ទីក្រុងគូឡាឡាំពួ ៖ លោករដ្ឋមន្ត្រីកិច្ចការសេដ្ឋកិច្ច Mohamed Azmin Ali បាននិយាយថា ប្រទេសម៉ាឡេស៊ីនឹងបោះបង់ចោលគម្រោងផ្លូវរថភ្លើងឆ្នេរខាងកើតដែលមានតម្លៃ២០ប៊ីលានដុល្លារ និងមានក្រុមហ៊ុន China Communications Construction Co Ltd ជាក្រុមហ៊ុនគ្រប់គ្រងគម្រោង ។ នេះបើតាមសារព័ត៌មានបាងកក ប៉ុស្ដិ៍ បានចេញផ្សាយកាលពីថ្ងៃទី២៦មករា កន្លងមក ។
លោក Azmin បានប្រាប់ដល់អ្នកសារព័ត៌មាននៅទីក្រុងគូឡាឡាំពួថា ៖« ការសម្រេចចិត្តនេះកើតមានឡើង ព្រោះគម្រោងនេះមានការចំណាយច្រើនពេក និងច្រើនជាងសមត្ថភាពហិរញ្ញវត្ថុរបស់រដ្ឋាភិបាល »។
លោកបញ្ជាក់ថា៖ « ប្រសិនបើគម្រោងនេះមិនត្រូវបានបោះបង់ទេនោះ រដ្ឋាភិបាលនឹងត្រូវទប់ទល់នឹងអត្រាការប្រាក់ប្រមាណ៥០០លានរីងហ្គីត (១២១លានដុល្លារ)ជារៀងរាល់ឆ្នាំ ហើយយើងមិនមានសមត្ថភាពក្នុងការរ៉ាប់រងវាទេ។ ដូច្នេះ គម្រោងនេះត្រូវតែបោះបង់ចោលដោយមិនប៉ះពាល់ដល់ទំនាក់ទំនងជាមួយនឹងប្រទេសចិន »។
លោកបានបន្ថែមថា សំណងលើកទឹកចិត្តក្នុងការបោះបង់គម្រោងនេះ នឹងត្រូវបានគិតគូរដោយក្រសួងហិរញ្ញវត្ថុដែលកំពុងតែសិក្សាដើម្បីធានាថា ការចំណាយមិនប៉ះពាល់ដល់ថវិការដ្ឋាភិបាល ។ លោកបានបន្តថា រដ្ឋាភិបាលបានទទួលបានសំណើជាច្រើន ប៉ុន្តែពួកគេមិនទាន់សម្រេចចិត្តថា ពួកគេអាចរកក្រុមហ៊ុនថ្មីសម្រាប់គម្រោងផ្លូវរថភ្លើងនេះទេ ។
កាលពីថ្ងៃព្រហស្បតិ៍សប្ដាហ៍មុន ក្រុមហ៊ុន China Communications Construction បានផ្តល់ដំណឹងដល់បុគ្គលិកខ្លួន បន្ទាប់ពីក្រសួងហិរញ្ញវត្ថុម៉ាឡេស៊ីណែនាំកាលពីឆ្នាំមុនឲ្យផ្អាករាល់កិច្ចសន្យាដែលទាក់ទិននឹង Malaysia Rail Link Sdn ។
Malaysia Rail Link ត្រូវបានចាត់តាំងឲ្យត្រួតត្រាលើគម្រោងខ្សែរថភ្លើងឆ្នេរខាងកើតដោយមានក្រុមហ៊ុន China Communications Construction ជាម្ចាស់គម្រោងធំ ។ ការចំណាយសរុបសម្រាប់គម្រោងនេះត្រូវបានគិតថាស្មើប្រមាណ១៩,៦ប៊ីលានដុល្លារ ៕
ចែករំលែកព័តមាននេះ