បើយើងយកធម៌ព្រះពុទ្ធសាសនាមកជាអាហារ មកជាគ្រឿងជំនួយ ជាគ្រឿងបីបាច់ថែរក្សាទំនុកបម្រុងចិត្តសន្តានរបស់យើង ចិត្តរមែងបានដល់នូវសេចក្តីក្សេមក្សាន្ត ចម្រើនទៅដោយសេចក្តីស្អាតស្អំ ចម្រើនទៅដោយពន្លឺភ្លឺស្វាង និងចម្រើនទៅដោយសេចក្តីស្ងប់សុខ ។
ប៉ុន្តែបើយើងមិនយកព្រះធម៌ពុទ្ធសាសនា មកជាគ្រឿងជួយទំនុកបម្រុងដល់ចិត្តទេ ចិត្តរបស់យើងរមែងមិនចម្រើនទៅដោយសេចក្តីស្អាត និងមិនបានដល់នូវសេចក្តីក្សេមក្សាន្តឡើយ វារមែងធ្លាក់ចុះទៅក្នុងអំណាចនៃសេចក្តីលោភលន់ ខឹងក្រោធ សេចក្តីវង្វេង ការច្រណែនឈ្នានីស ចងគំនុំ និងព្យាបាទគ្នាមិនចេះចប់ឡើយ ។
អំពើទាំងអស់នេះជាការសាងនូវបញ្ហាឲ្យដល់ជីវិតពិតប្រាកដ គឺជាចិត្តដែលមិនមានព្រះពុទ្ធសាសនានៅជាមួយ ហើយពុទ្ធសាសនាក៏មិនបានចម្រើននៅក្នុងចិត្តរបស់យើងឡើយ ការរស់នៅក្នុងលក្ខណៈបែបនេះ ជាជីវិតគ្មានព្រះធម៌ ខ្វះសេចក្តីសុខមួយចំណែកហើយ ។
ចែករំលែកព័តមាននេះ