ខេត្តកំពង់ឆ្នាំង ៖ ឯកឧត្តមអៀង វុធ អភិបាលរងខេត្តកំពង់ឆ្នាំងបានអំពាវនាវដល់ប្រជាពលរដ្ឋសូមជួយផ្សព្វផ្សាយបន្តគ្នា ដើម្បីឲ្យប្រជាពលរដ្ឋយកកន្ទុយបណ្ឌដែលវាស់វែងដីធ្លីជាប្រព័ន្ធ កាលពីពេលកន្លងទៅ មកធ្វើការផ្ទៀងផ្ទាត់លើសេចក្តីប្រកាសដែលបានបិទផ្សាយនៅព្រឹកនេះ ហើយបើឃើញមានការខុសឆ្គងមន្ត្រីជំនាញ និងធ្វើការកែតម្រូវជាបន្ទាន់ព្រោះរយៈពេលនៃការតវ៉ាមានត្រឹមតែ១៥ថ្ងៃប៉ុណ្ណោះ ។
សេចក្តីអំពាវនាវនេះបានធ្វើឡើងក្នុងពិធីប្រកាសបិទផ្សាយជាសាធារណៈនូវឯកសារនៃការវិនិច្ឆ័យលើការចុះបញ្ជីដីធ្លីមានលក្ខណៈជាប្រព័ន្ធក្នុងភូមិខ្លែងពណ៌ ឃុំព្រៃមូល នាព្រឹកថ្ងៃទី២៨ ខែមករា ឆ្នាំ២០១៩ ។
ឯកឧត្តមអភិបាលរងខេត្តបានបន្តថា ដោយការលំបាកធ្វើដំណើរផ្លូវឆ្ងាយទើបការមកចូលរួមប្រជុំនៅពេល នេះមានប្រជាពលរដ្ឋត្រឹមតែជាង២០០នាក់ប៉ុណ្ណោះក្នុងចំណោមអ្នកមានបណ្ណវាស់ជាប្រព័ន្ធមានដល់ទៅ២ពាន់ក្បាលដី ។ ហេតុនេះហើយនៅពេលត្រឡប់ទៅវិញ សូមបងប្អូនជួយផ្សព្វផ្សាយឱ្យអ្នកដែលមិនបានដឹងមកពិនិត្យលើតារាងបញ្ជីដែលបានបិទផ្សាយជាសាធារណៈក្នុងវត្តខ្លែងពណ៌រយៈពេល១៥ថ្ងៃ ហើយបើផុតកំណត់នេះ គឺមិនអាចតវ៉ាបានទេ ។ ការមកពិនិត្យផ្ទៀងផ្ទាត់ គឺដើម្បីអោយត្រូវគ្នាព្រោះពេលខ្លះមានខុសស្រៈ ខុសភេទ និងទំហំក្បាលដី ជាដើម ដើម្បីអោយមន្ត្រីជំនាញគេកែតម្រូវឡើងវិញ ។
ជាចុងបញ្ចប់ឯកឧត្តមអភិបាលរងខេត្តបានផ្ដាំផ្ញើដល់បងប្អូនប្រជាពលរដ្ឋសូមចូលរួមអនុវត្តគោលនយោបាយភូមិឃុំមានសុវត្ថិភាព និងចូលរួមការពារព្រៃឈើធនធានជលផលចូលរួមការបង្ក្រាបគ្រឿង ញៀន និងចូលរួមគោរពច្បាប់ចរាចរណ៍ទាំងអស់គ្នា ។
យោងរបាយការណ៍របស់លោក លី សុភា ប្រធានមន្ទីរដែនដីនគរូបនីយកម្ម សំណង់ និងសុរិយោដីខេត្តបានរាយការណ៍ថា បន្ទាប់ពីបំពេញបេសកម្មរបស់មន្ត្រីជំនាញសុរិយោដី ក្នុងភូមិខ្លែងពណ៌ អស់រយៈពេលជាច្រើនខែរួចមក ថ្ងៃនេះមន្ត្រីជំនាញបានចុះមកបិទផ្សាយជាសាធារណៈនូវឯកសារនៃការវិនិច្ឆ័យលើការចុះបញ្ជីដីធ្លីមានលក្ខណៈជាប្រព័ន្ធ ។
ជាលទ្ឋផលឃើញថា ក្នុងភូមិខ្លែងពណ៌ មានការកំណត់ព្រំ និងវិនិច្ឆ័យលើក្បាលដីចំនួន២៦៦៩ក្បាលដី ក្នុងនោះក្បាលដីកសិកម្មចំនួន២៤០០ក្បាលដី ដីលំនៅឋាន២៦៥ក្បាលដី ដីវត្តចំនួន១ក្បាលដី ដីទួលអ្នកតា១ក្បាលដី ដីសាលារៀនមួយក្បាលដី និងដីរួមភូមិចំនួន១ក្បាលដី ។
គួរបញ្ជាក់ដែរថា បន្ទាប់ពីចប់កម្មវិធីប្រជាពលរដ្ឋបានកាន់កន្ទុយប័ណ្ណទៅពិនិត្យផ្ទៀងផ្ទាត់លើឯកសារដែលបានបិទជាសាធារណៈដោយទឹកមុខសប្បាយរីករាយ ហើយសង្ឃឹមថា ពួកគាត់នឹងបានប្លង់រឹងកាន់កាប់ដីធ្លីជាកម្មសិទ្ធដោយស្របច្បាប់ក្នុងពេលខាងមុខនេះជាពុំខាន ៕
ចែករំលែកព័តមាននេះ