រាជធានីភ្នំពេញ ៖ អតីតនិស្សិតដែលបានទទួលអាហារូបករណ៍ទៅសិក្សានៅប្រទេស អូស្ត្រាលី បានចែករំលែកបទពិសោធន៍របស់ខ្លួន ដើម្បីជាទុនដល់សិស្ស និស្សិត ដែលកំពុងស្វែងរកអាហារូបករណ៍ទៅសិក្សានៅប្រទេសអូស្ត្រាលី ។ បើតាមលោកវេជ្ជបណ្ឌិត…
រាជធានីភ្នំពេញ ៖ អតីតនិស្សិតដែលបានទទួលអាហារូបករណ៍ទៅសិក្សានៅប្រទេស អូស្ត្រាលី បានចែករំលែកបទពិសោធន៍របស់ខ្លួន ដើម្បីជាទុនដល់សិស្ស និស្សិត ដែលកំពុងស្វែងរកអាហារូបករណ៍ទៅសិក្សានៅប្រទេសអូស្ត្រាលី ។
បើតាមលោកវេជ្ជបណ្ឌិត ឈឹម សុធារ៉ា អតីតនិស្សិតអាហារូបករណ៍ទៅសិក្សានៅប្រទេសអូស្ត្រាលីចំនួនពីរលើកជាបន្តបន្ទាប់ គឺលើកទី១នៅអំឡុងឆ្នាំ១៩៩៩ ដល់ឆ្នាំ២០០០ ថ្នាក់អនុបណ្ឌិត និងឆ្នាំ២០០៨ ដល់ឆ្នាំ២០១២ សម្រាប់ថ្នាក់បណ្ឌិតនៅសាកលវិទ្យាល័យ Monash University ។
លោក សុធារ៉ា បានឲ្យដឹងថា សម្រាប់អ្នក ដែលមានបំណងចង់ប្រឡងយកអាហារូបករណ៍ទៅសិក្សានៅប្រទេសអូស្ត្រាលី ត្រូវមានការត្រៀមខ្លួនមួយចំនួន ក្នុងនោះ ចំណេះដឹងខាងភាសា គឺជាអ្វីដែល«សំខាន់បំផុត» មុននឹងប្រឡងអាហារូបករណ៍ទៅសិក្សានៅក្រៅប្រទេសនោះ ព្រមទាំងត្រូវត្រៀមនូវមុខជំនាញមួយណាដែលពួកគេចូលចិត្ត និងមានទេពកោសល្យ ។
លោកវេជ្ជបណ្ឌិត ឈឹម សុធារ៉ា ជានាយកប្រតិបត្តិ និងជាស្ថាបនិកនៃអង្គការចិត្តសង្គម អន្តរវប្បធម៌ (Transcultural Psychological Organization-TPO) មានប្រសាសន៍បន្តថា « នៅពេលបានជាប់ក្នុងបញ្ជីជ្រើសរើស និងត្រូវបានគេហៅទៅសម្ភាសន៍ អ្វីដែលគួរត្រៀម គឺត្រូវស្រាវជ្រាវ និងត្រូវប្រាកដខ្លួនឯងថា ពេលត្រលប់មកស្រុកវិញ នឹងធ្វើអ្វីបន្តជួយអភិវឌ្ឍន៍ សង្គមបានដោយរបៀបម៉េច និងត្រូវត្រៀមឯកសារមួយចំនួនទៀតសម្រាប់ឆ្លើយនឹងសំណួរក្នុងពេលសម្ភាសន៍ »។
លោក សុធារ៉ា បានផ្ដល់ជាមតិមួយចំនួនដល់សិស្សានុសិស្ស ដើម្បីទទួលបានអាហារូបករណ៍ទៅសិក្សានៅប្រទេសអូស្ត្រាលី ដូចជា ចំណេះដឹងផ្នែកភាសា «ព្រោះការសិក្សានៅបរទេស គឺត្រូវពឹងលើភាសាបរទេសទាំងស្រុង ដោយផ្តោតលើភាសាអង់គ្លេស ជាក់ស្ដែង ពេលខ្ញុំធ្វើតេស្តភាសាអង់គ្លេស IELTS បានជាប់កម្រិត៧ ក៏ប៉ុន្តែរូបខ្ញុំ ក៏នៅតែជួបបញ្ហាភាសាក្នុងពេលសិក្សានៅអូស្ត្រាលី។ អ្វីដែលប្អូនៗ និស្សិតគួរធ្វើបន្តគឺ ត្រូវអានឲ្យបានច្រើន ស្រាវជ្រាវឲ្យបានច្រើន ពីព្រោះនៅទីនោះជនជាតិគេចូលចិត្តអាន និងស្រាវជ្រាវណាស់។ ជាចុងក្រោយនោះ គឺការបង្កើតមិត្តភាពក្នុងសង្គមឲ្យបានច្រើន ហើយពេលត្រលប់មកស្រុកវិញនោះគឺជាការងាយស្រួលមួយ ក្នុងការបំពេញការងារនៅក្នុងសង្គម »។
លោកវេជ្ជបណ្ឌិត ឈឹម សុធារ៉ា គឺជាអតីតនិស្សិតអាហារូបករណ៍អូស្ត្រាលីមួយរូបក្នុងចំណោមប្រជាជនកម្ពុជាជាច្រើនរយនាក់ ដែលបានទៅសិក្សានៅអូស្ត្រាលី ។ សម្រាប់ការដាក់ពាក្យស្នើសុំអាហារូបករណ៍អូស្ត្រាលីកម្ពុជាឆ្នាំសិក្សា២០២០ នឹងចាប់ផ្តើមបើកនៅថ្ងៃទី១ ខែកុម្ភៈ ឆ្នាំ២០១៩ និងបិទនៅថ្ងៃទី៣០ ខែមេសា ឆ្នាំ២០១៩ ខាងមុខ ។
សូមបញ្ជាក់ថា អាហារូបករណ៍អូស្ដ្រាលី (Australia Awards Scholarship) គឺជាផ្នែកមួយដ៏មានតម្លៃ និងយូរអង្វែង នៃការចូលរួមរបស់អូស្ត្រាលី នៅក្នុងប្រទេសកម្ពុជា។ នៅទសវត្សរ៍ឆ្នាំ១៩៥០ ទសវត្សរ៍ឆ្នាំ១៩៦០ និងឆ្នាំ១៩៧០ រដ្ឋាភិបាលអូស្ត្រាលី បានគាំទ្រប្រជាជនកម្ពុជាដែលមានទេពកោសល្យ ដើម្បីសិក្សានៅប្រទេសអូស្ត្រាលី តាមរយៈកម្មវិធី Colombo Plan ។
ចាប់តាំងពីឆ្នាំ១៩៩៤មក កម្មវិធីអាហារូបករណ៍អូស្ដ្រាលី បានផ្តល់ដល់ប្រជាជន កម្ពុជាជាង៨០០នាក់ ក្នុងនោះមានស្ត្រីចំនួន២៩០នាក់បានទៅសិក្សានៅអូស្ត្រាលី។ ជាក់ស្តែងសម្រាប់ឆ្នាំ២០១៨ រដ្ឋាភិបាលអូស្ត្រាលី បានផ្តល់អាហារូបករណ៍ដល់ប្រជាជនកម្ពុជាចំនួន៤៤រូប ។ តាមរយៈអាហារូបករណ៍អូស្ដ្រាលីនេះ យុវជនកម្ពុជាជាច្រើនជំនាន់ បានក្លាយជាតួអង្គសំខាន់សម្រាប់ការអភិវឌ្ឍរបស់ប្រទេសកម្ពុជា ដោយសារអាហារូបករណ៍អូស្ដ្រាលី កំពុងផ្តល់ឱកាសអប់រំដល់ប្រជាជនកម្ពុជាដែលមានទេពកោសល្យ ឲ្យទទួលបានការអប់រំកម្រិតក្រោយឧត្តមសិក្សា ដើម្បីចូលរួមចំណែកក្នុងការអភិវឌ្ឍប្រទេសកម្ពុជា ។
លោកជំទាវ Angela Corcoran ឯកអគ្គរាជទូតអូស្ត្រាលីប្រចាំប្រទេសកម្ពុជា មានប្រសាសន៍ថា អាហារូបករណ៍ផ្តល់ដោយរដ្ឋាភិបាលអូស្ត្រាលី គឺជាឱកាសដ៏ល្អសម្រាប់យុវជនកម្ពុជាដើម្បីអនាគតភ្លឺស្វាង ។
លោកជំទាវ Angela Corcoran មានប្រសាសន៍បញ្ជាក់យ៉ាងដូច្នេះថា « អាហារូបករណ៍អូស្ត្រាលី គឺជាឱកាសដ៏ល្អសម្រាប់និស្សិតកម្ពុជាដែលមានទេពកោសល្យ សម្រាប់បន្តការសិក្សា និងបង្កើតទំនាក់ទំនងយូរអង្វែងជាមួយអូស្ត្រាលី ទាំងផ្នែកវិជ្ជាជីវៈ និងជាលក្ខណៈបុគ្គល »។
លោកជំទាវឯកអគ្គរាជទូតអូស្ត្រាលីបន្តថា «កម្មវិធីអាហារូបករណ៍អូស្ដ្រាលី គឺជាឧទាហរណ៍ជាក់ស្តែងនៃរបៀបដែលកម្មវិធីអភិវឌ្ឍន៍របស់យើងកំពុងធ្វើឱ្យមានការផ្លាស់ប្តូរពិតប្រាកដនៅក្នុងជីវិតរបស់ប្រជាជនកម្ពុជា។ ទំនាក់ទំនងរវាងប្រជាជនអូស្ត្រាលី និងប្រជាជនអូស្ត្រាលី មានការរីកចម្រើនជារៀងរាល់ឆ្នាំ ដោយសារកម្មវិធីជំនួយអភិវឌ្ឍន៍នានា ដូចជាកម្មវិធីអាហារូបករណ៍អូស្ដ្រាលីនេះ »។
សូមបញ្ជាក់ថា អាហារូបករណ៍អូស្ត្រាលី គឺបើកចំហដល់បេក្ខជនមកពីគ្រប់វិស័យ ទាំងសាធារណៈ អង្គការក្រៅរដ្ឋាភិបាល និងវិស័យឯកជន ។ សម្រាប់អ្នកដាក់ពាក្យសុំអាហារូបករណ៍អូស្ត្រាលី ត្រូវបានវាយតម្លៃចំពោះគុណសម្បត្តិវិជ្ជាជីវៈ និងលក្ខណៈផ្ទាល់ខ្លួនរបស់ពួកគេ សមត្ថភាពសិក្សា និងសំខាន់បំផុត គឺសក្តានុពលរបស់ពួកគេក្នុងការដោះស្រាយបញ្ហាប្រឈមនៃការអភិវឌ្ឍនៅក្នុងប្រទេសកម្ពុជា។ សម្រាប់ការស្នើសុំអាហាររូបករណ៍នេះទៀតសោត គឺត្រូវបានលើកទឹកចិត្តយ៉ាងខ្លាំងសម្រាប់ស្ត្រី ជនពិការភាព និងប្រជាជនដែលរស់នៅ និងធ្វើការនៅតាមបណ្តាខេត្តផងដែរ ។
ក្នុងនោះផងដែរ អតីតនិស្សិតអាហារូបករណ៍ដែលបានសិក្សានៅប្រទេសអូស្ត្រាលី រាប់រយនាក់ កំពុងប្រើប្រាស់បទពិសោធន៍ និង ជំនាញដែលទទួលបាននៅក្នុងប្រទេសអូស្ត្រាលី ដើម្បីលើកស្ទួយការអភិវឌ្ឍសង្គម និងសេដ្ឋកិច្ចរបស់ប្រទេសកម្ពុជា ។ សមាគមអតីតនិស្សិតអូស្ត្រាលីប្រចាំនៅកម្ពុជា ឬហៅកាត់ថា (AAA-C) តំណាងឱ្យអតីតនិស្សិត ដែលមានបំណងចង់រក្សាទំនាក់ទំនងរបស់ពួកគេជាមួយអូស្ត្រាលី ក៏ដូចជានិស្សិតកម្ពុជាដែលសិក្សានៅប្រទេសអូស្ត្រាលី។ យើងសូមលើកទឹកចិត្តដល់អតីតនិស្សិតដែលមានសិទ្ធិគ្រប់ជាន់ថ្នាក់ឲ្យចូលរួមក្នុងសមាគមន៍ AAA-C ។
កញ្ញា សាន់ សុជាតា ដែលទទួលបានអាហារូបករណ៍ទៅសិក្សានៅប្រទេសអូស្ត្រាលីកាលពីឆ្នាំ ២០១៦ សម្រាប់ការសិក្សាថ្នាក់បណ្ឌិត នៅសាកលវិទ្យាល័យQueensland University of Technology នៅអូស្ត្រាលី បានឲ្យដឹងផងដែរថា អ្វីដែលនិស្សិតស្វែងរកអាហារូបករណ៍ត្រូវធ្វើដើម្បីទទួលបានអាហារូបករណ៍នោះ «គឺត្រូវមើលលក្ខខណ្ឌតម្រូវ (requirement ) ឲ្យបានច្បាស់លាស់ និងពិនិត្យមើលមួយៗ រួចហើយត្រូវត្រៀមនូវមុខជំនាញ និងឯកសារ ដែលត្រូវនឹងលក្ខខណ្ឌនោះ »។
កញ្ញាបន្តថា នៅពេលបានទៅសិក្សានៅអូស្ត្រាលីហើយ ប្អូនៗនិស្សិតទាំងអស់ត្រូវខំកាន់តែខ្លាំង ដោយត្រូវស្វែងរកជំនួយបន្ថែម ពីមិត្តភក្ដិ លោកគ្រូ អ្នកគ្រូ និងត្រូវពង្រីកឲ្យកាន់តែខ្លាំងថែមទៀតចំពោះទំនាក់ទំនងខាងក្រៅ ជាមួយនិស្សិតអូស្ត្រាលី និស្សិតអន្តរជាតិដែលសិក្សានៅក្នុងប្រទេសអូស្ត្រាលី ក៏ដូចជាទំនាក់ទំនងជាមួយស្ថាប័នផ្សេងៗទៀតនៅក្នុងប្រទេសនោះ ដើម្បីជាទុនមួយនៅពេលត្រលប់មកកម្ពុជាវិញ ។
កញ្ញា សាន់ សុជាតា ដែលកំពុងបម្រើការងារក្នុងតួនាទីជាអ្នកពិគ្រោះយោបល់សម្រាប់គម្រោងថ្នាក់តំបន់ (Consultant) សម្រាប់កម្មវិធីសុវត្ថិភាពផ្លូវថ្នល់ ដែលឧបត្ថមថវិកាដោយសហភាពអឺរ៉ុប មានប្រសាសន៍បញ្ជាក់បន្ថែមថា «អាហារូបករណ៍ដែលអូស្ត្រាលីផ្ដល់ជូននិស្សិតកម្ពុជា នឹងផ្ដល់ឱកាសឲ្យពួកគេ ពង្រីកចំណេះ និងជំនាញរបស់ខ្លួន ក្នុងការពង្រីកទំនាក់ទំនងបន្ថែមជាមួយសហគមន៍អន្តរជាតិ និងផ្ដល់ឱកាសក្នុងការអភិវឌ្ឍធនធានមនុស្ស និងអាចទាក់ទាញធនធានមនុស្សទាំងនោះ មកអភិវឌ្ឍប្រទេសកម្ពុជា ព្រមទាំងយកចំណេះដឹងដែលទទួលបានពីអូស្ត្រាលីមកអភិវឌ្ឍន៍ប្រទេស ឲ្យកាន់តែប្រសើរឡើង »៕
ចែករំលែកព័តមាននេះ