រាជធានីភ្នំពេញ ៖ បុរសម្នាក់បានជិះម៉ូតូជែងក្នុងល្បឿនលឿនបានជ្រុលចូលផ្លូវម្ខាងទៀតនិងជ្រុលទៅបុកម៉ូតូសណ្តោងរ៉ឺម៉កដឹកបន្លែពេញទំហឹង បណ្តាលអោយរងរបួសធ្ងន់ពេលបញ្ជូនទៅសង្គ្រោះនៅមន្ទីរពេទ្យដល់ពាក់កណ្តាលផ្លូវក៏បានស្លាប់ ។ ហេតុការណ៍នេះបានកើតឡើងនៅវេលាម៉ោង៧យប់ថ្ងៃទី២៨ ខែមករា ឆ្នាំ២០១៩ ទល់មុខក្រុមហ៊ុនម៉ែរស៊ឺដេស ផ្លូវ៣០ម៉ែត្រ…
រាជធានីភ្នំពេញ ៖ បុរសម្នាក់បានជិះម៉ូតូជែងក្នុងល្បឿនលឿនបានជ្រុលចូលផ្លូវម្ខាងទៀតនិងជ្រុលទៅបុកម៉ូតូសណ្តោងរ៉ឺម៉កដឹកបន្លែពេញទំហឹង បណ្តាលអោយរងរបួសធ្ងន់ពេលបញ្ជូនទៅសង្គ្រោះនៅមន្ទីរពេទ្យដល់ពាក់កណ្តាលផ្លូវក៏បានស្លាប់ ។ ហេតុការណ៍នេះបានកើតឡើងនៅវេលាម៉ោង៧យប់ថ្ងៃទី២៨ ខែមករា ឆ្នាំ២០១៩ ទល់មុខក្រុមហ៊ុនម៉ែរស៊ឺដេស ផ្លូវ៣០ម៉ែត្រ ភូមិទួលរកា សង្កាត់ចាក់អង្រែក្រោម ខណ្ឌមានជ័យ ។
សពជនរងគ្រោះមិនទាន់ស្គាល់អត្តសញ្ញាណនៅឡើយទេ គ្រាន់តែដឹងថា វ័យ២៥ឆ្នាំ ជាអ្នកបើកបរម៉ូតូមួយគ្រឿងម៉ាកស៊ុយហ្ស៊ុយគីស្មាស់ ស៊េរីឆ្នាំ២០០៥ ពណ៌ខ្មៅ អត់មានស្លាកលេខ ។ ដោយឡែកអ្នកបើកបេរ៉ឺម៉កម៉ូតូមានដឹកបន្លែឈ្មោះ ពន ភេទប្រុស អាយុ២២ឆ្នាំ មុខរបររត់រ៉ឺម៉ក ស្នាក់នៅ ភូមិក្រៅយ៉ូវ ស្រុកស្អាង ខេត្តកណ្តាល ។
តាមប្រភពព័ត៌មានពីកន្លែងកើតហេតុ បានអោយដឹងថា មុនពេលកើតហេតុ គេឃើញម៉ូតូសណ្តោងរ៉ឺម៉កដឹកបន្លែមួយគ្រឿង ជិះគ្នា៤នាក់ (ក្នុងនោះមានស្ត្រីម្នាក់) ដោយបើកបរមានដឹកបន្លែពីស្រុកស្អាង ខេត្តកណ្តាលយកទៅបោះអោយមូយនៅផ្សារដើមគ ហើយធ្វើដំណើរតាមផ្លូវ៣០ម៉ែត្រ ក្នុងទិសដៅពីកើតទៅលិច លុះមកដល់ចំណុចកើតហេតុ ក៍ស្រាប់តែមានបុរសម្នាក់បើកបរម៉ូតូមួយគ្រឿងម៉ាកស៊ុយហ្ស៊ុយគីស្មាស់ ធ្វើដំណើរតាមផ្លូវ៣០ម៉ែត្រ ក្នុងទិសដៅបញ្ច្រាសទិសគ្នា ក្នុងល្បឿនលឿនជែងគេឯងពេញផ្លូវ ។
ប្រភពដដែលបានបន្តថា ពេលអ្នកបើកបរម៉ូតូម៉ាកស៊ុយហ្ស៊ុយគីស្មាស់បើកបរក្នុងល្បឿនលឿនជែងគេឯងពេញផ្លូវ ក៏ស្រាប់តែជ្រុលចូលផ្លូវម្ខាងទៀតទៅបុកម៉ូតូសណ្តោងរ៉ឺម៉កដឹកបន្លែពេញទំហឹង បណ្តាលអោយអ្នកបើកបរម៉ូតូម៉ាកស៊ុយហ្ស៊ុយគីស្មាស់ហោះផ្លោងឡើងលើចិញ្ចើមផ្លូវ រងបួសរយះចង្ការ និងផុងក្រលៀនខាងឆ្វេង ។ ភ្លាមៗនោះដែរ ជនរងគ្រោះត្រូវបានរថយន្តសង្គ្រោះមកដឹកយកទៅសង្គ្រោះនៅមន្ទីរពេទ្យកាល់ម៉ែត្រដែរ តែពេលទៅដល់ពាក់កណ្តាល់ផ្លូវ ជនរងគ្រោះក៏បានស្លាប់បាត់ទៅហើយ ។
ដោយឡែកខាងម៉ូតូសណ្តោងរ៉ឺម៉ក មានមនុស្សរងរបួស រលាត់ដៃរលាត់ជើងតិចតួច ចំណែកអ្នកបើកបរម៉ូតូសណ្តោងរ៉ឺម៉កក៏ត្រូវសមត្ថកិច្ចឃាត់ខ្លួនយកទៅសាកសួរនៅប៉ុស្តិ៍នគរបាលចាក់អង្រែក្រោមផងដែរ ។
ក្រោយពេលកើតហេតុ សមត្ថកិច្ចជំនាញចរាចរខណ្ឌមានជ័យ បានចុះទៅកន្លែងកើតហេតុ រួចហើយក៍បានទំនាក់ទំនងហៅជំនាញចរាចរណ៍ក្រុង អោយចុះទៅធ្វើការវាស់វែងយកម៉ូតូទាំងពីរគ្រឿង ព្រមទាំងអ្នកបើករ៉ឺម៉កទៅរក្សាទុកនៅការិល័យចរាចរណ៍ជើង ។ ចំណែកសពជនរងគ្រោះ ត្រូវបានយកទៅតម្កល់ទុកនៅវត្តចាក់អង្រែក្រោម ដើម្បីស្វែងរកសាច់ញាតិបងប្អូនមកទទួលយកទៅធ្វើបុណ្យតាមប្រពៃណី ៕
ចែករំលែកព័តមាននេះ