រាជធានីភ្នំពេញ ៖ មន្ត្រីជាន់ខ្ពស់ធនាគារជាតិនៃកម្ពុជាបានលើកឡើងថា នៅឆ្នាំ២០១៩នេះ ទោះបីទស្សនវិស័យសេដ្ឋកិច្ចពិភពលោកប្រឈមហានិភ័យខ្ពស់ឬកើនឡើងនូវភាពតានតឹងផ្នែកពាណិជ្ជកម្មដែលធ្វើឱ្យមានសម្ពាធប៉ះពាល់ដល់បណ្តាប្រទេសកំពុងអភិវឌ្ឍន៍មួយចំនួនក្តី តែស្ថានភាពម៉ាក្រូសេដ្ឋកិច្ចរបស់កម្ពុជានៅតែបន្តរឹងមាំដដែល ពោលកំណើនសេដ្ឋកិច្ចកម្ពុជារក្សាបានក្នុងរង្វង់៧% ។
ថ្លែងក្នុងពិធីបើកសន្និបាតបូកសរុបលទ្ធផលការងារឆ្នាំ២០១៨ និងលើកទិសដៅការងារ២០១៩ លោក ជា ចាន់តូ ទេសាភិបាលធនាគារជាតិនៃកម្ពុជា មានប្រសាសន៍ថា ទស្សនវិស័យសេដ្ឋកិច្ចពិភពលោកត្រូវបានព្យការណ៍ថានឹងបន្តកើនឡើង ប៉ុន្តែមានកម្រិតទាបជាងឆ្នាំ២០១៨បន្តិច ដោយសារប្រឈមនឹងហានិភ័យខ្ពស់ជាងមុន ដូចជាការកើនឡើងភាពតានតឹងផ្នែកពាណិជ្ជកម្មរវាងសហរដ្ឋអាមេរិក និងចិន ដែលធ្វើឱ្យមានសម្ពាធលើផ្នែកសេដ្ឋកិច្ច និងធុរកិច្ច ។
លោកទេសាភិបាលបន្តថា ស្ថានភាពរឹតត្បិតលើទីផ្សារហិរញ្ញវត្ថុអន្តរជាតិ ដោយសារគោលនយោបាយប្រុងប្រយ័ត្នក្នុងប្រទេសអភិវឌ្ឍន៍មួយចំនួនដូចជា សហរដ្ឋអាមេរិក ដែលបង្កឱ្យមូលធនហូរចេញពីប្រទេសងើបឡើង និងកំពុងលូតលាស់ ។ ការជាប់គាំង និងការស្វែងរកដំណោះស្រាយ ហើយក្នុងស្ថានភាពនេះហានិភ័យខាងក្រៅចំពោះសេដ្ឋកិច្ចកម្ពុជា អាចនឹងកើតឡើងផងដែរ ។ ទោះយ៉ាងណា អត្រាកំណើនសេដ្ឋកិច្ចកម្ពុជានៅឆ្នាំ២០១៩ ត្រូវបានគេរំពឹងថា នឹងបន្តររក្សាបានក្នុងរង្វង់៧% ដោយសាររក្សាបានស្ថានភាពម៉ាក្រូសេដ្ឋកិច្ច និងហិរញ្ញវត្ថុបន្តមានភាពរឹងមាំ ។
លោកគូសបញ្ជាក់ថា ៖« ក្នុងនាមជាអាជ្ញាធររូបិយវត្ថុ និងជាអាជ្ញាធរត្រួតពិនិត្យវិស័យធនាគារ ធនាគារជាតិនៃកម្ពុជាបន្តពង្រឹងជំនឿទុកចិត្ត និងអភិវឌ្ឍន៍ប្រព័ន្ធធនាគារប្រកបដោយភាពរឹងមាំ ភាពប្រកួតប្រជែង សេវាកម្ម ព្រមទាំងបន្តរក្សាបានស្ថិរភាពថ្លៃ ស្របតាមគោលនយោបាយអភិវឌ្ឍន៍វិស័យហិរញ្ញវត្ថុ២០១៦-២០២៥ និងយុទ្ធសាស្ត្រដំណាក់កាលទី៤របស់រាជរដ្ឋាភិបាល។ លើសពីនេះធនាគារជាតិនៃកម្ពុជាបន្តរួមចំណែកគាំទ្រគោលនយោបាយរបស់រាជរដ្ឋាភិបាល និងកែទម្រង់រចនាសម្ព័ន្ធ និងធ្វើពិពិធកម្មមូលដ្ឋានសេដ្ឋកិច្ច និងចូលរួមអភិវឌ្ឍន៍ផែនការសេដ្ឋកិច្ចនានា »។
បើតាមលោកទេសាភិបាលធនាគារជាតិនៃកម្ពុជា វិស័យធនាគារនិងវិស័យសេដ្ឋកិច្ចកម្ពុជាបន្តមានកំណើនខ្ពស់នៅក្នុងតំបន់ ។
យោងតាមរបាយការណ៍ប្រចាំឆ្នាំ២០១៨របស់ធនាគារជាតិនៃកម្ពុជាបង្ហាញថា ទ្រព្យសកម្មសរុបរបស់គ្រឹះស្ថានធនាគារបានកើនដល់៣៤ប៊ីលានដុល្លារ បើធៀបឆ្នាំ២០១៧ មានកំណើន២០% ដោយសារកំណើនឥណទានសរុបកើនឡើង២០,១% ឬស្មើនឹង១៩,៦ប៊ីលានដុល្លារ និងគាំទ្រដោយកំណើនដើមទុន២៣,៣% ស្មើនឹង៦,៦ប៊ីលានដុល្លារ, កំណើនមូលនិធិកម្ចី១០,២% ឬស្មើនឹង១,៦ប៊ីលានដុល្លារ និងកំណើនប្រាក់បញ្ញើ១៤%ឬស្មើនឹង១៩ប៊ីលានដុល្លារ ។
ដោយការការផ្តល់ឥណទានរបស់គ្រឹះស្ថានមីក្រូហិរញ្ញវត្ថុសរុបមានប្រមាណ៥,៤ប៊ីលានដុល្លារ ដល់អតិថិជនសរុប១,៨លាននាក់ ព្រមទាំងកេណ្ឌប្រមូលប្រាក់បញ្ញើសរុប២,៥ប៊ីលានដុល្លារ ពីអ្នកដាក់ប្រាក់បញ្ញើសរុប២,១លាននាក់ ។ អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជា បានឲ្យកាលពីពេលថ្មីៗនេះថា សេដ្ឋកិច្ចកម្ពុជានៅតែបោះជំហានរឹងមាំ ប៉ុន្ដែប្រឈមនឹងហានិភ័យពីកត្តាមួយចំនួនដូចជា បញ្ហាប្រឈមនឹងការដកEBAពីសហភាពអឺរ៉ុបជាដើម ។
លោកបណ្ឌិត គី សេរីវឌ្ឍន៍ អ្នកស្រាវជ្រាវរូបនេះបានបន្ដថា ៖« ប្រសិនជាសហគមន៍អឺរ៉ុបដកប្រព័ន្ធអនុគ្រោះពន្ធចេញពីកម្ពុជា អាចនឹងមានការកាត់បន្ថយបុគ្គលិកមួយចំនួន ហើយប្រសិនបើពួកគេទាំងនោះជាប់ពាក់ព័ន្ធជាមួយបំណុលនៅគ្រឹះស្ថានហិរញ្ញវត្ថុ នឹងធ្វើឲ្យវិស័យហិរញ្ញវត្ថុរង់ផលប៉ះពាល់ ឬមានហានិភ័យ » ។
លោកបណ្ឌិតបន្ដថា ៖« ដោយសារពួកគេមានការងារធ្វើ គេបានខ្ចីលុយមកសង់ផ្ទះ, ទិញផ្ទះបង់រំលស់ ឬទិញមធ្យោបាយយានយន្ដធ្វើដំណើរជាដើម ហើយនៅពេលបាត់បង់ការងារ ពួកគេត្រូវប្រឈមនឹងហានិភ័យនៃការសងត្រឡប់ទៅគ្រឹះស្ថានហិរញ្ញវត្ថុវិញ ។ ដូច្នេះវិស័យនេះ អាចមានហានិភ័យកើតចេញពីការដកប្រព័ន្ធអនុគ្រោះពន្ធនេះដែរ ប្រសិនជាត្រូវបានសហគមន៍អឺរ៉ុបដកមែន »៕
ចែករំលែកព័តមាននេះ