រាជធានីភ្នំពេញ ៖ រាជរដ្ឋាភិបាលបានសន្យាទប់ស្កាត់អំពើពុករលួយភាពអយុត្តិធម៌ក្នុងសង្គម និងការរំលោភបំពានដោយប្រើអំណាច ដើម្បីបម្រើប្រយោជន៍បុគ្គល និងបក្សពួក និងការពារសិទ្ធរបស់ពលរដ្ឋពោល គឺពង្រឹងអភិបាលកិច្ចល្អ ដែលជាស្នូលនៃយុទ្ធសាស្ត្រចតុកោណ ដើម្បីកំណើនការងារសមធម៌…
រាជធានីភ្នំពេញ ៖ រាជរដ្ឋាភិបាលបានសន្យាទប់ស្កាត់អំពើពុករលួយភាពអយុត្តិធម៌ក្នុងសង្គម និងការរំលោភបំពានដោយប្រើអំណាច ដើម្បីបម្រើប្រយោជន៍បុគ្គល និងបក្សពួក និងការពារសិទ្ធរបស់ពលរដ្ឋពោល គឺពង្រឹងអភិបាលកិច្ចល្អ ដែលជាស្នូលនៃយុទ្ធសាស្ត្រចតុកោណ ដើម្បីកំណើនការងារសមធម៌ និងប្រសិទ្ធភាព ។
នេះបើតាមលោកស្រីឧបកនាយករដ្ឋមន្ត្រីម៉ែនសំអន រដ្ឋមន្ត្រីក្រសួងទំនាក់ទំនងជាមួយរដ្ឋសភាព្រឹទ្ធសភា និងអធិការកិច្ច ។ ក្នុងជំនួបពិភាក្សាការងារជាមួយលោក វ៉ាង វិនធាន ឯកអគ្គរដ្ឋទូតសាធារណរដ្ឋប្រជាមានិតចិនថ្មីប្រចាំកម្ពុជា នាព្រឹកថ្ងៃទី២៨ មករា ឆ្នាំ២០១៩នៅទីស្តីការក្រសួងលោកស្រីឧបកនាយករដ្ឋមន្ត្រី កិត្តិសង្គហបណ្ឌិត ម៉ែន សំអន បានឯកភាពគាំទ្រ ចំពោះបេសកម្មការទូតរបស់លោក វ៉ាង វិនធាន ដែលកន្លងមកក៏ដូចជា បច្ចុប្បន្នកម្ពុជានឹងចិននៅតែជាមិត្តល្អ ពិសេសគ្រាដែលកម្ពុជាជួបការលំបាករដ្ឋាភិបាលចិនតែងតែជួយជ្រោមជ្រែងដល់កម្ពុជាជាបន្តបន្ទាប់លើការអភិវឌ្ឍគ្រប់វិស័យ ។
លោកស្រីបានបញ្ជាក់ថា រាជរដ្ឋាភិបាលកម្ពុជានៅតែប្រកាន់ខ្ជាប់នូវការគាំទ្រនយោបាយចិនតែមួយ និងនយោបាយ ផ្លូវមួយខ្សែក្រវ៉ាត់មួយ ។ សូមគាំទ្រអនុវត្តចំពោះអនុស្សារណៈចំនួន៨ ដែលបានចុះហត្ថលេខារួចហើយ ក្រោមអធិបតីភាពប្រមុខរដ្ឋាភិបាលទាំងពីរកាលពីដំណើរទស្សនកិច្ចរបស់សម្តេចតេជោ ហ៊ុន សែន នៅប្រទេសចិនព្រោះក្រសួងទំនាក់ទំនងជាមួយរដ្ឋសភាព្រឹទ្ធសភា និងអធិការកិច្ចមានភារកិច្ចធ្វើជាសេនាធិការឲ្យរាជរដ្ឋាភិបាលកម្ពុជា លើការងារតាមដានការអនុវត្តច្បាប់ទប់ស្កាត់អំពើពុករលួយ ភាពអយុត្តិធម៌ក្នុងសង្គម និងការរំលោភបំពានដោយប្រើអំណាច ដើម្បីបម្រើប្រយោជន៍បុគ្គល និងបក្សពួក និងការពារសិទ្ធរបស់ពលរដ្ឋពោល គឺពង្រឹងអភិបាលកិច្ចល្អដែលជាស្នូលនៃយុទ្ធសាស្ត្រចតុកោណ ដើម្បីកំណើនការងារសមធម៌ និងប្រសិទ្ធភាព ។
ក្នុងជំនួបនោះដែរលោកឯកអគ្គរដ្ឋទូតចិនក៏បានលើកឡើងពីវឌ្ឍនភាពថ្មីរបស់កម្ពុជាជាមួយនឹងចិនដែលត្រូវចាប់ផ្តើមនៅឆ្នាំ២០១៩នេះ ដោយចិនប្រកាសគាំទ្រជួយកម្ពុជាលើវិស័យសេដ្ឋកិច្ចគ្រាដែលកម្ពុជាកំពុងទទួលរងនូវការដាក់សម្ពាធពីបណ្តាប្រទេសមួយចំនួន។ ជាមួយនឹងជំហរដ៏រឹងមាំរបស់រដ្ឋាភិបាលចិននាពេលនេះលោកអគ្គរដ្ឋទូតថ្មីបានបញ្ជាក់ថា ភាគីទាំងពីរ កម្ពុជា-ចិន បានចុះហត្ថលេខាលើអនុស្សារណចំនួន៨រួចហើយនៅក្នុងអំឡុងពេលនៃដំណើរទស្សនកិច្ចរបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជាទៅកាន់ប្រទេសចិន ជាលើកដំបូងក្នុងឆ្នាំ២០១៩នេះកាលពីថ្ងៃទី២០ ដល់ថ្ងៃទី២៣ ខែមករា ។
លោកបានរំលឹកពីខ្លឹមសារសំខាន់ៗនៃដំណើរទស្សនកិច្ចរបស់សម្តេចតេជោ ហ៊ុន សែន នៅប្រទេសចិន ពិសេសការជួយលើកកម្ពស់សេដ្ឋកិច្ចកម្ពុជាតាមរយៈការនាំអង្ករពីកម្ពុជាចំនួន៤០ម៉ឺនតោន ក្នុងមួយឆ្នាំ២០១៩ទៅកាន់ប្រទេសចិន ហើយចិននឹងជួយកម្ពុជាក្នុងទំហ៊ំទឹកប្រាក់ប្រមាណ៦០០លានដុល្លារអាមេរិក ចាប់ពីឆ្នាំ២០១៩ដល់ឆ្នាំ២០២១ និងបង្កើនភ្ញៀវទេសចរចិនមកកាន់កម្ពុជាឲ្យបាន៥លាននាក់ ក្នុងឆ្នាំនេះ និងឆ្នាំបន្ទាប់ ព្រមទាំងការពង្រឹងការអនុវត្តច្បាប់រវាងប្រទេសទាំង២ផងដែរ ។
ជាមួយគ្នានោះដែរលោកទូតចិនថ្មីរូបនេះបានថ្លែងអំណរគុណចំពោះលោកស្រី ម៉ែន សំអន ដែលបានសហការជួយដល់បេសកកម្មរបស់មន្ត្រីការទូតចិនកន្លងមកឲ្យទទួលបានជោគជ័យ ហើយក៏សុំការណែនាំបន្តទៀត ដើម្បីឲ្យបេសកកម្មការទូតរបស់លោកលើកនេះកាន់តែល្អប្រសើរឡើងថែមទៀត ៕
ចែករំលែកព័តមាននេះ