រាជធានីភ្នំពេញ៖រហូតមកទល់ពេលនេះរបួសដោយគ្រោះថ្នាក់ចរាចរណ៍របស់លោកជួង ជី ហៅនាយកុយ បានធូរស្បើយបន្តិចហើយ។ ទោះជាយ៉ាងណាក្តីលោកជួង ជី មិនអាចបន្តការសម្តែងបានទេអំឡុងពេលនេះ គឺត្រូវបែកពីវេទិកាសិល្បៈសម្រាកព្យាបាលរយៈពេល៣ខែតាមវេជ្ជបញ្ជា ។ ទស្សនិកជនក្នុង…
រាជធានីភ្នំពេញ៖រហូតមកទល់ពេលនេះរបួសដោយគ្រោះថ្នាក់ចរាចរណ៍របស់លោកជួង ជី ហៅនាយកុយ បានធូរស្បើយបន្តិចហើយ។ ទោះជាយ៉ាងណាក្តីលោកជួង ជី មិនអាចបន្តការសម្តែងបានទេអំឡុងពេលនេះ គឺត្រូវបែកពីវេទិកាសិល្បៈសម្រាកព្យាបាលរយៈពេល៣ខែតាមវេជ្ជបញ្ជា ។
ទស្សនិកជនក្នុង និងក្រៅប្រទេសបានសម្តែងក្តីត្រេកអរក្រោយដឹងថាករណីរងគ្រោះថ្នាក់ចរាចរណ៍នាខេត្តត្បូងឃ្មុំរបស់តារាកំប្លែងល្បីល្បាញនាយកុយ ផុតពីរបួសធ្ងន់ ឬប៉ះពាល់ដល់ជីវិត ។
ក្នុងហេតុការណ៍កន្លងទៅរថយន្តដែលក្រឡាប់ជិះគ្នា៥ទៅ៦នាក់ មាននាយកុយ នាយ ក្រិន និងភរិយា អ្នកនាងប្រិមប្រិយ ជាដើម។ នាយកុយរងរបួសច្រើនជាងគេ ខណៈអ្នកផ្សេងមិនរបួស ។ នាយកុយ របួសកែងដៃស្តាំដេរ៦ថ្នេរ ហើយគ្រាំទ្រូង ប្រេះឆ្អឹងជំនីរ ។ បន្ទាប់ពីតាមដានមកនាយកុយ ត្រូវក្រុមគ្រូពេទ្យសម្រេចឲ្យសម្រាកនៅផ្ទះព្យាបាលយ៉ាងហោចណាស់៣ខែទើបសុខភាពដូចដើមវិញ ។ នាយកុយយល់ព្រមគោរពតាមវេជ្ជបញ្ជា ។
រថយន្តដែលខូចខាតនោះត្រូវនាយកុយ លើកឡើងថាចំណាយជួសជុលអស់ប្រមាណ៥ទៅ៦ពាន់ដុល្លារ ដោយនាយអាចមានលទ្ឋភាពធ្វើបាន ។
នាយកុយ បានបង្ហាញអារម្មណ៍កក់ក្តៅពេលមហាជនសម្តែងការព្រួយបារម្ភចង់ដឹងពីសុខទុក្ខនាយ ។ អ្នកគាំទ្រម្នាក់កាលពីថ្ងៃទី២៧ មករា ២០១៩និយាយថា«ជូនពរលោកពូកុយឲ្យឆាប់ជាសះស្បើយ ។ សូមវត្ថុសក្តិសិទ្ឋិលើលោកបីបាច់ថែរក្សាលោកពូឲ្យឆាប់បានត្រឡប់មកកាន់វេទិកាសិល្បៈវិញ ព្រោះអ្នកណាក៏ដឹងថានាយ កុយមានបេះដូងស្រឡាញ់សិល្បៈពិតប្រាកដ »។
នាយកុយ ឲ្យដឹងថាអំឡុងពេលសម្រាកព្យាបាលបានប្រធានសមាគមសិល្បករខ្មែរអ្នកនាងចន ច័ន្ទលក្ខិណា និងលោកហេង ឡុង ទៅសួរសុខទុក្ខ និងផ្តល់ប្រាក់មួយចំនួន ។
លើសពីនេះលោកហេង ឡុង បានជជីកសួររឿងរថយន្តខូច ហើយចង់ជួយរកលុយជួសជុលឲ្យ តែនាយកុយថាអាចដោះស្រាយខ្លួនឯងបាន។
នាយកុយ មិនសប្បាយចិត្តចំពោះការលើកឡើងថានាយចង់បានលុយគេជួយយកជួសជុលរថយន្ត ។ នាយកុយ ថ្លែងថា«ខ្ញុំជាមនុស្សធ្វើបុណ្យណាស់មិនថាអ្នកសិល្បៈ ឬក្រៅសិល្បៈទេ គឺខ្ញុំតែងតែជួយ ។
សពណាខ្វះមឈូស ខ្ញុំទិញជូន ដូចបងប្អូនដឹងស្រាប់ហើយ ។ ម៉្លេះហើយទើបដឹងថាបុណ្យធ្វើកន្លងមកពិតជាជួយយើងតបស្នងវិញ ខ្ញុំជឿលើអបិយជំនឿនេះក្រោយជួបហេតុការណ៍គ្រោះថ្នាក់ »៕
ចែករំលែកព័តមាននេះ