រាជធានីភ្នំពេញ ៖ សេចក្តីរាយការណ៍ឱ្យដឹងថា យុវជនម្នាក់បានក្លាយជាអ្នកទោសស្នេហា ដោយជាប់ចោទពីរំលោភលើក្មេងស្រីជំទង់ម្នាក់ បើទោះបីជាពួកគេបានព្រមព្រៀងគ្នា ។ ក្នុងពេលពួកគេជិះម៉ូតូឌុបគ្នាដើរលេងនៅកោះពេជ្ររហូតដល់យប់ជ្រៅ ក៏ឌុបគ្នាទៅដេកក្នុងផ្ទះសំណាក់១យប់ ។ ព្រឹកឡើងនៅថ្ងៃទី២៨ មករា នាងជាសង្សារបានប្រាប់ម្ដាយ ក៏នាំគ្នាដាក់ពាក្យបណ្ដឹងសុំឱ្យនគរបាលប៉ុស្តិ៍ចោមចៅ៣ ជួយឃាត់ខ្លួនយុវជននោះដើម្បីចាត់ការតាមច្បាប់ ។
ហេតុការណ៍ ដែលពួកគេរួមរ័កគ្នានេះ គឺនៅក្នុងផ្ទះសំណាក់យីហោ «ធារីយ៉ា» ចំណុចភូមិព្រៃព្រីងត្បូង២ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។ ជនសង្ស័យមានឈ្មោះខេង ចិត្ត្រា អាយុ២៥ឆ្នាំ ជាកម្មកររោងចក្រ ស្នាក់នៅផ្ទះជួលក្នុងភូមិព្រៃទា១ សង្កាត់ចោមចៅទី៣ ខណ្ឌពោធិ៍សែនជ័យ មានស្រុកកំណើតនៅភូមិអណ្តូងចំបក់ ឃុំវាលពន់ ស្រុកឧត្តុង្គ ខេត្តកំពង់ស្ពឺ ។ ចំណែកក្មេងស្រីមានអាយុ១៥ឆ្នាំ ជាកម្មការិនីរោងចក្រកាត់ដេរ ។
តាមប្រភពឱ្យដឹងទៀតថា យុវជនខាងលើនិងក្មេងស្រីមានទំនាក់ទំនងស្នេហានឹងគ្នាជាច្រើនថ្ងៃមកហើយ។ លុះនៅវេលាល្ងាចថ្ងៃទី២៦ មករា អ្នកទាំង២ជិះម៉ូតូ១គ្រឿងឌុបគ្នាដើរលេង នៅមជ្ឈមណ្ឌលពិពណ៌កោះពេជ្រ រាជធានីភ្នំពេញ ។ ដល់យប់ជ្រៅេ ទើបពួកគេចាកចេញពីកោះពេជ្រ ប៉ុន្តែមិនបានជិះត្រឡប់ទៅផ្ទះទេ ដោយបបួលទៅដេកផ្ទះសំណាក់យីហោ «ធារីយ៉ា» នោះ។
ប្រភពដដែលបន្តថា នៅម៉ោងជាង១១យប់ថ្ងៃដដែល ក្មេងស្រីបានប្រាប់ទៅជនសង្ស័យថា «នាងខ្លាចស្ដីបន្ទោសរឿងដើរបាត់ពីផ្ទះមួយយប់នេះណាស់» តែយុវជនជនសង្ស័យបានប្រាប់នាងថា «កុំខ្លាចអី បើម្តាយអូនស្តីបន្ទោសឬធ្វើអ្វីអូន ទុកឱ្យបងជាអ្នកទទួលខុសត្រូវ»។ នៅក្នុងបន្ទប់ផ្ទះសំណាក់ ជនសង្ស័យបានលួងលោមនាងដោយសុំរួមរ័កជាច្រើនដង តែត្រូវនាងបដិសេធមិនព្រមទេ ។
ទោះបីជាបែបនេះ រហូតដល់ម៉ោង៥ព្រឹកចូលថ្ងៃទី២៧ មករា ជនសង្ស័យបានលួងនាងរួមរ័កហើយ ទើបពួកគេជិះត្រឡប់ទៅផ្ទះវិញ ។ ពេលមកដល់ផ្ទះ ស្ត្រីជាម្ដាយបានជជីកសួរដេញដោល រហូតធ្លាយរឿងរួមរ័កគ្នាតែម្តង ។
ចែករំលែកព័តមាននេះ