ការចូលរួមរបស់បុគ្គលិកក្នុងកិច្ចការក្រុមហ៊ុនភាគច្រើនត្រូវបានមើលរំលងដោយក្រុមហ៊ុន ។ បន្ទាប់ពីផ្តល់ការងារដល់បុគ្គលិកណាម្នាក់ហើយ ក្រុមហ៊ុនមិនមានផែនការឬយុទ្ធសាស្ត្រក្នុងការបន្តជំរុញឲ្យបុគ្គលិកស្រលាញ់ការងាររបស់ខ្លួនឡើយដែលមានសារៈសំខាន់ណាស់ក្នុងការរក្សាបុគ្គលិកឲ្យធ្វើការឲ្យក្រុមហ៊ុនបានយូរ ។
បុគ្គលិកដែលសកម្មគឺជាអ្នកដែលចាត់ទុកកន្លែងការងារជាផ្ទះទីពីរ ។ ពួកគេអាចសម្រេចកិច្ចការដែលបានដាក់ឲ្យធ្វើនិងមានភាពស្មោះស្ម័គ្រជាមួយនឹងក្រុមហ៊ុន ។ ពួកគេអាចក្លាយជាអ្នកដឹកនាំមួយរូប ហើយនឹងនៅក្រុមហ៊ុនបានយូរ ។
បុគ្គលិកដែលមិនសកម្មគឺជាអ្នកដែលចូលចិត្តការងាររបស់ពួកគេតែគ្រាន់តែធ្វើកិច្ចការតាមតម្រូវការប៉ុណ្ណោះដោយមិនធ្វើការងារដើម្បីគោលដៅឬតម្លៃក្រុមហ៊ុនឡើយ ។ ចំណែកឯបុគ្គលិកអកម្មវិញគឺជាអ្នកដែលមិនមានកម្លាំងក្នុងការធ្វើការ និងចែកចាយអវិជ្ជមានក្នុងក្រុមហ៊ុន ។
យោងទៅតាម Mental Health America បានឲ្យដឹងថាបុគ្គលិកអកម្មធ្វើឲ្យមានការខាតបង់ប្រមាណពី ៤៥០ ទៅ ៥០០ប៊ីលានដុល្លារឯណោះក្នុងមួយឆ្នាំ ។ ហើយខាងក្រោមនេះគឺជាវិធីមួយចំនួនដែលអ្នកអាចធ្វើតាមដើម្បីជំរុញឲ្យបុគ្គលិកអ្នកកាន់តែសកម្មជាងមុន៖
១. ផ្តល់ឧបករណ៍សម្រាប់ធ្វើការបានគ្រប់គ្រាន់
ការស្រលាញ់ការងារគឺពឹងផ្អែកលើរចនាសម្ព័ន្ធរបស់ក្រុមហ៊ុនដែរ ដូច្នេះការផ្តល់ឧបករណ៍គ្រប់គ្រាន់ដល់បុគ្គលិកដែលពួកគេអាចប្រើដើម្បីសម្រេចការងារបស់ពួកគេអាចនឹងជំរុញដល់ប្រសិទ្ធិភាពក្នុងការប្រកបការងាររបស់ពួកគេដែរ។
២. ផ្តល់ការហ្វឹកហាត់
បុគ្គលិកតែងតែស្វែងរកវប្បធម៌ការងារដែលអនុញ្ញាតឲ្យពួកគេបន្តអភិវឌ្ឍន៍ខ្លួន ។ ហើយវាពិតជាសំខាន់ណាស់ក្នុងការផ្តល់ការហ្វឹកហាត់ដល់បុគ្គលិកដើម្បីឲ្យពួកគេមានជំនាញបន្ថែម ។ លើសពីនេះទៅទៀត ការធ្វើដូច្នេះអាចជួយឲ្យពួកគេមានអារម្មណ៍ជិតស្និទ្ធនឹងក្រុមហ៊ុនជាដើមផងដែរ ។
៣. ការទទួលស្គាល់
ការសរសើរបុគ្គលិកពេលដែលពួកគេធ្វើបានល្អគឺជាកត្តាដ៏សំខាន់ក្នុងការរក្សាភាពសកម្មរបស់បុគ្គលិក។ ពេលខ្លះ ការផ្តល់ជាអត្ថប្រយោជន៍បន្តិចបន្តួចដូចជាគូប៉ុង ឬថវិកាបន្តិចបន្តួចអាចមានកម្លាំងជំរុញដល់ពួកគេច្រើនផងដែរ ។
៤. ជំរុញឲ្យមានការប្រាស្រ័យទាក់ទងបើកទូលាយ
ការប្រាស្រ័យទាក់ទងច្បាស់លាស់អនុញ្ញាតឲ្យអ្នកដឹងច្បាស់ពីគំនិតរបស់បុគ្គលិកខ្លួន។ អ្នកអាចធ្វើការស្ទង់មតិ ប្រជុំក្រុម ឬប្រើប្រអប់មតិដើម្បីដឹងពីគំនិតរបស់ពួកគេបានដែរ។ អ្នកគួរជំរុញឲ្យពួកគែនិយាយដើម្បីឲ្យអ្នកអាចធ្វើការផ្លាស់ប្តូរពេលដែលអ្នកយល់ស្រប ។
៥. ផ្តល់មតិយោបល់ជាប្រចាំ
ការផ្តល់មតិយោបល់ជាប្រចាំជួយឲហយបុគ្គលិកធ្វើបច្ចុប្បន្នភាពជំនាញ និងផ្តល់ជាលទ្ធផលឲ្យស្របទៅនឹងការគិតទុករបស់ក្រុមហ៊ុន។ អ្នកគួរតែផ្តល់មតិយោបល់ទាំងបែបផ្លូវការនិងក្រៅផ្លូវការដើម្បីជំរុញទឹកចិត្តរបស់បុគ្គលិកខ្លួន ៕
ចែករំលែកព័តមាននេះ