រាជធានីភ្នំពេញ ៖ បុរសជាអ្នករត់ម៉ូតូឌុបម្នាក់ បានត្រូវជនម្នាក់ទៀតនាំយកទៅចាក់សម្លាប់ប្លន់យកម៉ូតូនៅក្នុងផ្ទះសំណាក់យីហោ«ចន្ធូត្រជាក់ចិត្ត» និងបង្កឱ្យមានការភ្ញាក់ផ្អើលកាលពីវេលាម៉ោង៧យប់ថ្ងៃទី២៧ មករា នៅជាន់ទី៣ បន្ទប់លេខ៣នៃផ្ទះសំណាក់ខាងលើ ស្ថិតនៅតាមផ្លូវបេតុងសូនី ភូមិឫស្សី សង្កាត់ស្ទឹងមានជ័យ៣ ខណ្ឌមានជ័យ ។
ជនរងគ្រោះឈ្មោះ យ៉ាន ជឿន អាយុ៣៧ឆ្នាំ មានស្រុកកំណើតនៅភូមិព្រែកសំបួរ ឃុំអង្គរបុរី ស្រុក
អង្គរបុរី ខេត្តតាកែវ ។ ចំណែកម៉ូតូដែលជនដៃដល់ប្លន់យកទៅនោះម៉ាកហុងដាឌ្រីម សេ៊រីឆ្នាំ២០១៦ ពណ៌ខ្មៅ ពាក់ផ្លាកលេខភ្នំពេញ ១FL-៩៩៨៦ និងចិញ្ចៀន១វង់ ។ ប្រភពព័ត៌មានពីអ្នកមើលការខុសត្រូវផ្ទះសំណាក់ខាងលើបានឲ្យដឹងថា មុនពេលកើតហេតុ នៅវេលាម៉ោង៥ល្ងាច មានបុរស២នាក់ គឺជនរងគ្រោះនិងបុរសម្នាក់ទៀតជិះម៉ូតូហុងដាឌ្រីមមួយគ្រឿង មកជួលបន្ទប់ផ្ទះសំណាក់សម្រាក ។
ក្រោយពីពួកគេចូលផ្ទះសំណាក់បានមួយសន្ទុះ ស្រាប់តែជនម្នាក់បានចុះមកក្រោមយកម៉ូតូជិះចេញទៅបាត់ ពេលនោះម្ចាស់ផ្ទះសំណាក់សួរថា ទៅណា? ហើយជននោះប្រាប់ថា ទៅយកស្រីមកដេក ហើយក៏ជិះម៉ូតូចេញបាត់ទៅ ។
ប្រភពដដែលបន្តទៀតថា បន្ទាប់ពីរង់ចាំបុរសខាងលើយូរពេក ហើយណាមួយមានការសង្ស័យផងនោះ រូបគាត់ក៏ឡើងទៅមើលបន្ទប់ដែលជួលស្នាក់នោះឃើញបន្ទប់ចាក់សោ ហើយរូបគាត់បានយកកូនសោមកចាក់រកមើល ស្រាប់តែឃើញជនរងគ្រោះស្លាប់នៅក្នុងបន្ទប់ទឹក ដោយខ្លួនប្រាណប្រឡាក់សុទ្ធតែឈាម ព្រមទាំងឃើញកូនកាំបិតចិតបន្លែ១នៅក្បែរសពផងដែរ ។
បន្ទាប់ពីឃើញហេតុការណ៍បែបនេះ រូបគាត់ក៏ផ្តល់ដំណឹងដល់នគរបាលប៉ុស្តិ៍ស្ទឹងមានជ័យ៣ ឱ្យមកពិនិត្យមើលពិតមានមនុស្សស្លាប់មែន តែមិនទាន់ដឹងថា ជាករណីអ្វីឲ្យប្រាកដនោះទេ។ បន្តិចក្រោយមក សមត្ថកិច្ចមូលដ្ឋានក៏ទាក់ទងទៅខាងជំនាញគ្រប់ជាន់ថ្នាក់ ដើម្បីពិនិត្យនិងធ្វើកោសល្យវិច័យសព ។
ក្នុងការពិនិត្យ សមត្ថកិច្ចបានរកឃើញកាតគ្រីម៉ូតូចំនួន២សន្លឹក និងទូរស័ព្ទ១គ្រឿង ហើយសពមានស្នាមចាក់ចំនួន៩កាំបិត ទើបសមត្ថកិច្ចសន្និដ្ឋានថា ជាករណីចាក់សម្លាប់ប្លន់យកម៉ូតូ ។ ក្រោយពេលកើតហេតុ សមត្ថកិច្ចបានទាក់ទងហៅក្រុមគ្រួសារឱ្យមកទទួលយកសពទៅធ្វើបុណ្យនៅស្រុកកំណើតឯខេត្តតាកែវ ។
នេះជាករណីលើកដំបូងហើយ ដែលចោរចាក់សម្លាប់ក្នុងផ្ទះសំណាក់ប្លន់យកម៉ូតូ ដែលកន្លងមកធ្លាប់តែចោរហៅឱ្យឌុបដល់កន្លែងស្ងាត់ទើបធ្វើសកម្មភាពប្លន់ ។ ជាមួយនឹងហេតុការណ៍ដែលបានកើតឡើងនេះ ការដែលពួកគេបបួលគ្នាមកដេកនៅផ្ទះសំណាក់បែបនេះនេះ ទំនងអាចជាមនុស្សស្គាល់គ្នាផងដែរ ។
ចែករំលែកព័តមាននេះ