយមបានព្យាករណ៍ថា ចាប់ពីថ្ងៃទី២៩ ខែមករានេះរហូតដល់ថ្ងៃទី០៥ ខែកុម្ភៈ ឆ្នាំ២០១៩ អាកាសធាតុនៅកម្ពុជានឹងចាប់ផ្ដើមកើនកម្តៅឡើងវិញ ដោយសារសម្ពាធខ្ពស់នៅប្រទេសចិនចាប់ផ្ដើមថយចុះឥទ្ធិពល ។
ក្រសួងធនធានទឹក និងឧតុនិយមបានចេញសេចក្តីជូនដំណឹងមួយកាលពីថ្ងៃទី២៨ មករា ដោយបានព្យាករណ៍ថា ដោយសារសម្ពាធខ្ពស់នៅប្រទេសចិនចាប់ផ្ដើមថយចុះឥទ្ធិពល អាកាសធាតុនៅកម្ពុជានឹងចាប់ផ្ដើមកើនកម្តៅឡើងវិញចាប់ពីថ្ងៃទី២៩ ខែមករានេះរហូតដល់ថ្ងៃទី០៥ ខែកុម្ភៈ ឆ្នាំ២០១៩ ។
សេចក្តីជូនដំណឹងនេះបញ្ជាក់ថា បណ្ដាខេត្តនានានៅតំបន់ខ្ពង់រាប និងតំបន់ភ្នំមានសីតុណ្ហភាពអប្បបរមាមានពី២០ទៅ២២អង្សាសេ និងសីតុណ្ហភាពអតិបរមាមានពី២៩ ទៅ៣២អង្សាសេ ។ បណ្ដារាជធានី និងខេត្តដទៃទៀតមានសីតុណ្ហភាពអប្បបរមាពី២៣ទៅ២៥អង្សាសេ និងសីតុណ្ហភាពអតិបរមាមានពី៣១-២៥អង្សាសេ ។ ក្នុងនោះតំបន់ជាប់ដងទន្លេ តំបន់ជុំវិញបឹងទន្លេសាប តំបន់ខ្ពង់រាប និងតំបន់ភ្នំ និងមានចុះអ័ព្ទនៅពេលព្រឹក ។
ឆ្នាំនេះអាកាសធាតុនៅខេត្តមណ្ឌលគិរីបានចុះត្រជាក់ខ្លាំងប្រហែលពីរសប្ដាហ៍មកហើយ គឺសីតុណ្ហភាពបានធ្លាក់ចុះត្រឹមពី១៣ទៅ១៥អង្សាសេ នៅពេលយប់ និងព្រឹក ។ ចំណែកឡើងខ្ពស់បំផុតនៅពេលថ្ងៃត្រង់ គឺមិនលើស២៨អង្សាសេនោះទេ ។ ក្នុងចំណោមបណ្ដាក្រុងស្រុកទាំង៥របស់ខេត្តមណ្ឌលគិរី មានក្រុង-ស្រុកចំនួន៣ ដែលទទួលរងនូវភាពត្រជាក់ និងសំណើមច្រើនជាងគេព្រោះតែភូមិសាស្ត្រទាំងនេះ ស្ថិតនៅតំបន់ភ្នំ ក្នុងនោះរួមានក្រុងសែនមនោរម្យ ស្រុកអូររាំង និងស្រុកពេជ្រាដា ។
ចំណែកស្រុកកែវសីមា និងស្រុកកោះញែក គឺមិនសូវរងនូវភាពត្រជាក់ ឬរងារខ្លាំងនោះទេ ។ លោក ប៊ុន សួរ ប្រធានមន្ទីរសុខាភិបាលខេត្តមណ្ឌលគិរីបានឲ្យដឹងថា ទោះបីជាអាកាសធាតុបានចុះត្រជាក់បែបនេះក្ដី ប៉ុន្តែចំពោះសុខភាពប្រជាពលរដ្ឋទូទៅមិនមានបញ្ហាអ្វីធ្ងន់ធ្ងរនោះទេ ដោយគ្រាន់តែមានប្រជាពលរដ្ឋមួយចំនួនតូចជួបប្រទះជាមួយអាការផ្ដាសាយប៉ុណ្ណោះ៕
ចែករំលែកព័តមាននេះ