ខេត្តតាកែវ ៖ ជុំវិញករណីផ្ទុះការតវ៉ាពីប្រជាពលរដ្ឋនៅស្រុកអង្គរបូរីកំពុង តែក្លាយទៅជារឿងក្តៅ ខណៈដែលរដ្ឋបាលស្រុកអង្គរបូរីបានចេញលិខិតបំភ្លឺ (លាងខ្លួនឯង) ហើយងាកមកចោទក្រុមអ្នកសារព័ត៌មានថា ផ្សាយព័ត៌មានរឿងផ្ទុះការតវ៉ារបស់បងប្អូនប្រជាពលរដ្ឋនៅឃុំព្រៃគមជាង៤០០គ្រួសារប្តឹងតវ៉ារឿងតម្លៃទឹកបូមដាក់ស្រែជាមួយ និងក្រុមហ៊ុនផ្គត់ផ្គង់ទឹកស្ថានីយ ឃុំព្រៃគមរបស់លោក ឈុន សារឹន ហៅប៉ោង កាលពីថ្ងៃទី២៦ ខែមករា ឆ្នាំ២០១៩កន្លងទៅនេះ។
ដោយថា ជាការផ្សាយព័ត៌មានបំភ្លៃ និងបំប៉ោងព័ត៌មានដោយរដ្ឋបាលស្រុកអង្គរបូរី និងអាជ្ញាធរឃុំឆ្លើយថា មិនបានដឹងរឿងទៅវិញក្នុងពេលដែលប្រជាពលរដ្ឋប្រុសស្រីរាប់រយនាក់ទៅឈរនៅមាត់ជណ្តើរសាលាឃុំ ស្រែករកអាជ្ញាធរជួយដោះស្រាយ តែបែរជាអាជ្ញាធរឃុំ និងស្រុកឆ្លើយថា មិនដឹងរឿងទៅវិញ ។ ទង្វើនេះហាក់បីដូចជា ពាក្យរបស់ថ្នាក់ដឹកនាំធ្លាប់និយាយតគ្នាថា កុំធ្វើជាមន្ត្រីជើងដប់ដែលអង្គុយនៅតែក្នុងបន្ទប់ ចាំស្តាប់តែរបាយការមិនគិតគូរពីទុក្ខលំបាករបស់រាស្ត្រដែលអាចនិយាយបានថា ជាមន្ត្រីអសកម្មភាពខ្វះការទំនាក់ទំនងផ្ទាល់ជាមួយ និងប្រជាពលរដ្ឋ ។
សូមបញ្ជាក់ផងដែរថា ការឡាយវីដេអូផ្ទាល់អំពីសកម្មភាព និងការសម្ភាសន៍តវ៉ារបស់ពលរដ្ឋនៅពេលនោះក្នុងបណ្តាញសង្គមហ្វេសប៊ុក និយាយអំពីទុក្ខលំបាករបស់ពួកគាត់ឲ្យមហាជន និងអាជ្ញាធរគ្រប់លំដាប់ថ្នាក់បានដឹងរឿងពិតនោះ បែរជាសង្ស័យមន្ត្រីជើងដប់រដ្ឋបាលស្រុកអង្គរបូរីថា ការផ្សាយព័ត៌មាននេះមិនពិត ហើយជាព័ត៌មានបំប៉ោងទៅវិញ ។
តាមការពិនិត្យសូមឲ្យអាជ្ញាធរស្រុកអង្គរបូរី គួរណាស់តែចុះមកផ្ទាល់ ដើម្បីរកដំណោះស្រាយជូនពលរដ្ឋមិនមែនស្តាប់តែរបាយការ ហើយចោទប្រកាន់មកអ្នកសារព័ត៌មាននោះទេជៀសវាងការធ្លាក់ចុះនៃការងារគ្រប់គ្រងរដ្ឋបាល ៕
ចែករំលែកព័តមាននេះ